Nyuuth 9 - JAM DE NHIALIC 2011

¹ Na wën, ke tunynhial ee kek dhïc koth kaaŋde, aguɔ kuel cï lööny piny nhial tïŋ: ku acï gäm mukthäär de adhum thuth cïï thar tiëc.

² Go adhum thuth cïï thar tiëc tueer thok, go tol rɔt mɔc nhial ë adhumic, cït man ë tol ë manydïït dɛ̈p ëjaŋjaŋ, go akɔ̈l tɔ col ayï nhial në baŋ de tol ë adhum.

³ Ku bɔ̈ kɔyɔm bei ë tolic, lek ë piny nɔm, gokï gäm riɛl cït man ë riɛl cath ke manciëëi ke piny nɔm.

⁴ Ku acï ke yɔ̈ɔ̈k, an, Duökï wɛ̈ɛ̈l ë piny nɔm näk, ayï kë tɔ̈c ëbɛ̈n, ayï tiim ëbɛ̈n, an, Duökï ke näk, ee kɔckë kapäc kɔc kënë gɔ̈ɔ̈r nyïïn tueŋ në katim de Nhialic,

⁵ Ku acï gäm keek luɔi cïï kek ke bï nɔ̈k abïk thou, ee luɔi bï ke leeŋ wëi ë pɛ̈i kadhïc: ku lɛ̈ŋ ee kek kɔc leeŋ wëi acït cuil ee manciëëi raan cuil guöp, të cï en e moc.

⁶ Ku në aköölkë yiic kɔc abïk thuɔɔu kɔɔr, ku acïkï bï yök, ku abïk piɔ̈ɔ̈th dɛ thuɔɔu arëët, ku thuɔɔu abï kat ë keek.

⁷ Ku täu de kɔyɔm gup acït täu de jöŋgöör cï guik ë këde tɔŋ, ku ceŋkï ka cït gööl ë adhääp ë kenïïm, ku acïtkï nyïïn kɔc.

⁸ Ku adekï nhïm cït nhïm ke diäär, ku acïtkï lec kɔ̈ɔ̈r.

⁹ Ku adekï kak ë keyöth gël, ka cït ka cï cuëëc ë wëëth, ku awuööu de kek wuök acït awuööu de abëël juëc ke tɔŋ thel ë jöŋgöör, të riŋ kek ë ke lɔ tɔŋ.

¹⁰ Ku adekï yɔ̈ɔ̈l cït yɔ̈ɔ̈l ke manciëëi, ku nu wiɛth ë keyɔ̈ɔ̈l, ku aciɛthkï në riɛl bï kek kɔc aa nɔ̈k ë pɛ̈i kadhïc.

¹¹ Ku adekï melik nu ë kenïïm, yen aye tunynhial de adhum thuth cïï thar tiëc, rinke acɔl Abadon ë thoŋ ë Ɣeberuu, ku cɔlke Apoliɔn ë thoŋ de Girikii.

¹² Amawoou tök acï wan, amawoou kaarou ka, aŋootkï ke ke bɔ̈ ë kakë cök.

¹³ Na wën, ke tunynhial ee kek dhetem koth kaaŋde, guɔ röl piŋ röl bɔ̈ tëde tuŋ kaŋuan tuŋ ke yïïŋ ë adhääp yïïŋ de läm, yïïŋ nu ë Nhialic nɔm,

¹⁴ ke lëk tunynhial ee kek dhetem, tuny cath ke kaaŋ, an, “Lony tuucnhial kaŋuan tuuc cï mac ë wɛ̈ɛ̈r ë Yuparat!”

¹⁵ Goke lony kek tuucnhial kaŋuan tuuc cï röt kɔn coc në këde thaar ku aköl ku pɛɛi ku run, ë näŋ bï kek baŋ töŋ de kɔc nɔ̈k abïk thou baŋ wën ee kek diäk.

¹⁶ Ku kuën ë kɔc cath ë jöŋgöör kɔ̈ɔ̈th ayek aguum kathiërrou raan thiëër ë agum: yɛn cï kuënden piŋ.

¹⁷ Ku jöŋgöör wën cä tïŋ ë nyuöthic, kekë kɔc rɛ̈ɛ̈r ë kekɔ̈ɔ̈th, aake tiëŋ ke ke cath në kak ee ke gël yöth, ka cït mac ku wakintho ku thulpur: ku jöŋgöör acïtkï nïïm kɔ̈ɔ̈r, ku bɔ̈ mac bei ë kethook, ku tol, ku thulpur.

¹⁸ Ee karɛckë kadiäk kek aa näk baŋ töŋ de kɔc abïk thou baŋ wën ee kek diäk, në mac ku tol ku në thulpur, kak ë bɔ̈ bei e kethook.

¹⁹ Ku riɛl de jöŋgöör anu ë kethook ku keyɔ̈ɔ̈l: yɔ̈ɔ̈lken acïtkï karɛc, ku adekï nïïm, ku në keek aye kek kɔc nɔ̈k.

²⁰ Ku kɔc cï döŋ, kɔc kënë jɔɔkkë nɔ̈k, aŋootkï ke ke kën kepiɔ̈ɔ̈th puk në luɔidɛn yek looi ë kecin, ke ke cïï jɔɔk rac bï aa lam, ayï ka cï cuëëc ë adhääp, ku ateek, ku maläŋ, ku kuur, ku tim, ka cie daai, ku cïkï ye piŋ, ku cïkï ye cath:

²¹ ku kënkï kepiɔ̈ɔ̈th puk në näŋdɛn ë kɔc, ku athuɛ̈ɛ̈thden ee kek thuëth, ku kɔ̈ɔ̈rdɛn ë diäär, ku kuëlden.