Romai 9 - JAM DE NHIALIC 2011

Nhialic ku Kɔcke

¹ Ee yic en luɛɛl në Kërthoyic, yɛn cïï lueth tör, ku jam cä yök ë yapiɔ̈u ee cäätɔ kekë yɛn ëtök ë Wëidït ɣer yiic an:

² Yɛn ë piɔ̈u jiɛth arëët ku ya coolë dhiau piɔ̈u acïn pëk.

³ Ku aduɛ̈ɛ̈r lueel ë yapiɔ̈u an, adï miɛt piɔ̈u tëë ya ye guöp dɛ aciɛɛn bï ya cieec ë Kërtho nɔm në baŋ de mïthëkɔckuɔ, kɔc rɛɛn wok në dhiënh ë dhiëëthë wook.

⁴ Ayek kɔc ke Yithriɛl, ku muŋ cï Nhialic ke muk ë dhuëëŋ ee këden, ayï lööŋ cï mac, ayï tɛ̈ɛ̈u cï löŋ tääu piny, ku luɔi de ka ke Nhialic, ku läm, ku ka cï kɔn lueel, an, bï ke gäm keek, ayek kaken,

⁵ kuarkuɔ ayek kaken, ayï Kërtho aya abɔ̈ në keek në dhiënh ë dhiëëthë ye, raan nu ë käŋ nïïm kedhie, ku ye Nhialic de guöp athiɛɛi athɛɛr. Amiin.

⁶ Ku akɛ̈n lueel, nɔn cïn en kë cïï wël ke Nhialic lëu, acie yen. Ku acïkï ee Yithriɛl nïïm kedhie, kek kɔc ke Yithriɛl,

⁷ ku acïkï ee mïth ke Abraɣam kedhie, ee luɔi ee Abraɣam kuɛɛrëden, ku aye lueel an, “Käudu abï kuɛɛn ë Yithaakic.”

⁸ Tharde kï an, mïth ke guöp acie keek ee mïth ke Nhialic, ee mïth ke ka cï kɔn lueel, keek aye ke tɔ ye käu.

⁹ Jam cï kɔn lueel kï an, “Ëlëruöön, acït piny ee kënë, ke yɛn bï bɛ̈n, ku Thara abï nɔm dɛ wënde.”

¹⁰ Ku acie kënë etök, Rebeka aya, të cï en acuek yök në mony tök, yen aye Yithaak wääda,

¹¹ ku të ŋootë mïthke ke ke kënë guɔ dhiëëth, ku acïn kë cïk looi ayï këpiɛth ayï kërac, luɔi bï löŋ cïï Nhialic lueel ë yepiɔ̈u në këde lɔ̈ny de kɔc, luɔi bï en tɔ̈u tëde, ku acie në këde kë cïï raan tök looi, ee jam ë Raan ë kɔc cɔɔl,

¹² ke jɔ lɛ̈k en an, “Mɛnh dït abï aa lïm de mɛnh koor.”

¹³ Acït man cï e gɔ̈ɔ̈r an, “Jakop acä nhiaar guöp, ku maan Ethau.”

¹⁴ Eeŋö buk jɔ lueel? De jam rɛɛc cath ke Nhialic? Ei, acie yen!

¹⁵ Ku acï lɛ̈k Mothe an, “Yɛn bï piɔ̈u kok wokë raan cä tak an, bä piɔ̈u kok wo yen, ku bä a piɔ̈u wɛ̈l raan cä tak an, bä yapiɔ̈u wɛ̈l en.”

¹⁶ Yen ka, acie jam de raan kɔɔr këdäŋ arëët, ku acie jam de raan lui arëët, ee jam de Nhialic, Raan cath kekë kokdepiɔ̈u.

¹⁷ Ku këcïgɔ̈ɔ̈r acï lɛ̈k melik an, “Yen këde ee kënë yen aa jat ɛn yïn nhial, ke ya bï riɛldï nyuɔɔth ë yïyic, ku bï rinkï aa lueel ë piny nɔm ëbɛ̈n.”

