Romai 11 - JAM DE NHIALIC 2011

Kokdepiɔ̈n ë Nhialic në Yithriɛl

¹ Guɔ jɔ thiëëc an, Cï Nhialic kɔcke cuat wei? Ei! Acie yen! Yɛn aya, yɛn ee raan ë Yithriɛl, në käu de Abraɣam, në dhiën ë Benjamin.

² Nhialic akën kɔcke cuat wei, kɔckɛn cï kɔn lɔc. Kuöckï kë cï këcïgɔ̈ɔ̈r lueel në këde? Läŋ cï Elija Nhialic lɔ̈ŋ në këde Yithriɛl an:

³ “Bɛ̈nydït, acïk tïtku nɔ̈k, ku acïk yïkkuön ke läm thuöör piny, adɔ̈ŋ ɛn a tök, ku akɔɔrkï näŋ nɛ̈k kek ɛn.”

⁴ Ku bëër bëërë Nhialic en ë luel ŋö? “An, Yɛn ë rɔt bɔ̈th aguum kadhorou de röör kɔc kën kemiɔl tuk ë Baal nɔm.”

⁵ Ku yen ënɔɔnë aya, ade biäk ë kɔc lik cï döŋ anu në kë cï lɔc në dhuëëŋdepiɔ̈u.

⁶ Ku të ee yen këde dhuëëŋdepiɔ̈u, ka cïï be ya këde luɔi, tën ee yen en, ke dhuëëŋdepiɔ̈u acïï be ya dhuëëŋdepiɔ̈u, ku të ee yen këde luɔi, ka cïï be ya këde dhuëëŋdepiɔ̈u, tën ee yen en, ke luɔi acïï be ya luɔi.

⁷ Jɔ aa ŋö? Yithriɛl akën kë kɔɔr yök, ku biäk cï lɔc, yen acï yök, ku kɔc kɔ̈k acï ke tɔ ril nïïm,

⁸ Acït man cï e gɔ̈ɔ̈r an, “Acï Nhialic ke gäm piɔ̈n ë nïn, ku gëm keek nyïïn cïï daai, ku yïth cïï käŋ ee piŋ, aɣet cï ee köölë.”

⁹ Go Debid lueel an, “Tɔ pamdɛn ë cäm ee wïn ëdɛ̈p, ku ye kë bï keek aa dɔm, Ayï kë bï keek tɔ kɔ̈th, ayï këdɛn tuc bïk yök!

¹⁰ Tɔ ke lɔ nyïïn durdur, ke ke cïï bï daai, Ku tɔ ke tot kekɔ̈ɔ̈th ananden.”

¹¹ Aguɔ jɔ thiëëc an: ë ke kɔ̈th abïk wïïk? Acie yen! Ku kɔ̈th cï kek kɔ̈th, yen a yökë Juöör kunydewëi, ke Yithriɛl bï ë tiɛɛl dɔm.

¹² Ku ënɔɔnë, kɔ̈th kɔ̈th kek, të cï en aa kuɛth cï piny tɔ kueth nɔm, ku kuur koor kek, të cï en aa kuɛth cï Juöör tɔ kueth, na piathden, bï kënë wöör ë wär ŋö?

Kunydewëi ë Juöör

¹³ Yɛn jam wo week, wek Juöör, ku luɔi aa yɛn tuny ë Juöör, yen alɛɛc ɛn luɔidï.

¹⁴ Nɔn de të bän kɔckiën ke Judai tɔ dɔm tiɛɛl, aguɔ kɔ̈k kony wëi ë keyiic.

¹⁵ Ku na cuɛt cuɛtë ke wei, të ee yen mɛ̈ɛ̈t bï piny nɔm määt, ku döm bï ke bɛ dɔm, bï ciët ŋö, cïï bï aa pïïr ë kɔc cï thou yiic?

¹⁶ Ku na ɣer awany tueŋic, ka yen ɣɛɛr ë awacic ëbɛ̈n ka, tim, të ɣeerë meideyic, ka yen ɣɛɛr ë kërke yiic ka.

¹⁷ Ku na cï këër kɔ̈k cak dhuöŋ bei, ku yïn, yïn ee këër ë olip ë cil roor, na cï yï cak tuɛɛl ë keyiic, abä cil we keek ëtök, ago rɔm we keek ëtök në cuai de tim de olip, kë bɔ̈ në meei yic.

