Tito 1 - JAM DE NHIALIC 2011

¹ Yɛn Paulo, lïm ë Nhialic, ku ye tuny ë Yecu Kërtho, në këde gäm de kɔc cïï Nhialic lɔc, ku në këde ŋïny bï kɔc yic ŋic ëgɔk, yic ee röŋ ke riëëu de Nhialic,

² në aŋäth de pïïr athɛɛr, pïïr cï Nhialic Raan cïï lueth duëër töör kɔn lueel an, bï gäm kɔc, ɣɔn ŋootë piny ke kënë cak:

³ ku acï jamde nyuöth kɔc ëkööldɛn piɛth në guiëër ë wëlpiɛth, guiëër cï tääu ë yacin këde löŋ de Nhialic Konyda.

⁴ Awerek en gäär Tito, mɛnhdiën yic në këde gämdan cuk rɔm ëtök. Ë dhuëëŋdepiɔ̈u ku mät ë ke ye tɔ̈u në yïn, në ke bɔ̈ tëde Nhialic Wääda kekë Bɛ̈nydït Yecu Kërtho Konyda.

Luɔi de Tito ë Kerete

⁵ En aa nyääŋ ɛn yïn piny ë Kerete wään, luɔi bï yïn käŋ kiɛm piny ka ŋoot ke ke de të dak, ku jɔ röördït ke ɣön ë Nhialic dɔm kɔc bï tɔ̈u ë kɔc nïïm ë pɛ̈ɛ̈nydït yiic ëbɛ̈n, acït man cän e kɔn lɛ̈k yïn.

⁶ Na de raan cïn kë bï e gɔ̈k, mony de tiiŋ tök, raan de mïthkɛn cï gam, mïth kënë kɔn gaany në baŋ de thuëëc de käŋ ku reec de löŋ.

⁷ Raan ee kɔc cï gam tiit abï dhil aa raan cïn kë bï e gɔ̈k, luɔi ee yen raan ee dhiën ë Nhialic tiit, acie raan ee këde yenpiɔ̈u kɔɔr, ku cie raan ee dap gɔ̈th, ku cïï mɔ̈u ee nhiaar, ku cie raan ee kɔc dap dui, ku cïï wëu ke ayäär ee nhiaar.

⁸ Ku abï aa raan ŋic kamaan, raan nhiaar këpiɛth, raan piɛth nɔm, raan ŋic löŋ piɛth lueel, raan ɣeric, raan ŋic rɔt muk.

⁹ Raan ee wël yith ŋiëc döt cït man cï e wɛ̈ɛ̈t, luɔi duëër en kɔc riit piɔ̈ɔ̈th në wëët piɛth, ku ŋic kɔc jäny en guut ë löŋ.

¹⁰ Ade kɔc juëc nu, kɔc ee löŋ rɛɛc piŋ, kɔc ee ɣɔ̈ric lueel, ku yek kɔc math, ku tëdït ë keek ee kɔc aŋueel.

¹¹ Kɔckë abï ke dhil ruɔɔt thook, ayek dhiën riɔ̈ɔ̈k ëliŋliŋ, ku yek kɔc wɛ̈ɛ̈t ë kë cïï piɛth, në biäk de nhiëër nhiɛɛr kek wëu ke ayäär.

¹² Raan tök ë keyiic gup, ee tiëtden guöp, acï lueel an, “Keretai ayek lueth töör ëcaŋɣɔn, ayek läi rac adaakrɔt cï wäth, ciëëm lir yiic ë thuaat.”

¹³ Kë lueel cäätɔyë ee yic. Yen ee yïn keek jɔ̈ɔ̈ny ë jäny rac, ke ke bï aa tɔ̈u ë gämic ke cïn kërac,

¹⁴ ku cïkï kɔ̈ɔ̈r ee Judai paar ee piŋ, ayï lööŋ lueel kɔc tei, kɔc ee röt yal wei ë yicic.

¹⁵ Käŋ kedhie ayek lɔ wai tëde kɔc lɔ piɔ̈ɔ̈th wai: ku kɔc cï piɔ̈ɔ̈th nhiany ku kɔc reec gäm, acïn kë lɔ wai nu tëde keek, kenïïm ayï kepiɔ̈ɔ̈th acïk nhiany kedhie.

¹⁶ Ayek lueel an, ŋickï Nhialic, ku yek jäi në luɔiden, ee kɔc rac ëtaiwei, ayek löŋ rɛɛc piŋ, ku cïnkï naamden në luɔi piɛth ëbɛ̈n.