Pile 1 - JAM DE NHIALIC 2011

¹ Yɛn Paulo, raan cï mac ë këde Yecu Kërtho, wokë Timotheo mɛnhkënëda. Awerek en gɛ̈ɛ̈rku yïn Pilemon raan nhiaarku, ku ye raan ee luui ke wook ëtök,

² ku Apia nyankënda, ku Arkipo raan ee tɔŋ biök ke wook ëtök, ku ɣön ë Nhialic nu ɣöndu:

³ Ë dhuëëŋdepiɔ̈u ku mät ë ke ye tɔ̈u në week, në ke bɔ̈ tëde Nhialic Wääda kekë Bɛ̈nydït Yecu Kërtho.

Nhiëër ku Gäm de Pilemon

⁴ Yɛn ee Nhialinydï leec, ku yïn a cool ë luɛɛl rin ë lɔ̈ŋdïyic.

⁵ Në luɔi cän nhiëërdu piŋ ku piɛŋ gämduön cï yïn Bɛ̈nydït Yecu gam, ku nhiëër nhiɛɛr yïn kɔc ɣerpiɔ̈ɔ̈th kedhie.

⁶ Ku yɛn ee lɔ̈ŋ, ke män mɛtë kɔc ë gämduyic ke bï dɛ naamdɛn dït, agokï këpiɛth ëbɛ̈n ŋic ëgɔk këpiɛth yok yök, në Kërtho Yecu.

⁷ Wok mit piɔ̈ɔ̈th aläl ku cï wo riit piɔ̈ɔ̈th në nhiëërduön ee yïn kɔc nhiaar, luɔi cï kɔc ɣerpiɔ̈ɔ̈th tɔ lɔ piɔ̈ɔ̈th guïk piny në yïn, mɛwäär.

Thiëc ë biäk de Onethimo

⁸ Ku ënɔɔnë, acakaa yɛn ë duëër yïn yɔ̈ɔ̈k aril në Kërtho yic an, dhil këpiɛth looi.

⁹ Ku në biäk de nhiëër nhiaar ɛn yïn, yïn läŋ tei, yɛn raan cɔl Paulo mony cï dhiɔp, ku ye raan mac ënɔɔnë aya në baŋ de Yecu Kërtho.

¹⁰ Yïn läŋ në biäk de mɛnhdï Onethimo, mɛnh cä dhiëëth ë jothkï yiic.

¹¹ Ee mɛnh wään cïn naamde tëde yïn, ku ënɔɔnë ë dɛ naamde tëde yïn ku tëde yɛn.

¹² Ku acä bɛ tuöc yïn yenguöp, ku yïn, beyë dɔm, yen yänydï kï.

¹³ Ku yɛn aa de piɔ̈u luɔi bän e pëën bï rëër ke yɛn le ë nyinduyic, bï kakï aa looi në mac mac ɛn në baŋ de wëlpiɛth.

¹⁴ Ku acïn kë duɛ̈ɛ̈r looi të kɛ̈n ɛn këde piɔ̈ndu piŋ, ke cïn raan bï yï cieŋ në luɔiduön ë dhuëëŋ, abï aa këde yïnpiɔ̈u etök.

¹⁵ Thar ë kë pɔ̈k wek ë akööl liaakäŋ ayïn aa luɔi bï yïn e bɛ nööm abï aa këdu anande.

¹⁶ Ku cïï bï bɛ ciët man ë lïm tei, abï lïm wöör, ee mɛnhkui nhiaar, arëk ɛn a nhiaar aläl, ku yïn, cïï nhiaar ë nhiëër wär nhiëër nhiaar ɛn en, ë yeguöp ku në Bɛ̈nydïtic aya!

¹⁷ Të cï yïn a tɔ ye raan ram wek käŋ ëtök, ke jɔ dɔm cït man duëër yïn a dɔm.

¹⁸ Ku të cï en yïn wäc käŋ, ku na de këduön cath ke ye, ke jɔ tääu ë yayeth.

¹⁹ Yɛn Paulo, acä gɔ̈ɔ̈r ë yaciin guöp, abä cool: ku yɛn acä duëër lɛ̈k yïn en yöŋ cï yïn wëiku yök tëde yɛn aya.

²⁰ Yeka, mɛwäär, tɔ ya mit piɔ̈u wo yïn ë Bɛ̈nydïtic: tɔ ya lɔ piɔ̈u guïk piny ë Kërthoyic.

²¹ Aŋiɛc nɔn bï yïn këdï gam, yen a gäär ɛn yïn, ku aŋiɛc nɔn bï yïn kë wär kë luɛɛl looi ayadäŋ.

²² Ku guik të bän rëër aya: yɛn ŋäth nɔn bï a yiɛ̈n week në këde lɔ̈ŋduön aa wek lɔ̈ŋ.

Thiëc Ciëën

²³ Yïn thiëëc Epapara, raan mac wok ëtök në biäk de Kërtho Yecu,

²⁴ ku Mak aya, ku Aritharko, ku Demath, ku Luk, kɔc ë luui wok ëtök.

²⁵ Ë dhuëëŋ de Bɛ̈nydan Yecu Kërtho piɔ̈u ë ye tɔ̈u ke wëikun. Amiin.