¹⁸ Yen tëde ka, ee piɔ̈u kok kekë raan nu ë yepiɔ̈u, ku raan cï tak an, bï tɔ ril nɔm, ke tɔ ril nɔm.

Agönh de Nhialic ku Kodepiɔ̈nde

¹⁹ Yïn bï a jɔ thiëëc an, “Eeŋö däŋ ŋoot en ke ye kɔc gɔ̈k? Eeŋa duëër en pɛ̈n këde piɔ̈nde?”

²⁰ Ku yïn ŋadï, yee ŋa raan bëër Nhialic thok? Kë cï cuëëc bï raan ë cuëc en yɔ̈ɔ̈k, Eeŋö ee yïn a looi aya?”

²¹ Ku cuëny ë töny, cïï cath ke riɛl bï en töny cuëëc kaarou në tiɔɔm töŋë, ee tööny tök këde dhuëëŋ, ku cïï tööny tök ee këde dhuëëŋ?

²² Ku na Nhialic, të de yen piɔ̈u luɔi bï en agönhde nyuɔɔth, ku tɔ riɛlde ŋic, eeŋö däŋ, acakaa yen ë cï töny ke agɔ̈th guum në liɛɛr dïït ë yenpiɔ̈u, kek töny cï röŋ në riääk bï ke riɔ̈ɔ̈k,

²³ ku bï dït ë dhuëëŋde nyuɔɔth në töny ke kokdepiɔ̈u, töny cï kɔn looi, bïk aa ka ke dhuëëŋ,

²⁴ ee wook gup, wok kɔc cï cɔɔl, acie Judai yic etök, ee Juööriic aya?

²⁵ Acït man cï e lueel në Ɣodhiya an: “Yɛn bï kɔc tɔ ye kɔckï, ‘kɔc ë cie kɔckï wään.’ Ku jur ë cä nhiaar wään, abä tɔ ye ‘kë nhiaar.’

²⁶ Ku tëman wään cï ke yɔ̈ɔ̈k thïn an, ‘We cie kɔckï,’ Yen ee tëmanë guöp yen abïï ke cɔɔl thïn an, Wek ee wɛ̈ɛ̈t ke Nhialic pïïr.”

²⁷ Ku Yithaya ee cööt në këde Yithriɛl an, “Na cak mïth ke Yithriɛl juëc acïtkï nɔn ë liɛɛt nu wɛ̈ɛ̈r yɔu, ee kɔc lik cï döŋ tei, kek abï kony wëi.

²⁸ Bɛ̈nydït abï luɔi cï teem acek thöl ë piny nɔm.”

²⁹ Ku acït man cïï Yithaya ye kɔn lueel an, “Tëë Bɛ̈nydïït de Rɛm ë kën wo nyäŋ käu, adï cuk ciët Thɔdom, ku adï cï wo tɔ cït Gomoora.”

Yithriɛl ku Wëlpiɛth

³⁰ Eeŋö buk jɔ lueel? An, Juöör, kɔc ë cïï piathëpiɔ̈u ee cop, acïk piathëpiɔ̈u yök, yen aye piathëpiɔ̈u bɔ̈ në gäm,

³¹ ku Yithriɛl, kɔc ë ye löŋ dɛ piathëpiɔ̈u cop, akënkï löŋ de piathëpiɔ̈u gïth.

³² Ee käŋö? Ee luɔi ë cïï kek en ee kɔɔr në gäm, aa yek kɔɔr në luɔi de löŋ. Aake kɔ̈th ë kuur ë kɔ̈th,

³³ acït man cï e gɔ̈ɔ̈r an, “Tiëŋkï, yɛn ë kuur ë kɔ̈th tuɛɛl ë Dhiɔnic, ku ye kuur dïït ee kɔc tɔ kɔ̈th arëët, Ku raan ëbɛ̈n raan gam en, acïï bï yäär.”