Romai 5 - JAM DE NHIALIC 2011

Mät në Nhialic

¹ Ku ënɔɔnë, nɔn cï wo tɔ piɛthpiɔ̈ɔ̈th në gäm, wok cï mat ë Nhialic në Bɛ̈nydan Yecu Kërtho.

² Raan cï wo liëp kueer le wook ë dhuëëŋic dhuëëŋ tɔ̈u wok thïn ënɔɔnë, në gäm cï wok gam, agoku piɔ̈ɔ̈th miɛt në ŋäth ŋɛ̈ɛ̈th wok dhuëëŋ de Nhialic.

³ Ku acie yen etök, wok lec röt në karil dhal wook ayadäŋ, në ŋïny ŋic wok en an, karil dhal wook, yen aye guömdekäŋ bɛ̈ɛ̈i,

⁴ ku guömdekäŋ ee raan tɔ gïu, ku gïu cï raan gïu yen aye aŋäth bɛ̈ɛ̈i,

⁵ ku aŋäth acïï raan ë tɔ yäär, luɔi cï nhiëër ë Nhialic luööŋ ë wopiɔ̈ɔ̈th në Wëidït ɣer cï gäm wook.

⁶ Ku të wään ŋoot wok ke wok cïn riɛl, ke Kërtho ë jɔ thou ëkööldɛn piɛth në biäk de kɔc kuc Nhialic riëëu.

⁷ Ku raan acïï thuɔɔu duëër dap gam, ciɛk an, ee baŋ de raan piɛthpiɔ̈u, ku abï yiɛ̈n dɛ kɔc töktöök kɔc duëër röt kuɔn thuɔɔu në biäk de raan piɛthpiɔ̈u.

⁸ Ku Nhialic ë nhiëërde nyuɔɔth, nhiëër nhiɛɛr en wook, në thon cï Yecu Kërtho thou në biäkda, ku ŋootku ë wo ye kɔc ë kërac looi.

⁹ Ku ënɔɔnë, nɔn cï wo guɔ tɔ piɛthpiɔ̈ɔ̈th në riɛmde, ke kuny bï en wo kony në agɔ̈th yen apiɔl awär ee kënë arëët.

¹⁰ Të cï wo määt në Nhialic në thon cï Wënde thou, ke wo ŋoot ë wo ye kɔc de ater, na ënɔɔnë, nɔn cï wo guɔ määt, ke kuny bï ë wo kony në pïïr pïïr en, yen apiɔl awär ee kënë arëët.

¹¹ Ku acie yen etök, wok mit piɔ̈ɔ̈th ayadäŋ ë Nhialicic në Bɛ̈nydan Yecu Kërtho, raan ë yök wok mät në yen.

Adam ku Kërtho

¹² Yen tëde ka, kërac aa bɔ̈ ë piny nɔm në raan tök, ku bɔ̈ thuɔɔu ë kërac cök, go thuɔɔu jɔ lööny ë kɔc gup kedhie, luɔi cï kɔc käŋ wööc kedhie.

¹³ Ku të ɣɔn ŋootë löŋ ke liu, kërac aa nu ë piny nɔm, ku kërac acie tääu ë kɔc yiëth të cïn en löŋ.

¹⁴ Ku thuɔɔu yen aa ceŋ piny tei, gɔl të ɣɔn nu Adam ɣeet ë Mothe, aa ceŋ kɔc acakaa kɔc kën kërac wööc cït man ë kërɛɛc ë looi Adam, yen acït raan cï lueel an, bï bɛ̈n.

¹⁵ Ku miɔc youyou acïï cït wäc cï raan wööc. Ku na cï kɔc juëc thou në wäc cïï raan tök wööc, ke dhuëëŋ de Nhialic ku miɔ̈c bɔ̈ në dhuëëŋ, dhuëëŋ bïïyë raan tök, Yecu Kërtho, ka cïk röt ŋuak arëët tëde kɔc juëc.

¹⁶ Ku miɔ̈c aya, acïï cït luɔi de raan töŋ cï kërac looi. Löŋ cï guiir ë kɔc yiëk yiëth gääk në baŋ de raan tök, ku miɔ̈c youyou ee kɔc tɔ piɛth piɔ̈ɔ̈th në kajuëc cïk wööc.

¹⁷ Ku na cï thuɔɔu piny cieŋ në baŋ de raan tök, në wäc cï raan tök këdäŋ wööc, awär kënë arëët, kɔc yök dït de dhuëëŋdepiɔ̈u ku yeke miɔɔc në piathëpiɔ̈u, kek abï piny cieŋ në pïïr në baŋ de raan tök, Yecu Kërtho.

¹⁸ Yen tëde ka, acït man cï löŋ de kɔc guiir kedhie, në baŋ de göc de raan tök, ago kɔc yiëk yiëth gääk kedhie, yen acït yöŋ cï kɔc piathëpiɔ̈u yök kedhie në baŋ de luɔi piɛth de raan tök, ke ke bï pïïr.

¹⁹ Acït man cï kɔc juëc tɔ ye kɔc ë käŋ wööc në dhäŋ cï raan tök löŋ dhɔ̈ŋic, yen acït luɔi bï kɔc juëc tɔ piɛthpiɔ̈ɔ̈th në pïŋ cï raan tök käŋ piŋ.

²⁰ Ku löŋ aa bɔ̈ thïn, ë luɔi bï awäc rɔt ŋuak awäny wɛ̈ɛ̈cë kɔc käŋ, ku të cï kërac rɔt ŋuak, ke dhuëëŋdepiɔ̈u ë ŋuak rɔt arëët awär kërac,

²¹ luɔi bï dhuëëŋdepiɔ̈u piny cieŋ ayadäŋ në piathëpiɔ̈u aɣet pïïr athɛɛr në Yecu Kërtho Bɛ̈nydïïtda, cït man cï ciɛɛŋ cieŋë kërac piny aɣet thuɔɔu.