Romai 12 - JAM DE NHIALIC 2011

Pïïr në Luɔi ë Nhialicic

¹ Yen aa läŋ ɛn week, mïthëkɔckuɔ, në kok ë Nhialic piɔ̈u an, Gamkï gupkun abïk aa kë cï lam kë pïïr, kë ɣeric, kë mit ë Nhialic piɔ̈u, gämduön piɛth kï.

² Ku duökï täu de pinyë nɔm ënɔɔnë ee dɔmic, jakï röt puk në luɔi ë piɛcë we looi nïïm, ke we bï këde piɔ̈n ë Nhialic aa them nɔn yïn en dï, piɔ̈n piɛthë, ku mit, ku cï dikëdik.

³ Ku ënɔɔnë, në dhuëëŋdepiɔ̈u cï gäm ɛn, yen a lɛ̈k raan ëbɛ̈n në weyiic an, ë cïn raan ee rɔt tɔ dït ë dït cïï röŋ ke ye, yak röt tɔ nu ë kaamic, acït man cï Nhialic kɔc tɛ̈k gäm raan ëbɛ̈n.

⁴ Ku acït man de raan kajuëc ë yeguöp, ku ye guöp töŋë, ku luɔi de ka ke guöp ëbɛ̈n acïkï ee kït,

⁵ ayï wook ayadäŋ, wok juëc, ku yok guöp tök ë Kërthoyic, ku wook wodhie wok raan ë röt wapäc.

⁶ Ku ënɔɔnë, luɔi ciɛth wok në ka cï gäm wook ka kith yiic bïk röŋ në luɔi de dhuëëŋ cï gäm wook, nɔn ee yen cäär ee wok cɔ̈ɔ̈r, yok cɔ̈ɔ̈r ë cɔ̈ɔ̈r ee röŋ ke gämda,

⁷ ku nɔn ee yen luɔi ee wok kɔc luööi, yok këda looi apiɛth, ku raan ee wëët, ë ye wëët apiɛth,

⁸ ku raan ë kɔc guiëër wël, ë ye kɔc guiëër apiɛth, raan ë miööc, ë ye miööc ë piɔ̈n tök, raan nu ë kɔc nïïm, ë ye këde looi ke lëth guöp, raan ë piɔ̈u kok, ë ye luui ë piɔ̈n mit.

⁹ Takkï nhiëër nu, nhiëër cïnic ruëëny. Yak kërac maan ëtaiwei, ku yak këpiɛth dɔm ë döm ril.

¹⁰ Yak röt nhiaar në nhiëër ë mïth ke raan tök, ë ŋɛk e ŋɛk riëëu awär riëëu riëëu en rɔt.

¹¹ Ë cïn raan ë rɔt dak ë luɔide, yak yiic lëth në Wëidït, yak ka ke Bɛ̈nydït looi.

¹² Yak piɔ̈ɔ̈th miɛt ë aŋäth ŋäthkï, yak këril dhal week guum, yak lɔ̈ŋ cök ë giët wek en.

¹³ Yak kakun tek në kɔc ɣerpiɔ̈ɔ̈th, të de yen kë dak keek, yak kamaan ŋic arëët.

¹⁴ Yak kɔc yɔŋ week thieei, yak ke thieei, duökï ke lɛ̈m aciɛɛn.

¹⁵ Yak piɔ̈ɔ̈th miɛt ëtök në kɔc mit piɔ̈ɔ̈th, yak dhiau ëtök në kɔc dhiau.

¹⁶ Takï piɔ̈ndun e tök. Duökï wepiɔ̈ɔ̈th ë tuöm ka ke bäny, yak rëër apiɛth në kɔc cïn naamden. Duökï röt ë leec an, pɛlkï nïïm.

¹⁷ Duökï kërɛɛc ee raan luöi week ee cool ë kërac anandun. Thɛmkï nɔn bä wek këpiɛth aa looi ë kɔc nïïm kedhie.

¹⁸ Të lɛ̈u wek rëër ëmääth në kɔc kedhie, ke we them rëër bä wek rëër.

¹⁹ Duökï röt ë guöör, wek kɔc nhiaar, yak agɔ̈th pät kueer, luɔi cï e gɔ̈ɔ̈r an, “Guur ee këdï, abä cool ë Yɛn, jam de Bɛ̈nydït ka.”

²⁰ Yen tëde ka, cït man cï këcïgɔ̈ɔ̈r ye lueel an, “Na näk cɔk raan man yïn, ke tɔ cäm, na näk rou en, ke tɔ dëk, luɔi loi wuya, yen abï yïn en tɔ gɔ̈k rɔt e tök.”

²¹ Duökï röt e tɔ tiɛɛm kërac, yak kërac tiaam në piath.