Ruuth 1 - JAM DE NHIALIC 2011

Elimelek Akuɛɛth Mowap kekë Baaide

¹ Ɣɔn thɛɛr, në akööl ɣɔn cieŋ ë bäny ke luk Yithriɛl, cɔŋdït aa nu. Ago raan dhiën ë Eparath cɔl Elimelek jäl Bethleɣem de Juda kekë tiiŋde, ku wɛ̈ɛ̈tke kaarou lek yök ke ke rɛ̈ɛ̈r piny ë Mowap.

² Tiiŋde acɔl Nawomi, ku wɛ̈ɛ̈tke acɔl keek Maɣlon kekë Kilion. Acïk bɛ̈n lɔ piny ë Mowap lek rëër ëtɛ̈ɛ̈n.

³ Na ɣɔn aa rëërkï ëtɛ̈ɛ̈n, ke Elimelek ë thou, ku dɔ̈ŋ Nawomi kekë wɛ̈ɛ̈tke kaarou.

⁴ Ago wɛ̈ɛ̈tke duet ke Mowap thiaak kaarou, Ruuth kekë Orpa. Na ɣɔn aa cïk runken aa thiëër piny ë Mowap,

⁵ ke Maɣlon ë thou ayadäŋ kekë Kilion. Go Nawomi jɔ döŋ yetök ke cïn moc, ku cïn wɛ̈ɛ̈tke.

Nawomi Apuk rɔt Bethleɣem kekë Ruuth

⁶ Na ɣɔn, aa ŋoot Nawomi ke rɛ̈ɛ̈r piny de Mowap, ke piŋ luɔi cïï Bɛ̈nydït kɔcke lɔ̈ɔ̈k loor, ka acïk nïïm dɛ këcam. Go Nawomi guik kekë diäär ke wɛ̈ɛ̈tke.

⁷ Gokï jäl ke ke puk kenïïm Juda.

⁸ Na wën, aa cïk lɔ kueer, ke lëk ë Nawomi diäär ke wɛ̈ɛ̈tke an, “Puɔ̈kkï wenïïm märkun, Bɛ̈nydït abï we looi apiɛth, cït man cä wek ɛn ŋiëc looi apiɛth wokë wɛ̈ɛ̈tkiën cï jɔ thou.

⁹ Bɛ̈nydït abï we lɔ gäm röör thiak week, ka wek bï nïïm dɛ bɛ̈ikun.” Na wën, aciim ë Nawomi kethook, ku put ke kueer, ke ke dhiau arëët në röldït.

¹⁰ Ku luelkï an, “Ei, wok bï lɔ në yïn ëtök të nu kɔckun.”

¹¹ Go Nawomi lɛ̈k keek an, “Puɔ̈kkï wenïïm mïthkï. Eeŋöduön bäk lɔ kɔɔr në yɛn? Acïn wɛ̈ɛ̈tkiën kɔ̈k bï we lɔ nööm, ku yɛn cïï duëër bɛ dhiëth.

¹² Ka week mïthkï, puɔ̈kkï röt märkun. Na yɛn, yɛn ë dhiɔp ka acïn monydiën bɛ kɔɔr. Na cakaa luɛɛl en aa bɛ dhiëth, ku lok ɣöt wo moc në ee wɛ̈ɛ̈rë manë yic, ku dhiëëth wɛ̈ɛ̈t kɔ̈k,

¹³ duɛ̈ɛ̈rkï ke tiit abïk kɔn dhuöök? Ee yen duɛ̈ɛ̈r wek röt jɔ kuum në ee runkë kedhie? Acie yen mïthkï. Bɛ̈nydït ë ya luöi kërac, ka yɛn ë piɔ̈u riääk arëët.”

¹⁴ Agokï bɛ dhiau arëët. Ku jɔ Orpa mamɔɔcde ciim thok, ku puk enɔm ciëën, ku cïï Ruuth gäm nɔn nyiëëŋ en mamɔɔcde piny.

¹⁵ Go Nawomi lɛ̈k Ruuth an, “Kɛ̈në tiiŋ mɔɔcdu tïŋ luɔi dhuny en enɔm kɔcken, ku yiëthken? Jäl we yen ëtök.”

Ruuth Adɔ̈ŋ ke Nawomi

¹⁶ Go Ruuth lɛ̈k Nawomi an, “Du ɛn ŋɛ̈k puŋ ë nɔm ë në, yɛn lɔ wo yïn alɔ të leer yïn thïn. Të bï yïn aa rëër, yen abän lɔ rëër. Kɔcku kek abï ya kɔckï, ku Nhialicdu yen abï ya Nhialicdï.

¹⁷ Ku të bï yïn thou, yen abän thou ayadäŋ, ku ee yen thiëkë ya thïn. Yɛn läŋ Bɛ̈nydït, bï ya luöi kërac të lan yïn nyääŋ piny, ke cie thuɔɔu yen pɛ̈ɛ̈k wook!”

¹⁸ Na wën, aa tïŋ ë Nawomi nɔn cïï Ruuth jäl taaŋ ë yenɔm, ke mim thok ku cïn kë be lueel.

¹⁹ Go Nawomi baaric kekë Ruuth, ɣetkï Bethleɣem. Na wën, aa ɣëëtkï Bethleɣem, ke kɔc ë ke mit piɔ̈ɔ̈th kedhie wut. Go diäär ke wut aa lop an, “Kënë ee Nawomi ë yic?”

²⁰ Go Nawomi lɛ̈k keek an, “Duökï ya ee bɛ cɔɔl an Nawomi, yak ɛn cɔɔl an Mara, në luɔi cïï Nhialic Awärjäŋ pïïrdï raac.

²¹ Yɛn aa jäl ɣɔn ke ya thiek, ku Bɛ̈nydït ë ya puk nɔm ënɔɔnë ke ya piɔl. Duëërë ya bɛ cɔl Nawomi adï? Ku yɛn cïï Nhialic Awärjäŋ kuöm riääk.”

²² Yen luɔi ë bïï ë Nawomi ciëën ka, kekë Ruuth, nyan ë Mowap, tiiŋ ë wënde. Ku ëtɛ̈ɛ̈n, yök tëm ë barli ajɔ rɔt gɔl Bethleɣem.