Romai 7 - JAM DE NHIALIC 2011

Nyooth në Thiëëk

¹ Kuöckï week ënɔɔnë, wek mïthëkɔckuɔ, (yɛn jam wokë kɔc ŋic löŋ), kuöckï nɔn cieŋë löŋ raan anande të pïïr en?

² Tiiŋ de nɔm monyde acïï löŋ mac ë monyde lɔ̈ɔ̈m anande të pïïr en, ku na thou monyde, ka ye luöny bei në löŋ de monyde.

³ Ku ënɔɔnë, të ŋootë monyde ke pïïr, ku be yë thiaak ë mony däŋ, ka bï tɔ ye tiiŋ cï lɔ kekë mony lei, ku na thou monyde, ka cï dɔ̈k yeth ee löŋë yic, ago cuö be yë tɔ ye tiiŋ cï lɔ kekë mony lei, acakaa yen ë be yë thiaak ë mony däŋ.

⁴ Ku week aya, wek mïthëkɔckuɔ, we cï tɔ thou tëde löŋ, në guöp de Kërtho, luɔi bï raan däŋ we thiaak, yen ee raan wään cï jɔt ë kɔc cï thou yiic, luɔi bï wok luɔk në këde Nhialic.

⁵ Ku të wään rëër wok ë ka ke guöpic, ke ŋɔ̈ɔ̈ŋ ee wok ŋɔ̈ŋ ë kërac, kë ë bɔ̈ në löŋ, aaye luɔide looi ë ka ke wogup, bïk luɔk në këde thuɔɔu.

⁶ Ku ënɔɔnë, wo cï luöny bei ë löŋ cin, kë wään cï wo mac thïn ë guɔ thou, luɔi bï wok käŋ aa looi në wëi cuk piac yök, ku cuku käŋ ee looi në kathɛɛr cï gɔ̈ɔ̈r ë löŋic.

Löŋ ku Kërac

⁷ Eeŋö buk jɔ lueel? Ee kërac en löŋ? Ei! Acie yen. Ku adï cä kërac jɔ kuc, tëë löŋ liu, ku adï cä ŋɔ̈ɔ̈ŋ de kërac kuc, tëë kënë löŋ lueel an, “Du kalei ee woi ë yïpiɔ̈u.”

⁸ Ku të cï en kööldɛn piɛth jɔ yök, në cöök de löŋ cï yiɛ̈n wook, ke jɔ wui de kalei ëbɛ̈n tɔ lɔ ë yapiɔ̈u, ku të liiuwë löŋ, kërac ee thou.

⁹ Ku yɛn, yɛn ee pïïr wään liiuwë löŋ, ku të cï cöök de löŋ bɛ̈n, ke kërac ee bɛ pïïr, aguɔ thou yɛn,

¹⁰ guɔ cöök de löŋ cï yiɛ̈n kɔc në këde pïïr, guɔ yök aye këde thuɔɔu.

¹¹ Kërac acï kööldɛn piɛth jɔ yök në cöök de löŋ, go ya math, ago ya nɔ̈k ë ye.

¹² Yen tëde ka, löŋ aɣeric ë yic, ku cöök de löŋ aɣeric, ku diik, ku piɛth.

¹³ Ënɔɔnë, cï këpiɛth rɔt guɔ puk aye thuɔɔu tëde yɛn? Ei! Acie yen. Ee kërac, luɔi bï en guɔ tïc nɔn ee yen kërac guöp, yen aa luui ɛn thuɔɔu në këpiɛth, ke kërac bï jɔ rac ëtaiwei në löŋ.

Teer nu ë Wo Yiic

¹⁴ Löŋ aŋicku nɔn ee yen këde wëi, ku yɛn ee raan ë piny tei, yɛn cï ɣaac ka yɛn cï aa lïm de kërac.

¹⁵ Ku kë ya looi ënɔɔnë, acä gam nɔn ee yen luɔidï, ku kë nu ë yapiɔ̈u an, bä ya looi, acä ye looi, ee kë maan, yen aya looi.

¹⁶ Ku ënɔɔnë, të luɔi ɛn kë liu ë yapiɔ̈u, yɛn gam löŋ nɔn ee yen piɛth.

¹⁷ Yen acïï bï bɛ a yɛn ee ye looi, ee kërɛɛc rɛ̈ɛ̈r ë yayic, yen aye ye looi.

¹⁸ Ku aŋiɛc nɔn cïn en këpiɛth töŋ rɛ̈ɛ̈r ë yayic, (ee guöpdïyic en luɛɛl) ku piɔ̈n duɛ̈ɛ̈r ɛn käŋ looi acath ke yɛn, ku kë bän këpiɛth looi, abä thöl, akɛ̈n guɔ yök.

¹⁹ Ku këpiɛth nu ë yapiɔ̈u an, bä ya looi, acä ye looi, ku kërɛɛc liu ë yapiɔ̈u, yen aya looi.

²⁰ Ku na ya kë liu ë yapiɔ̈u looi, ka cïï be aa yɛn ë ye looi, ee kërɛɛc rɛ̈ɛ̈r ë yayic, yen aye ye looi.

²¹ Yɛn ë löŋ däŋ yök ënɔɔnë an: Kööl dɛ yɛn piɔ̈u luɔi luɔɔi ɛn këpiɛth, ke kërac tɔ̈u kekë yɛn.

²² Yɛn mit piɔ̈u wokë löŋ de Nhialic ë yayic thïn,

²³ ku yɛn ë löŋ däŋ yök ë ka ke yɛnguöp yiic, löŋ de ater kekë löŋ de yanɔm, löŋ ë yɛn thel cït man ë raan cï peec abï ya tɔ ye lïm de löŋ de kërac, löŋ nu ë ka ke yɛnguöp yiic.

²⁴ Amawoou yɛn kuany nyin oou! Eeŋa bï a luäk bei në guöp cath ke thuɔɔuwëyic?

²⁵ Yɛn lec Nhialic Yecu Kërtho Bɛ̈nydïïtda. Yen ka, yɛn guöp, yɛn wokë nɔmdï, yɛn ee ka ke löŋ de Nhialic looi, ku wokë guöpdï, yɛn ee ka ke löŋ de kërac looi.