Ruuth 2 - JAM DE NHIALIC 2011

Ruuth Alui Dom de Bowadh

¹ Ku ëtɛ̈ɛ̈n, Nawomi ade nɔm raan ë baaide cɔl Bowadh, ee raan baaiden ë yï Elimelek monyde. Ku Bowadh aaye raan kueth.

² Kööl tök, ke lëk ë Ruuth Nawomi an, “Yɛn lɔ ë duumiic, la kuany ë rɛɛp cï döŋ piny ë kɔc cök. Abï dɛ raan lɔ piɔ̈u kok ke yɛn.” Go Nawomi lɛ̈k en an, “Lɔ mɛnhdï.”

³ Go Ruuth lɔ ë duumiic, le kuany në ayɔ̈ɔ̈i ke rap cï döŋ piny ë kɔc cök ciëën. Ku në miɛt ë guöpde, ee dom ë Bowadh guöpde, raan baaiden ë yï Elimelek yen ë kuëny en thïn.

⁴ Na wën, ke Bowadh ë bɔ̈ domic, ku thiëëc kɔc lui an, “Bɛ̈nydït ë tɔ̈u ke week!” Go kɔc lui puk nɔm an, “Athiɛɛi ë Bɛ̈nydït ë tɔ̈u ke yïn!”

⁵ Na wën, ke Bowadh ë lop raan nu në kɔckɛn lui nïïm an, “Ee nyan ëŋa ë kënë?”

⁶ Go puk nɔm an, “Ee nyan ë Mowap wään bɔ̈ ke Nawomi.

⁷ Acï ya lim wën an ta ye kuany ayɔ̈ɔ̈i ke rap wën ee döŋ piny ë kɔc lui cök. Ë guɔ dap riëël wën amiäk, ka aa lui ë caŋ amiäk wën, ka ajɔ piac nyuc atiëpic ënɔnthiinë lɔ̈ɔ̈ŋ.”

⁸ Go Bowadh lɛ̈k Ruuth an, “Piŋ apiɛth mɛnhdï, du ee bɛ lɔ dom däŋ pei lɔ köör ë rap. Ye luui eenë we diäär lui domdï.

⁹ Ye ke tïŋ të le kek tem thïn, ku kuany kecök. Acä lɛ̈k kɔckï nɔn cïï kek yï bï ya rɛ̈lic. Na cï yal, ke yï dëk në tööny de pïïu cïk thiɔ̈ɔ̈ŋë.”

¹⁰ Go Ruuth e nɔm guöt piny në Bowadh nɔm abïï piny jak në yenɔm, ku lop an, “Eeŋöduön nuɛɛn yïn rɔt në yɛn, ku yɛn ee raan lei?”

¹¹ Go Bowadh lɛ̈k en an, “Këriëëc piɛɛth cï luöi mamɔɔcdu ëbɛ̈n, wään cïï monydu thou, acä ke piŋ kedhie. Luɔi cïn wuur nyääŋ piny ke moor, ku nyääŋë paandun piny, ku bä bɛ̈n rëër we jur kɛ̈në kɔn tïŋ anandu.

¹² Bɛ̈nydït abï yï cuööt në kë piɛɛthduön cï looi. Bɛ̈nydït, Nhialic de Yithriɛl, raan cïï yïn bɛ̈n tëde Yen bï yï bɛ̈n gël, abï yï puɔ̈k nɔm këriëëcduön piɛɛth cï looi ëbɛ̈n!”

¹³ Go Ruuth lɛ̈k en an, “Yïn ë ya dhuëëŋ guöp arëët bɛ̈ny. Yïn ë ya riit piɔ̈u në jam piɛɛthduön cï lɛ̈k ɛn, na cakaa nɔn cän ee raan töŋ de kɔc luui yïn.”

¹⁴ Na wën, aacï thaar ë cäm bɛ̈n, ke lëk ë Bowadh Ruuth an, “Bä nöm kuïn cï pam kï, ku juɔɔlë në cuei yiic, ku cam.” Go Ruuth bɛ̈n, ku nyuuc ke kɔc lui. Go Bowadh en gäm kooi. Go cam abï kuɛth, ku both këcam biäk.

¹⁵ Na wën, aa jɔt Ruuth rɔt le luui, ke lëk ë Bowadh kɔcke an, “Yak tɔ kuëny ayï jöŋ kɔ̈ɔ̈th. Duökï ee cop.

¹⁶ Ku yak lɔ ke nyuänkï nïïm kɔ̈k ke rap, ku nyäŋkï ke yen löök ke kuany.”

¹⁷ Go Ruuth kuany në barli agut cï thëën. Na wën, ke kɛ̈ɛ̈m ke, ku them keek, gokï kilɔɔ kathiëër lëu.

¹⁸ Go ke jɔt, leer ke baai të nu mamɔɔcde, le nyuöth rɛɛp cï yök.

¹⁹ Go mamɔɔcde ye luɔp an, “Ë yï lɔ rɛɛp kiithkë yök ënou ëbɛ̈n aya? Ee dom ëŋa ë le yïn kuany thïn? Athiɛɛi de Nhialic abï tɔ̈u ke raan ë lɔ yï dhuëëŋ guöp!” Go Ruuth lɛ̈k mamɔɔcde nɔn ë le yen kuany dom de raan cɔl Bowadh.

²⁰ Go Nawomi lɛ̈k tiiŋ ë wënde an, “Bɛ̈nydït abï Bowadh thieei. Bɛ̈nydït ee piɔ̈u kok ë cieŋ kekë kɔc pïr, ayï kɔc cï thou.” Ku be Nawomi lɛ̈k Ruuth an, “Raan dɛɛi yïn tïŋë, ee raan raan ke wook arëët, ee raan töŋ de kɔc duëër wo muk.”

²¹ Go Ruuth lueel an, “Ku acïï Bowadh lɛ̈k ɛn ayadäŋ an bä ya cool ë lɔ kuany ë rap domde aköölnyïïn ëbɛ̈n, abï tëm thök.”

²² Go Nawomi lɛ̈k Ruuth tiiŋ ë wënde an, “Aŋuän mɛnhdï, ye lɔ we diäär lui domde aköölnyïïn. Na lɔ luui dom däŋ, tɛk däŋ de raan duëër yï lɔ luöi kërac.”

²³ Ago Ruuth jɔ luui ke kɔc lui dom de Bowadh, abï agamɔ thök ë tëm kekë barli. Ku ŋoot ke rɛ̈ɛ̈r ke Nawomi, mamɔɔcde.