Ruuth 4 - JAM DE NHIALIC 2011

Bowadh Anöm Ruuth

¹ Go Bowadh lɔ në kal ë wut thok ku nyuuc. Na wën, ke raan rɛɛn kek wën lueel ë bɔ̈ ke tëk. Go cɔɔl ku lëk en an, “Bä nyuc piny tëthiinakäŋ da mɔny.” Go bɛ̈n ku nyuuc.

² Ku cɔɔl Bowadh röördït ke wut kɔ̈k kathiëër, ku tɔ ke nyuc ayadäŋ. Na wën aa cïk nyuc,

³ ke lëk raan rɛɛn kek an, “Nawomi ka cï bɛ̈n ciëën Mowap. Ku akɔɔr aa ɣɛɛc piny de Elimelek raanda.

⁴ Ka ee yïn aa ta pïŋ. Go na kɔɔr bä piny dɔ̈k kɔ̈u, ke bä dɔ̈k kɔ̈u në röördït ke wut rɛ̈ɛ̈rë nïïm eenë kedhie. Na cï bï dɔ̈k kɔ̈u, ke luel ayadäŋ. Yïn ade nɔm yic tueŋ, ku ja bɛ̈n lɔ në yïcök.” Go ë raan bɛ̈ɛ̈r an, “Abä ɣɔɔc”

⁵ Go Bowadh lueel an, “Apiɛth arëët, na bä piny dɔ̈k kɔ̈u ke yï nöm Ruuth ayadäŋ, nyan ë Mowap tiiŋ abaar. Ke piny ë bï ŋoot ke ye këde ɣön baai Elimelek.”

⁶ Go puk nɔm an, “Na ye täude ka, ke piny acä bï bɛ dɔ̈k kɔ̈u, na ee piny cïï mïthkï bï lɔ̈ɔ̈k lak. Däk këdu kɔ̈u yïn.”

⁷ Ku në aköölkë, paan ë Yithriɛl të cïï raan piny ɣɔɔc, ku nɔn cï wiët, raan ɣɛɛc këdäŋ ee waarde bɛ̈ɛ̈i bei, ku gëm raan ɣöc. Të cï ye looi aya në Yithriɛl ka ɣööc ë röŋ.

⁸ Na wën, aacï raanden ë yï Bowadh en lueel an, “Däk piny kɔ̈u në yïn,” ke bïï waarde bei ku gëm Bowadh.

⁹ Go Bowadh jɔ lɛ̈k röördït ke wut, ayï kɔc rɛ̈ɛ̈r ëtɛ̈ɛ̈n kedhie an, “Wek ee cäätɔɔ wedhie ee köölë, në luɔi cän piny ɣɔɔc ëbɛ̈n tëde Nawomi, piny de Elimelek ke wɛ̈ɛ̈tke Kilion kekë Maɣlon.

¹⁰ Ku yɛn nöm Ruuth ayadäŋ, nyan ë Mowap, tiiŋ abaar de Maɣlon ke ye tik. Ke piny ë bï ŋoot ke ye piny baai de Elimelek. Ke baaide ë cï rin bï määr në dhiënic, ku cïï rin mär wut aya.”

¹¹ Go röördït ke wut lueel, mɛ̈tkï në kɔc rɛ̈ɛ̈r ë kal thok kedhie an, “Wok ee cäätɔɔ. Bɛ̈nydït abï tiiŋduön nömë tɔ cït Racel kekë Liya, diäär wään yïk baai de Yithriɛl. Ku abï yï tɔ kɛɛr në dhiën ë Eparatha yic, ku tɔ rinku tiëc në Bethleɣem.

¹² Ku Bɛ̈nydït abï Ruuth tɔ dhiëth yï mïth, cït man wään dhiëth ë Tamar Juda wëndɛn Peredh.”

Kuat de Bowadh

¹³ Go Bowadh Ruuth nööm tɔ ye tiiŋde. Go Bɛ̈nydït Ruuth thieei, go meth yök, ku dhiëëth mɛwä.

¹⁴ Go diäär lɛ̈k Nawomi an, “Piɔny Bɛ̈nydït, në biäk cï Yen yï gäm wëndu. Abï Bɛ̈nydït en tɔ tiëc rin në Yithriɛlic ëbɛ̈n!

¹⁵ Abï pïïrdu bɛ kiɛm piny, ku lɔ̈ɔ̈ŋ yïn në dhiɔɔpdu yic. Tiiŋ ë wëndu anhiaar yïn, acï yï luöi kë wär kë duëër ë wɛ̈ɛ̈tku kadhorou looi, në biäk cï yen yï dhiëth wën ë wëndu.”

¹⁶ Go Nawomi meth dɔm, ku boom ë yeyɔu, ku muk apiɛth

¹⁷ Go diäär rɛ̈ɛ̈r në yen meth cäk an Obed. Ku lueelkï wut an, “Nawomi acï dhiëth mɛwä!” Ku Obed yen acï bɛ̈n aa wun Jethe wun Debid.

¹⁸ Ku kënë ee kuat de Peredh: Peredh aa dhiëth Ɣedheron,

¹⁹ ku dhiëth Ɣedheron Ram, ku dhiëth Ram Aminadab,

²⁰ ku dhiëth Aminadab Nacon, ku dhiëth Nacon Thalmon,

²¹ ku dhiëth Thalmon Bowadh, ku dhiëth Bowadh Obed,

²² ku dhiëth Obed Jethe, ku dhiëth Jethe Debid.