Pilipoi 4 - JAM DE NHIALIC 2011

Wëët

¹ Yen ka, wek mïthëkɔckuɔn nhiaar, ku cä we tak, wek ee miɛt de yɛnpiɔ̈u, ku yak göl ë yɛnnɔm, yak kɔ̈ɔ̈c aril wäklë ë Bɛ̈nydïtic, wek kɔc nhiaar.

² Yɛn lëk Yuodia, ku lɛ̈k Thuntuke an, Yak jam töŋë lueel ë Bɛ̈nydïtic.

³ Ku yïn, yïn raan luui wok ëtök, raan yic, yïn läŋ aya an, bäk diëërke kony, aake ye luui në yɛn ëtök në wëlpiɛth yiic, kekë Keleme aya, ku kɔc kɔ̈k ë ye wok ke luui ëtök, kɔc cïï rinken gɔ̈ɔ̈r ë awerek de pïïric.

⁴ Yak piɔ̈ɔ̈th miɛt ë Bɛ̈nydïtic ë aköölnyïïn kedhie: abä nyɔkic an, Yak piɔ̈ɔ̈th miɛt!

⁵ Liɛɛr aa wek piɔ̈ɔ̈th liɛɛr takï ŋic kɔc kedhie. Bɛ̈nydït athiɔ̈k.

⁶ Ë cïn kë bä wek piɔ̈ɔ̈th diɛɛr, ku në këriëëcic ëbɛ̈n yak kë kaarkï tɔ ŋic Nhialic në lɔ̈ŋ ku pal ku luɛl aa wek thieithieei lueel.

⁷ Ku män Nhialic, män ee kɔc dhal ë ŋïc kedhie, abï week gël piɔ̈ɔ̈th ku gël ka yak tak ë Kërtho Yecuyic.

⁸ Cöök ciëën, mïthëkɔckuɔ an, Të de yen kak ee yith, tëde yen ka ye riëëu, të de yen ka ye tiiŋ yiic, të de yen ka lɔ wai, të de yen ka cï läkëläk, të de yen ka piɛth rin, na de piath nu, ku na de lɛc nu, takkï wenïïm ee kakë.

⁹ Ku ka cäk ŋic ku ka cäk yök ku ka cäk piŋ ku ka cäk tïŋ tëde yɛn, kek luɔikï: ku Nhialic de mät abï tɔ̈u ke week.

Alɛɛc në biäk de Miɔ̈c

¹⁰ Ku yɛn ë piɔ̈u miɛt aläl ë Bɛ̈nydïtic, në täŋ aa wek ɛn tak, nɔn cï en rɔt bɛ piac gɔl ë këciëënë, we cï a tak tei ëcaŋɣɔn, ku acïn kööl piɛth cäk yök.

¹¹ Ku acie dak dak ɛn ë käŋ en luɛɛl ɛn en: yɛn ee wëët, ka yɛn duëër piɔ̈u aa lɔ yum, të de yen ka yɔ̈k.

¹² Yɛn ŋic kuur duëërë ya tɔ koor, ku ŋiɛc bäny bä yɛn bäny: në këriëëc ëbɛ̈n ku në käŋ yiic kedhie yɛn cï wëët ëgɔk, kuɛth bän kuɛth, ku guöm bän cɔk guum, ayï bäny bän bäny ayï dak bän dak ë käŋ.

¹³ Yɛn ee këriëëc lëu ë luɔi ëbɛ̈n në yen, yen raan ë ya gäm riɛl.

¹⁴ Ku we ye këpiɛth looi tei, në män cä wek mat në yɛn ëtök në këtuc dhal ɛn.

¹⁵ Ku cöökë ŋiɛckï aya, wek Pilipoi, ɣɔn ciɛkë wëlpiɛth, ɣɔn jäl ɛn ë Makedonia, acïn ɣön ë Nhialic däŋ cï mat kekë yɛn në këde miɔ̈c ku në këde nɔ̈m, ee week wapäc.

¹⁶ Acakaa ɣɔn nuö yɛn ë Thethalonika, we ë käŋ tɔ yïnë yɛn raanrou, ɣɔn cï kakï dak.

¹⁷ Acie miɔ̈c en kaar, ee ka ye luɔk ka bï aa kakun kek akaar, juëc bï kek juëc.

¹⁸ Ku yɛn cath wo këriëëc ëbɛ̈n, ku yɛn cï bäny: yɛn ë kuɛth, yɛn ë käŋ yök tëde Epaprodito, kak ë bɔ̈ tëde week, ee awäu cï tumëtum, ee läm piɛth, läm ë Nhialic tɔ mit piɔ̈u.

¹⁹ Ku Nhialicdï abï we tɔ kueth në këdak week ëbɛ̈n në juëc ë kakɛn nu paandɛn ë dhuëëŋ ë Kërtho Yecuyic.

²⁰ Ku ënɔɔnë ë lɛc tɔ̈u kekë Nhialic yen aye Wääda, aɣet athɛɛr ya. Amiin.

Thiëc Ciëën

²¹ Thiëckï kɔc ɣerpiɔ̈ɔ̈th nu ë Kërtho Yecuyic kedhie. Wek thiëëc mïthëkɔckuön rɛ̈ɛ̈r në yɛn ëtök.

²² Wek thiëëc kɔc ɣerpiɔ̈ɔ̈th kedhie, ku kɔc nu dhiën ë Kaithar acïk we thiëëc aläldït.

²³ Ë dhuëëŋ de Bɛ̈nydït Yecu Kërtho piɔ̈u ë ye tɔ̈u ke week wedhie. Amiin.