Romai 4 - JAM DE NHIALIC 2011

Kääŋ de Abraɣam

¹ Eeŋö buk jɔ lueel në këde Abraɣam wääda në dhiëth, kë cï yök?

² Ku të cï Abraɣam tɔ piɛthpiɔ̈u në luɔidɛn cï looi, ka cath kekë kë duëër en rɔt leec, ku acïï rɔt duëër leec ë Nhialic nɔm.

³ Këcïgɔ̈ɔ̈r ë lueel adï? An, “Abraɣam ë Nhialic gam, ago tɔ ye piathëpiɔ̈u tëde yen.”

⁴ Ku ënɔɔnë, raan ë käŋ looi, ke de kë bï yök thïn, acie tɔ ye këde dhuëëŋ, aye tɔ ye ariöp.

⁵ Ku raan cie luui, ku aye raan gäm, Raan ë kɔc racpiɔ̈ɔ̈th tɔ piɛthpiɔ̈ɔ̈th, gäm gɛ̈m en acï tɔ ye piathëpiɔ̈u.

⁶ Acït man lueelë Debid athiɛɛi de raan cïï Nhialic tɔ piɛthpiɔ̈u, ke liiuwë luɔi thïn an:

⁷ “Thieithieei në kɔc cï päl karɛcken, Kɔc cïï kakɛn cïk wööc kum.

⁸ Thieithieei në raan cïï Bɛ̈nydït bï yiëk yeth kërac.”

⁹ Bɔ̈ athiɛɛiyë ënɔɔnë ë kɔc cï cueel gup kapäc, ku bɔ̈ ë kɔc kënë cueel gup aya? Luɔi cï wok e lueel an, “Abraɣam ë Nhialic gam, ku në biäk de gämde go tɔ ye piathëpiɔ̈u tëde yen.”

¹⁰ Ë tɔ ye piathëpiɔ̈u adï? Ɣɔn cï ë cueel, ku ye ɣɔn kënë ye cueel? Acie ɣɔn cï cueel, ee ɣɔn kënë ye cueel.

¹¹ Ago cuɛ̈l nööm, bï aa ŋïny bï ye ŋic, ku bï aa bɔ̈t de piathëpiɔ̈u cï yök në gäm, piathëpiɔ̈u ɣɔn cath kekë yen ɣɔn ŋoot en ke kënë cueel. Ago aa wun kɔc gäm kedhie, acakaa të kënë ke cueel, ke piathëpiɔ̈u bï tɔ ye këden ayadäŋ.

¹² Ku cï aa wun cuɛ̈l tëde kɔc, acie kɔc cï cueel kapäc, ee kɔc ee wäärdan Abraɣam kuany cök ë gäm aya, gäm wään cath kekë yen të ŋoot en ke kënë cueel.

Gutguut ë Nhialic aye Yök në Gäm

¹³ Luɛl cï ye kɔn lueel, an, bï aa raan bï piny lɔ̈ɔ̈k lak, aacï bɔ̈ tëde Abraɣam ayï käude në löŋ, aa bɔ̈ në piathëpiɔ̈u cï yök në gäm.

¹⁴ Ku tëë ye kɔc ke löŋ kek bï piny lɔ̈ɔ̈k lak, ke gäm adï bï aa ɣɔ̈ric, ku kë cï kɔn lueel adï bï aa kë cïn naamde.

¹⁵ Ee löŋ yen ë agɔ̈th bɛ̈ɛ̈i, ku të cïn löŋ, ke wäc ë kɔc wööc aliu.

¹⁶ Yen abï yen në gäm, ke bï aa këde dhuëëŋ, ago kë cï kɔn lueel, ago dhil aa këde käude ëbɛ̈n, acie këde kɔc nu ë löŋic, ee këde kɔc nu ë gämic aya, gäm de Abraɣam, yen aye wäärda wook wodhie,

¹⁷ acït man cï e gɔ̈ɔ̈r, an, “Yïn cä tɔ ye wun juöör juëc.” Aye wäärda ë Nhialic nɔm, Raan cï gam, Raan ë kɔc cï thou tɔ pïïr, ku ye Raan ë ka liu tɔ cït ka nu.

¹⁸ Yen Abraɣam, raan wään cï gam në aŋäth ŋɛ̈ɛ̈th, ku kë ë ŋɛ̈ɛ̈th aliu, luɔi bï en aa wun juöör juëc, acït man ë kë cï lueel an, “Käudu, abïk juëc cï kuɛl.”

¹⁹ Ku luɔi cïï en ee raan koor ë gäm, yen akën en e lueel në këde yenguöp an, ë thɔ̈l thou ënɔɔnë, të cï runke ciët nɔn ë bɔt, ayï tɛɛm cï Thara tɛɛm, akën tak aya.

²⁰ Ku kë cï Nhialic kɔn lueel akën piɔ̈u ŋït ë ye në dak de gäm, acï gam ë gäm ril, go Nhialic lɛc nɔm.

²¹ Acï gam ëdhöc an, kë cï kɔn lueel, en Nhialic, abï lëu në luɔi.

²² Yen aa tɔ ye piathëpiɔ̈u tëde yen aya.

²³ Ku akënë gɔ̈ɔ̈r në biäk de yen etök, nɔn cï e tɔ ye këde.

²⁴ Ee biäk de wook aya, ku abï tɔ ye piathëpiɔ̈u tëde wook aya, të gɛm wok Raan cï Yecu Bɛ̈nydïïtda jat nhial ë kɔc cï thou yiic,

²⁵ yen Yecu, raan cï rɔt gäm thuɔɔu në këde awäny cuk wööc, ku be yë jat nhial ke bï wo tɔ piɛthpiɔ̈ɔ̈th.