Ruuth 3 - JAM DE NHIALIC 2011

Ruuth Ayök Moc

¹ Na ɣɔn, ke lëk ë Nawomi Ruuth an, “Yïn bä yɔ̈k mony agɔk mɛnhdï, ke yï bï nɔm dɛ baaidu.

² Raan cɔl Bowadh ɣɔn yïn luui domde wekë diäär, araan ke wook arëët. Abï lɔ kɔ̈m ë barli ë nɔn awakɔ̈uwë.

³ Ka yïn waakë apiɛth, ku tɔc rɔt në aŋiëër, ku tääuwë lupɔɔkuön piɛth, ku lɔ ë jöŋ kɔ̈u të le yen käm. Ku du rɔt nyuth en abïï kɔn thök ë cäm ku dëk.

⁴ Ku woi të tɔ̈ɔ̈c en thïn apiɛth. Na lë aacï niin, ke yï yööt lupɔ bei në yecök, ku tɔ̈c në yecök ciëën ëtɛ̈ɛ̈n. Na le pääc, abï yï nyuöth kë bä looi.”

⁵ Go Ruuth lueel an, “Apiɛth, këriëëc cï lueel ëbɛ̈n abä looi.”

⁶ Go Ruuth lɔ ë jöŋ kɔ̈u, ku le këriëëc cïï mamɔɔcde lɛ̈k en looi.

⁷ Na wën, aacï Bowadh thök ë cäm ku dëk, ku cï piɔ̈u miɛt, ke lɔ tɔ̈c ë jöŋ de barli kɔ̈u ciëën. Go Ruuth lɔ në yelɔ̈ɔ̈m ë määth, ku yɔɔt lupɔ wei në yecök, ku tɔ̈ɔ̈c.

⁸ Na wën, ë wɛ̈ɛ̈ric cil, ke Bowadh ë riëër ë nïnic, ku puk rɔt. Go tik yök anin ë yecök ciëën.

⁹ Go luɔp ke cï gäi an, “Ee yïn ŋa?” Go Ruuth bɛ̈ɛ̈r an, “Ee yɛn lïmduön Ruuth, bɛ̈ny.” Ku lueel an, “Ee yïn aye wën baaidiën bï ya muk, ka yïn tɔ yɛn ee tik.”

¹⁰ Go Bowadh lɛ̈k en an, “Yïn bï Bɛ̈nydït thieei meth, yïn ë dhiëndu dhuëëŋ guöp arëët, awär dhuɛ̈ŋ wään cïn mamɔɔcdu kɔn dhuëëŋ guöp. Yïn ee tiiŋ piɛth, tɛk däŋ adï cï rɔt kɔ̈ɔ̈r wën dhuk, nɔn kueeth, ku nɔn kuɛny nyin. Ku ee kënë akɛ̈në looi.

¹¹ Ku ënɔɔnë, du be diɛɛr, këriëëc ëbɛ̈n abä kiëët. Kɔckuɔ kedhie, aŋickï nɔn yïn tiiŋ piɛth.

¹² Ee yic, yɛn ee wën baaiduön rɔ̈ŋ bä yï muk. Ka kë nu, yïn de nɔm wën baaiduön thiääk ke yïn aläl awär ɛn.

¹³ Ka yïn jɔ niin. Të cïï piny ruu alë, abä lɔ luɔp na bï gam në luɔi bï en yï muk. Na cï gam në luɔi bï en yï muk, ka apiɛth arëët. Na cï jaai, ke yɛn ë kuëëŋ ë Bɛ̈nydït, yïn bä muk. Ka yïn nïn, piny ë bï kɔn ruu.’

¹⁴ Na ɣɔn amiäk, ke Ruuth ë dap pääc aduduur ke piny ë ŋoot ke col, në luɔi ë cïï Bowadh ye kɔɔr nɔn bï en dɛ raan ŋic en nɔn ë niin en ke tik.

¹⁵ Go Bowadh lɛ̈k en an, “Bɛ̈ɛ̈iyë cuɛtdu bei, ku thiɛthë piny.” Go Ruuth cuɛtde bɛ̈ɛ̈i bei ku thieth piny. Go Bowadh kë cït kilɔɔ kathiërrou ë barli wäl thïn, ku kɛ̈p ke në yekët. Ku tɔ puk enɔm wut.

¹⁶ Na wën, aacï yenɔm puɔ̈k baai, ke lop ë mamɔɔcde an, “Cäk a tɔ̈u adï mɛnhdï?” Go Ruuth en tɛ̈t këriëëc cïï Bowadh luöi en ëbɛ̈n.

¹⁷ Ku lëk en an, acïï Bowadh bɛ̈n lɛ̈k ɛn an, “Yïn cïï yïnɔm bï dɔk baaŋ tei. Go ya gäm ee barliikë ëbɛ̈n.”

¹⁸ Go Nawomi lɛ̈k Ruuth an, “Ka yïn ënɔɔnë mɛnhdï, jɔ rɔt päl piny, ku tit kë bï rɔt looi. Bowadh acï bï lɔ̈ŋ ee köölë të kën en ë kënë kɔn thöl.”