Romai 10 - JAM DE NHIALIC 2011

¹ Wek mïthëkɔckuɔ, kë kaar ë yapiɔ̈u kï, yɛn guöp, ku läŋ ɛn Nhialic në biäk de Yithriɛl kï, ee kuny bï ke kony wëi.

² Ku yɛn ee cäätɔden ë dït dïït kek piɔ̈ɔ̈th ë këde Nhialic, ku acïkï käŋ ŋic apiɛth.

³ Ku keek, në kuny kuc kek piathëpiɔ̈u bɔ̈ tëde Nhialic, ku ŋäth ŋɛ̈ɛ̈th kek piathdɛn ë piɔ̈u etök, aake ye piathëpiɔ̈u bɔ̈ tëde Nhialic rɛɛc gam.

⁴ Ku Kërtho yen aye thök de löŋ në këde piathëpiɔ̈u tëde raan ëbɛ̈n raan gäm.

Kunydewëi ee këde raan ëbɛ̈n

⁵ Ku Mothe ë käŋ gɔ̈ɔ̈r alë, në këde piathëpiɔ̈u wën bɔ̈ në löŋ an, “Raan ee kakë looi abï pïïr ë keek.”

⁶ Ku piathëpiɔ̈u wën bɔ̈ në gäm aye lueel alë an, “Du luel ë yïpiɔ̈u an, eeŋa bï lɔ paannhial?” (Luɛɛlde kï, ee bïï le en Kërtho bɛ̈ɛ̈i piny).

⁷ Ku du luel aya an, “Eeŋa bï lɔ piny tëthuth?” (Luɛɛlde kï, ee bïï le yen Kërtho bɛ̈ɛ̈i nhial ë kɔc cïï thou yiic).

⁸ Ku ye ŋö lueel? An, “Jam athiääk ke yïn, anu ë yïthok, ku nu ë yïpiɔ̈u aya.” Yen aye jam de gäm, jam guiirku.

⁹ Të gɛm yïn Bɛ̈nydït Yecu ë yïthok, ku gam ë yïpiɔ̈u, nɔn cï Nhialic e jɔt ë kɔc cï thou yiic, ke yïn bï kony wëi.

¹⁰ Gäm ee raan gam ë yepiɔ̈u yen aye yen piathëpiɔ̈u yök, ku luɛɛl ee raan gämde lueel ë yethok yen aye yen kunydewëi yök.

¹¹ Ku këcïgɔ̈ɔ̈r aye lueel an, “Raan ëbɛ̈n raan gam en acïï bï yäär.”

¹² Acïn të cï kɔc keyiic tek, Judai ayï Girikii, ee Bɛ̈nydïït töŋë Bɛ̈ny nu ë kɔc nïïm kedhie, yen ee piɔ̈u adhuɛ̈ŋ ke kɔc cɔl en kedhie.

¹³ Cït man cï ë këcïgɔ̈ɔ̈r ye lueel an, “Raan ëbɛ̈n raan ë Bɛ̈nydït cɔɔl rin ka bï kony wëi.”

¹⁴ Ku ënɔɔnë, bïk raan aa cɔɔl rin adiaa raan kënkï gam? Ku bïk raan gam adï, raan kën kek këde piŋ? Ku bïk piŋ adï, të liiuwë raan ë keek guiir?

¹⁵ Ku bïk aa guiir adï, të kënë ke tooc? Acït man cï e gɔ̈ɔ̈r an, “Eeŋö cï kɔc cök dikëdik alë, kɔc ee wëlpiɛth guiir, wël ke mät, kɔc ë wëlpiɛth guiir, wël ke këpiɛth!”

¹⁶ Ku akënkï wëlpiɛth gam kedhie, cït man cï Yithaya ye lueel an, “Bɛ̈nydït, eeŋa cï guiëërda gam?”

¹⁷ Yen ka, Gäm abɔ̈ në pïŋ de wël, ku bɔ̈ pïŋ de wël në Kërtho.

¹⁸ Ku wek thiëëc an, Kɛ̈nkï piŋ? Go an, Ɣɛɛ, ee yic, “Rölden acï thiëi ë piny nɔm ëbɛ̈n, 2 Ku lɔ wëlken guut ë piny thar.”

¹⁹ Aguɔ bɛ thiëëc an: Kën ŋic en Yithriɛl? Go an, Acï Mothe kɔn lueel an: “We bä tɔ dɔm tiɛɛl në jur cie tɔ ye jur, Ku ta week göth aläl në jur kuc wël.”

²⁰ Ku Yithaya ë ŋeeny arëët lueel an: “Yɛn cïï kɔc yök, kɔc ë kën a kɔɔr, Yɛn cï rɔ nyuöth kɔc, kɔc ë kën a luɔp.”

²¹ Ku yöök Yithriɛl an, “Yɛn ee cool ë riɛny ɛn a cin ë caŋawën ë kɔc reec gäm, kɔc nhiaar jäny.”