Romai 2 - JAM DE NHIALIC 2011

Jäny de Nhialic

¹ Yen ënɔɔnë, yïn ŋadï, yïn raan jäny raan däŋ, yïn cïn të bï yïn rɔt kɔ̈c, jäny jiëëny yïn raan däŋ, yen a jiëëny yïn rɔt, yïn raan jäny raan däŋ, yïn ee käŋ looi kamankë gup.

² Ku aŋicku jäny ee Nhialic kɔc jɔ̈ɔ̈ny, kɔc ë ka cït ee kakë looi, nɔn ee yen jäny yic.

³ Ku yïn ŋadï, yïn raan ee kɔc jɔ̈ɔ̈ny, kɔc ë ka cït ee kakë looi, ku ye kamankë looi gup, ye lueel ë yïpiɔ̈u, an, bä poth ë jäny bï Nhialic yï jɔ̈ɔ̈ny?

⁴ Ku cï dhuëëŋ de yepiɔ̈u guɔ biɔɔn dhuëëŋ gök, ayï dït ë liɛɛr ë yenpiɔ̈u, ku guöm guum en kajuëc, ku kuc dhuëëŋ de Nhialic piɔ̈u nɔn thel en yïn tëde puŋ bï yïn yïpiɔ̈u puk?

⁵ Ku yïn, në riɛl ril yïn piɔ̈u, ku në luɔi reec yïn puŋ de yïn piɔ̈u, yïn ë rɔt kuɛ̈t agönhdïït ɣet ë kööl ë agɔ̈th, akööl ë nyuöth bï löŋ piɛth cï Nhialic guiir rɔt nyuɔɔth.

⁶ Ago raan ëbɛ̈n gäm këde, kë bï röŋ ke luɔidɛn cï looi.

⁷ Kɔc kɔɔr dhuëëŋ ku riëëu ku luɔi cïï kek bï dhiap, kɔc ë këpiɛth looi në liɛɛr ë kepiɔ̈ɔ̈th, kek abï gäm pïïr thɛɛr.

⁸ Ku kɔc ë wël tɛɛr, kɔc reec yic gam, ku gamkï kërac, kek abï diu de Nhialic piɔ̈u yök kekë agɔ̈th.

⁹ Ku yökkï këtuc bï keek dhal ku acɔ̈t bï kek nïïm acɔ̈t, raan ëbɛ̈n raan ë kërac looi, gɔl ë Judai, mɛt Girikii thïn aya.

¹⁰ Ku dhuëëŋ ku riëëu ku mät, kek abï tɔ̈u në raan ë këpiɛth looi, gɔl ë Judai, mɛ̈t Girikii thïn aya.

¹¹ Kuëny ee kɔc kuany yiic aliu tëde Nhialic.

¹² Kɔc kedhie kɔc ë kërac looi ku liu löŋ tëde keek, kek abï määr ke cïn löŋ, ku kɔc kedhie kɔc ë kërac looi, ku nu löŋ tëde keek, kek abï jɔ̈ɔ̈ny në löŋ.

¹³ Ku acie kɔc piŋ löŋ tei, kek ee kɔc piɛthpiɔ̈ɔ̈th tëde Nhialic, ee kɔc ë löŋ looi, kek abï tɔ ye kɔc piɛthpiɔ̈ɔ̈th.

¹⁴ Ku Juöör, kɔc cïn löŋ cath ke keek, të cï kek ka nu ë löŋic looi, në ciɛɛŋ ë ciɛkë keek, keek gup, ciɛk an, cïn löŋ ŋickï, ke löŋ anu ë kepiɔ̈ɔ̈th.

¹⁵ Anyoothkï luɔi de löŋ nɔn cï e gɔ̈ɔ̈r ë kepiɔ̈ɔ̈th, ku ŋïny de kepiɔ̈ɔ̈th ee rɔ̈m kekë löŋ aya, agokï löŋ guiir ë kepiɔ̈ɔ̈th kapäc, go raan rɔt gaany, ku nɔn de en të bï en rɔt kony, go rɔt kony.

¹⁶ Kööl bï Nhialic ka cïï kɔc moony jɔ̈ɔ̈ny në Yecu Kërtho, në këde wëlkiën piɛth.

Judai ku Löŋ

¹⁷ Tïŋ, yïn cɔl Judai, ku rɛ̈ɛ̈rë ë löŋic, ku lec rɔt në Nhialic,

¹⁸ ku yïn ŋic kë nu ë yepiɔ̈u, ku mitëpiɔ̈u wekë kapiɛth aläldïïtë, ku cï wëët në këde löŋ,

¹⁹ ku yïn ë rɔt ŋɔ̈ɔ̈th nɔn ee yïn raan ee cɔɔr thel, ku ye many ee kɔc nu tëcol riaau,

²⁰ ku nɔn ee yïn raan ee kɔc piɔlpiɔ̈ɔ̈th wɛ̈ɛ̈t, raan ë mɛnhiinakäŋ wɛ̈ɛ̈t, luɔi yïn täu de ŋïnydekäŋ kekë yic ë löŋic,

²¹ na yïn ënɔɔnë, yïn ë raan däŋ wɛ̈ɛ̈t, cïï rɔt ë wɛ̈ɛ̈t ayadäŋ? Yïn ee kɔc yɔ̈ɔ̈k an, “Duökï ë kual”, ku yïn guöp, ye kual?

²² Yïn raan ee kɔc yɔ̈ɔ̈k an, “Duökï ë lɔ në diëër lei”, ye lɔ we diëër lei yïn? Yïn raan ë yiëth maan, ye luëk ke Nhialic tɔ nhiany yïn?

²³ Yïn raan ë rɔt leec në löŋ, ye Nhialic tɔ bui, yïn, në wäc ee yïn löŋ wööcic?

²⁴ Rin ke Nhialic aye ke läät ë Juööriic në baŋdun, acït man cï e gɔ̈ɔ̈r.

²⁵ Cuɛ̈l ee këpiɛth ë yic, të döt yïn löŋ apiɛth, ku të ee yïn raan ë löŋ wööcic, ke cuɛ̈ldu acï tɔ ye ciën cuɛ̈l.

²⁶ Ku raan kënë cueel, të cï en löŋ tiiŋic, ke ciën cuɛ̈lde cïï bï tɔ ye cuɛ̈l?

²⁷ Ku raan kënë cueel, në caŋ ë dhiëëthë ye, të cï en löŋ aa tiiŋic, cïï yï bï jɔ̈ɔ̈ny, yïn raan ë löŋ wööcic, acakaa yïn ëye raan cath we jam cï gɔ̈ɔ̈r ayï cuɛ̈l?

²⁸ Raan acie Judai nɔm, tën ee yen Judai ë biäk biic tei, ayï cuɛ̈l, acie kë ye tïc ë biäk ë raan guöp tei.

²⁹ Raan ee ya Judai nɔm, tën ee yen Judai ë ye yäc thïn, ku cuɛ̈l ee këde raan piɔ̈u, ee këde wëi, acie këde jam tei. Lɛcde acïï bɔ̈ tëde kɔc, abɔ̈ tëde Nhialic.