Nyuuth 8 - JAM DE NHIALIC 2011

Adöŋ de Dhorou

¹ Na wën, aacï adöŋ ee kek dhorou kuɛ̈k bei, ke piny lɔ lik paannhial të cït biäk ë thaar.

² Aguɔ tuucnhial kadhorou tïŋ, tuuc kääc ë Nhialic nɔm, ku acï ke gäm kɛŋ kadhorou.

³ Ku bɔ̈ tunynhial däŋ bïï ku kɛ̈ɛ̈c ë yïïŋ de läm nɔm, ku muk thaŋ ë adhääp ee wɛ̈ɛ̈l tum nyop thïn, ago gäm wɛl juëc tum, bïï ke mat në lɔ̈ŋ ëtök lɔ̈ŋ ee kɔc ɣerpiɔ̈ɔ̈th lɔ̈ŋ kedhie, ku nyop ke ë yïïŋ de läm nɔm yïïŋ nu ë thöönydït nɔm tueŋ.

⁴ Go tol ë wal ŋïr lɔ nhial kekë lɔ̈ŋ ë kɔc ɣerpiɔ̈ɔ̈th ëtök, le nhial ë Nhialic nɔm ë tunynhial cin.

⁵ Na wën, ke tunynhial nööm thaŋ wën ee wal nyop thïn, ku jɔ thiɔ̈ɔ̈ŋ ë many de yïïŋ de läm, ku cuɛt ë piny nɔm, go kɔc röt tuöl, ku tul määrëdeŋ, ku wilëdeŋ, ku nieŋ cï piny rɔt niɛŋ.

Kɛŋ

⁶ Na wën, ke tuucnhial kadhorou tuuc muk kɛŋ kadhorou, ke ke coc röt bïk kɛŋ kooth.

⁷ Go tunynhial tueŋ kaaŋde kooth, na wën ke kɔɔi de deŋ bɔ̈, kekë mɛ̈c cï liääp ë riɛm, ku cuɛtë keek ë piny nɔm: go baŋ töŋ de piny nɔm lɔ kuith piny ë nyop, baŋ töŋ wën ee kek diäk, ayï baŋ töŋ de tiim, ku lɔ wɛ̈ɛ̈l tɔ̈c kuith piny ë nyop ëbɛ̈n.

⁸ Na wën, ke tunynhial ee kek rou koth kaaŋde, ku jɔ kë cït kuurdït gök dɛ̈p ë mac cuat ë wɛ̈ɛ̈ric: go baŋ töŋ ë wɛ̈ɛ̈r baŋ wën ee kek diäk jɔ guɔ aa riɛm,

⁹ go baŋ töŋ de ka cï cak baŋ wën ee kek diäk ka nu ë wɛ̈ɛ̈ric ka pïïr, gokï thou: ku riääk baŋ töŋ de abëël baŋ wën ee kek diäk.

¹⁰ Na wën, ke tunynhial ee kek diäk koth kaaŋde, ku jɔ kuel dïït gök lööny piny nhial, ke dɛ̈p cït man ë kuthyui, go lööny piny ë baŋ töŋ de kiɛɛr nïïm, ku awɛŋ ke piëëu nïïm baŋ wën ee kek diäk,

¹¹ ku rin ke kuel acɔl wɛ̈ɛ̈l kec, go baŋ töŋ de piëëu ëbɛ̈n baŋ wën ee kek diäk jɔkï guɔ aa wɛ̈ɛ̈l kec: go kɔc juëc thou në piëëu, në kɛc cï ke tɔ kec.

¹² Na wën, ke tunynhial ee kek ŋuan koth kaaŋde, ku jɔ baŋ töŋ de akɔ̈l yup, baŋ wën ee kek diäk, ku yup baŋ töŋ de pɛɛi, ku baŋ töŋ de kuɛl, baŋ wën ee kek diäk, ago baŋ töŋ ë keek ago cuɔl, baŋ wën ee kek diäk, go piny cuö ɣer aköl ë baŋ töŋ de baŋ wën ee kek diäk, ayï wakɔ̈u ayadäŋ.

¹³ Aguɔ anyin jɔt, ku piɛŋ tunynhial ke riŋ ë paannhialic cil, ke lueel ë röl dït, an, “Amawoou, Amawoou, Amawoou, në kɔc rɛ̈ɛ̈r ë piny nɔm, ë baŋ de röt cï döŋ, röt ke kɛŋ ke tuucnhial kadiäk tuuc bï kɛŋken lɔ̈ɔ̈k kooth!”