Romai 6 - JAM DE NHIALIC 2011

Wok cï Thou në Kërac ku Pïïrku në Kërtho Yic

¹ Eeŋö däŋ buk lueel? Buk aa cool ë giit kërac ë luɔi, ke dhuëëŋdepiɔ̈u bï rɔt ŋuak?

² Acie yen! Wok kɔc cï thou tëde kërac, buk ŋoot ë wo pïïr thïn adï?

³ Kuöckï ee kënë an, wok wodhie, wok kɔc cï baptith në këde Kërtho Yecu, ke wok cï baptith në këde thon cï en thou.

⁴ Yen ka, wok cï tɔ̈ɔ̈u në yen ëtök ë thuɔɔuwic në baptith cï wo baptith, luɔi bï wok tɔ̈u ë pïïr ë piɛcku yökic aya, cït man ë jön cï Kërtho jat nhial ë kɔc cï thou yiic në dhuëëŋ de Wun.

⁵ Ku të cï wo mat në yen ëtök në täu de thonde, ke wo bï mat në yen ëtök në täu de jön cï en rɔt jɔt aya.

⁶ Aŋicku nɔn cï raandan thɛɛr piäät ë tim cï rïïu nɔm kɔ̈u kekë yen ëtök, ke guöp de kërac bï riääk, agoku cuö be aa lïïm ke kërac,

⁷ Raan cï thou acï wɛ̈ɛ̈n bei ë këracic.

⁸ Ku ënɔɔnë, të cï wok thou në Kërtho ëtök, ke wok gam nɔn bï wok pïïr në yen ëtök.

⁹ Aŋicku nɔn cïï Kërtho bï bɛ thou, luɔi cï e guɔ jat nhial ë kɔc cï thou yiic, thuɔɔu acïï ye be aa cieŋ.

¹⁰ Ku thon cï en thou, ee tëde kërac en ë thou en raantök, ku pïïr pïïr en, ee tëde Nhialic en a pïïr en.

¹¹ Ayï week ayadäŋ, yak röt tɔ ye kɔc cï thou ëdhöc tëde kërac, ku takï röt ë kɔc pïïr tëde Nhialic në Kërtho Yecu Bɛ̈nydïïtda.

¹² Yen duö wek kërac tɔ ceŋ piny ë wegup, gup de yiic thuɔɔu, abäk ŋɔ̈ɔ̈ŋ ee kɔɔr aa gam.

¹³ Ayï ka ke wegup duökï ke gëm kërac, abïk aa ka ke racdepiɔ̈u bï kërac aa looi, yak röt gäm Nhialic cït man ë kɔc cï bɛ pïïr ë kɔc cï thou yiic, ku yak Nhialic gäm ka ke wegup abïk aa ka ke piathëpiɔ̈u.

¹⁴ Kërac acïï we bï aa cieŋ, luɔi cä wek ee tɔ̈u ë löŋic, wek ee tɔ̈u ë dhuëëŋdepiɔ̈uwic.

Lïïm ke Piathëpiɔ̈u

¹⁵ Eeŋö däŋ? Buk kërac aa looi nɔn liiu wok ë löŋic, ku nɔn tɔ̈u wok ë dhuëëŋdepiɔ̈uwic? Acie yen!

¹⁶ Kuöckï week an, raan cä wek röt tɔ ye lïïmke, abäk ka ke yen aa looi, yen aya wek lïïmke, yen raan aa wek ka ke looi, nɔn ee yen kërɛɛc ee thuɔɔu bɛ̈ɛ̈i, ku nɔn ee yen pïŋ aa wek ka ke Nhialic piŋ, yen aye piathëpiɔ̈u bɛ̈ɛ̈i?

¹⁷ Ku thieithieei Nhialic, wään thɛɛr wek aaye lïïm ke kërac, ku we cï täu de wëët cï yiɛ̈n week aa gam ë wepiɔ̈ɔ̈th ënɔɔnë.

¹⁸ Ku ënɔn cï we luöny bei ë kërac cin, ke wek cï jɔ aa lïïm ke piathëpiɔ̈u.

¹⁹ Yɛn jam cït man ë raan tei, në baŋ de kɔ̈c de guöpdun. Acït man cä wek ka ke wegup gäm cuɔlëpiɔ̈u abïk aa lïïmke, ku acäk ke gäm reecëlöŋ bïk löŋ aa rɛɛc, yen abï ciët gäm duɛ̈ɛ̈r wek ka ke wegup gäm piathëpiɔ̈u ënɔɔnë, abïk aa lïïmke, ke bï ɣɛɛrëpiɔ̈u bɛ̈ɛ̈i.

²⁰ Wään aa wek lïïm ke kërac, ke we ye luöny bei ë piathëpiɔ̈u cin.

²¹ Ee luɔk cït ŋö cäk guɔ yök wään ë kake yiic, ka ya wek gup yäär ë keek ënɔɔnë? Ee thuɔɔu yen ë thök bï kake thök.

²² Ku ënɔɔnë, nɔn cï we luöny bei ë kërac cin, aguɔkï aa lïïm ke Nhialic, ke we de kakuön cï luɔk ënɔɔnë ka ke ɣɛɛrëpiɔ̈u, ku thök bï en thök ee pïïr athɛɛr.

²³ Ariöp de kërac yen aye thuɔɔu, ku miɔ̈c de Nhialic yen aye pïïr athɛɛr në Bɛ̈nydan Yecu Kërtho.