Obadaya 1 - JAM DE NHIALIC 2011

¹ Nyuuth de Obadaya kï, nyuuth ë nyuth ë yen kë cïï Bɛ̈nydït Nhialic lueel në baŋ de kɔc ke Edom. Bɛ̈nydït acï tunyde tuöc juöör, ku jamde acuk piŋ ke lueel an, “Bäk kïïtku röt! Yïnku tɔŋ kɔc ke Edom!

Bɛ̈nydït abï Kɔc ke Edom Luöi Këtuc

² Aye Bɛ̈nydït lɛ̈k kɔc ke Edom an, “Wek bä tɔ ye jur thiinakäŋ në juööriic, ku ta ke biɔn wegup.

³ Wek cïï lɛcdun math. Pänydïïtdun acï gël në kal ë kuur lɔ giliu, ku ɣöötkun anukï në kur nïïm ya, ka yak lueel në wepiɔ̈ɔ̈th an, ‘Eeŋa duëër wook kɔn lɛɛr piny?’

⁴ Na cakaa nɔn cä wek ɣöötkun yïk nhial ya, ka acïk ciët ɣööt ke cuɔɔr, ka acïk ciët ka nu në kuɛl yiic, wek bä ŋoot ke we bɛ̈ɛ̈i piny.

⁵ “Të bïï cuɛ̈ɛ̈r bɛ̈n cuëër wakɔ̈u, ee ka kɔɔrkï kapäc kek ayek jɔt. Të mɛ̈ɛ̈t ë kɔc mïth ke enap yiic, mïth kɔ̈k cïkï ee döŋ piny? Kɔc de ater në week acïk week riɔ̈ɔ̈k taitai.

⁶ Käu de Ethau, kakuön ë cäk kuɛ̈t röt, acï ke peec kedhie.

⁷ Kɔc wään mät në week acïk we math, ku kuëëthkï we bei pinydun. Kɔc wään dɛ wek rëër piɛth lɔ dïu, acïk we rum ë piny. Kɔc wään ee cam në week ëtök, kek adep week, ku ayek lop an, ‘Ka pɛlënɔmdɛn wäänë ëbɛ̈n cï lɔ ënou?’

⁸ “Yɛn bï röör pelnïïm ke Edom riɔ̈ɔ̈k në ee kööl manë guöp, ku nyaai pɛlënɔmden.

⁹ Kɔc ke Teman riil ke tɔŋ abï keek riääc, ku rem de tɔŋ de Edom ëbɛ̈n abïï ke näk piny.

Ka tɔ Edom Luiyë Këtuc

¹⁰ “Yïn bï yäär, ku yïn bï nyin riäär anandu, në luɔi wään cïn mïthëkɔckun rum, mïth ke Jakop, ku näk keek.

¹¹ Të ɣɔn dhuuŋ kɔckɛn ke ater kɛ̈lken thook, yïn ë bɛ̈n kɔ̈ɔ̈c tëmec. Yïn ë bɛ̈n ciët raan töŋ de kɔc ɣɔn pec kajuëc ke Jeruthalem, ku tëkkï ke röt në deeny ë gɛk.

¹² Yïn cïï wänmuuth duëër geet guöp, në kööl cï kërac ye yök. Yïn cïï piɔ̈u duëër miɛt në kööl ë riääk de kɔc ke Juda, abä yïnɔm jɔ lɛc, në kööl cïï këtuc ke yök.

¹³ Yïn cïï wun ë kɔckï duëër caathic në kööl cïï riääk ke yök, get ke gup në nuanden yic ku yakkï kaken.

¹⁴ Yïn cïï duëër kɔ̈ɔ̈c në apuɔ̈k kuɛɛr, ku ye kɔckɛn cï ban dɔm. Acï ke duëër aa dɔ̈m kɔckɛn ke ater, në kööl cïï riääk ke yök.

Nhialic abï Juöör Luöi Këtuc

¹⁵ Ago Bɛ̈nydït jam lueel an, “Akööl acïk thiɔ̈k, akööl bän juöör ke piny nɔm luöi këtuc kedhie. Kë cäk looi wek kɔc ke Edom, yen abï bɛ luöi week. Kë man ë luɔikï, yen abï rɔt bɛ puɔ̈k week.

¹⁶ Kɔckï acïk këtuc thok thiëëp në kuurdiën ɣeric nɔm, në biäk cän ke luöi këtuc. Ku juöör kedhie abïk këtuc thiëëp, këtuuc wär ee kënë ë caŋɣɔn, në biäk cän keek kuum ayadäŋ. Abïk këtuc thiëëp ka abïk ciët ka kën kɔn tɔ̈u ë pinynɔm.

Tiëm de Yithriɛl

¹⁷ “Ku kɔc kɔ̈k abïk ban në Kuur ë Dhiɔn nɔm ku abï aa tëɣeric. Kɔc ke Jakop, abïk ee pinyë lɔ̈ɔ̈k lak ke ye këden.

¹⁸ Kɔc ke Jakop abïk ciët mac, ku kɔc ke Jothep abïk ciët lɔ̈k ë mac, abïk kɔc ke Ethau riɔ̈ɔ̈k cït man ye mac miël ë rap nyop. Ka acïn kuat de Ethau bï nyin döŋ.

¹⁹ “Kɔc ke Juda tɔ̈u të lɔ wöuwic, abïk piny ë Edom lɔ̈ɔ̈k cieŋ, ku kɔc nu në kur thäär ë baŋ të lɔ aköl athɛ̈i, abïk piny ë Pilithiin lɔ̈ɔ̈k rum. Kɔc ke Yithriɛl abïk piny ë Eparaim lɔ̈ɔ̈k nööm kekë piny ë Thamaria, ku kɔc ke Benjamin abïk piny de Giliyad nööm.

²⁰ Ku rem de tɔŋ ë Yithriɛl ɣɔn lɔ bɛ̈n në pɛ̈cic, abï piny ë Ponicia peec agut të lɔ rutë ale kɔ̈ɔ̈c Dharepath. Ku kɔc ɣɔn pec ë Jeruthalem kɔc tɔ̈u Thardith, abïk wuöt dït nu Juda të lɔ wöuwic peec.

²¹ Ku kɔc bï kɔc luök, abïk lɔ nhial në kuur ë Dhiɔn nɔm lek kuur ë Ethau cieŋ. Ku ciɛɛŋ abï aa këde Bɛ̈nydït guöpde.