¹⁸ Ke yï cïï rɔt ee leec në kër nïïm. Ku të leec yïn rɔt, tak yïnɔm nɔn cie yïn ë muk meei, ee meei yen aa muk yïn.

¹⁹ Ku bä jɔ lueel an, “Kërkë acï ke dhuöŋ bei, luɔi bï a tuɛɛl thïn, abä cil.

²⁰ Ee yicdu, në baŋ de reec de gäm yen a dhuŋë ke bei, ku yïn, yïn kääc në gäm. Du yïnɔm muk nhial, ye riɔ̈ɔ̈c tei.

²¹ Ku të kën Nhialic këër thɛɛr ke tim pɔ̈l, ke ye rɔt tiit, ke yï cïï bï pɔ̈l ayadäŋ.

²² Wɔikï ënɔɔnë, piath ë Nhialic piɔ̈u ayï riɛl ë yenpiɔ̈u: tëde kɔc wään cï wïïk, ee riɛlëpiɔ̈u, ku tëde yïn ee piathëpiɔ̈u, të ee yïn cool ë rëër ë piath de yenpiɔ̈u, na rɛɛcë, ke yïn bï tɛ̈ɛ̈m bei aya.

²³ Ku keek ayadäŋ, të cïï kek ee cool ë reec gäm, ka bï ke tuɛɛl thïn abïk cil, Nhialic acath ke riɛl bï en ke bɛ tuɛɛl thïn abïk cil.

²⁴ Ku të cï yï ŋuööt bei ë tim de olip wään, tim ë cil roor tei, ago tuɛɛl ë tim de olip piɛthic, ku tueel tueelë yï thïn acïï cït ciɛɛŋduön ë ciɛkë yï, na kakë kek kër thɛɛr ke tim, tueel bï ke bɛ tuɛɛl ë timdenic guöp tim de olip, cïï bï pial awär tueel ë tueelë yïn arëët?

Kokdepiɔ̈n ë Nhialic në Kɔc Kedhie

²⁵ Ku yɛn cïn piɔ̈u, wek mïthëkɔckuɔ, luɔi kuöc wek ee cöökë, cöök cï moony, ke we cïï röt bï leec an, pɛlkï nïïm. Cöök cï moony, kï an, biäk töŋ de Yithriɛl acï tɔ ril nɔm, aɣet kööl bï kuɛth de juöör bɛ̈n thïn.

²⁶ Ago Yithriɛl kony wëi ëbɛ̈n aya, acït man cï e gɔ̈ɔ̈r an, “Raan ë kɔc luök abï bɛ̈n bei ë Dhiɔnic, Go reec reec kek Nhialic dak wei ë käu de Jakopic.

²⁷ Ku yen aye löŋ buk mac wo keek ëtök, Kööl bän karɛcken nyaai.”

²⁸ Në këde wëlpiɛth, ayek kɔc de ater në Nhialic në baŋdun, ku në këde löny lɔcë keek, ayek kɔc nhiaar në löŋ de wärkuɔ.

²⁹ Miɔ̈c de Nhialic ku cɔ̈l cɔɔl en kɔc, Nhialic acïï keek ee bɛ riic.

³⁰ Ku acït man wään cä wek Nhialic ee gam, ku we cï kokdepiɔ̈u yök ënɔɔnë në rɛɛc reec kek gäm.

³¹ Yen aacïï kek e gam aya, ke ke bï kokdepiɔ̈u yök në kokdepiɔ̈u cäk yök week.

³² Kɔc acï Nhialic ke mac ëtök kedhie në reec reec kek gäm, ke ke bïï keek nyuöth kokdepiɔ̈u kedhie.

Pianykï Nhialic

³³ Eeŋö dïïtë pɛlënɔm de Nhialic aya, ayï ŋïny ŋic en käŋ! Lööŋkɛn cï guiir bï raan ke gii thäär nɛn, ku kuɛɛrke bï raan ke yök adï?

³⁴ Cït man cï e gɔ̈ɔ̈r an, “Eeŋa ë ŋic piɔ̈n ë Bɛ̈nydït? Ku eeŋa ë tɔ rɔt ë raan ë yen riit piɔ̈u?

³⁵ Ku eeŋa cï ë kɔn miɔɔc ë käŋ, ka bï bɛ cuöl en?”

³⁶ Këriëëc ëbɛ̈n ee kake, ku aake bɔ̈ në yen, ku lek tëde yen. Ë dhuëëŋ tɔ̈u kekë yen aɣet athɛɛr! Amiin.