Pilipoi 3 - JAM DE NHIALIC 2011

Piathëpiɔ̈u Yic

¹ Cöök ciëën, wek mïthëkɔckuɔ an, Yak piɔ̈ɔ̈th miɛt ë Bɛ̈nydïtic. Gäär gäär ɛn week ee kamankë gup, acïï yɛn ee tɔ bäp, ku ee këpiɛth tëde week.

² Yak röt tiit ë jɔ̈k, yak röt tiit ë kɔc ee kërac looi, yak röt tiit ë kɔc ë röt tɔ ye aŋueel.

³ Ku wook, wok aye aŋueel yith, wok kɔc ee lam ë Wëidït ke Nhialic, ku yok röt leec në Kërtho Yecu, ku cuku röt ee ŋɔ̈ɔ̈th ë guöp.

⁴ Ku yɛn aya, yɛn de kë duɛ̈ɛ̈r ɛn rɔt ŋɔ̈ɔ̈th ë guöp, na de raan däŋ ee ye lueel nɔn de en të duëër en rɔt ŋɔ̈ɔ̈th ë guöp, ka wäär.

⁵ Yɛn cï cueel ëkööl ee kek bɛ̈t, yɛn ee jur cɔl Yithriɛl, raan ë dhiën ë Benjamin, yɛn ee Ɣeberuu cï dhiëëth ë Ɣeberuu, në këde löŋ, yɛn ee Parithai,

⁶ në këde lɛ̈th lɛ̈th ɛn yic, yɛn ë ɣön ë Nhialic yɔŋ, në këde piathëpiɔ̈u nu ë löŋic, yɛn cïn kë bï a gɔ̈k.

⁷ Ku ka de naamdɛn dït tëde yɛn wään, kek acä ke tɔ ye riääk tei në biäk de Kërtho.

⁸ Yeka, ee yic, yɛn ë käŋ tɔ ye riääk tei kedhie, në biäk de piath wär këriëëc, piath de ŋïny ŋiɛc ɛn Kërtho Yecu Bɛ̈nydiëndït, raan cï riääk de kakï kedhie aa tiiŋ nɔm në biäkde, ku acä ke tɔ ye wɛr tei, luɔi bän Kërtho yök,

⁹ ku luɔi bï a yök ke ya nu ë yeyic, ke ya cath wokë piathëpiɔ̈u, ku acie këdï, kë bɔ̈ në löŋ, ee kë bɔ̈ në gäm, gäm cän Kërtho gam, yen aye piathëpiɔ̈u ë bɔ̈ tëde Nhialic, në gäm,

¹⁰ ku luɔi bän e ŋic, ku ŋiɛc riɛl dïït ë jöndɛn cï en rɔt jɔt, ku ŋiɛc röm bän ka cï guum rɔm wokë yen ëtök, aguɔ guöp kït wokë yen në thon cï en thou,

¹¹ nɔn bï dɛ të bä yɛn ɣet të nu jön bï kɔc jɔ̈t bei ë kɔc cï thou yiic.

Yɛn Riŋ ë Ya lɔ të cï Keer

¹² Ku acie yöŋ cän e guɔ yök en luɛɛl, ayï dik cän guɔ dikëdik: ku yɛn ŋoot ë ya cop këdäŋ, nɔn de en të bän e dɔm, yen aye kë ë dɔmë yɛn ë Kërtho Yecu aya.

¹³ Mïthëkɔckuɔ, acä lueel në këde nɔn cän e dɔm: ee cöök tök en luɛɛl tei an, Ka nu ciëën acän nɔm määr ë ke, ku ja rɔt riɛɛny tueŋ të nu ka nu tueŋë.

¹⁴ Aguɔ riŋ ë ya lɔ tueŋ të nu kë cï keer, ke ya bï ariöp lɔ yök, ariöp de cɔ̈t cïï Nhialic kɔc cɔɔl ë Kërtho Yecuyic, cɔ̈t de naamde.

¹⁵ Yen lueel wok en wuklë, wok kɔc cï dikëdik wodhie, ku na de kë luɛlkï pei, ke Nhialic abï we nyuöth ee kënë aya:

¹⁶ ku ënɔɔnë, të cï wo guɔ ɣet thïn, jɔku cath ë kueer töŋë, ku luelku jam töŋë.

¹⁷ Yak täudï dɔmic, wek mïthëkɔckuɔ, ku thɛkkï kɔc ee rëër cït man ë wok, wok kɔc bä wek täuden dɔmic.

¹⁸ Ku kɔc juëc akuckï rëër ënɔɔnë, ku yɛn ë këden cool ë lɛ̈k ɛn e week ëcaŋɣɔn, ku lɛ̈k week ënɔɔnë ke ya dhiau an, ayek kɔc de ater në tim de Kërtho tim cï rïïu nɔm:

¹⁹ këdɛn bïk yök rial ee riääk ëliŋliŋ, yäc en aye yanhden, ku dhuëëŋden ee yäär ee kek yäär, ayek kepiɔ̈ɔ̈th tuöm ka ke piny nɔm.

²⁰ Ku wook, paanda ee paan nu nhial, paan ee wok Konydewëi tiit thïn, yen aye Bɛ̈nydït Yecu Kërtho:

²¹ raan bï wo puk gup, gup cïn naamden, luɔi bï en ke cuëëc abïk kït ë guöpdɛn ë dhuëëŋ, në luɔi de riɛldɛndït riɛl ee yen käŋ ŋiëc tääu ë yecök kedhie.