Nyuuth 7 - JAM DE NHIALIC 2011

Kɔc ke Yithriɛl ka 144,000

¹ Na wën, aacï kakë thök, ke ya tïŋ tuucnhial kaŋuan akɛ̈ɛ̈ckï ë aguuk ke piny nɔm kaŋuan, ku mukkï yom ke piny kaŋuan, ke bï ciën yom bï pɔ̈t ë piny nɔm, ayï wɛ̈ɛ̈ric, ayï tiim kedhie.

² Aguɔ tunynhial däŋ tïŋ, abɔ̈ nhial: go tuucnhial kaŋuan cɔɔl ë röl dït, tuuc cï gäm riɛl bï kek piny riɔ̈ɔ̈k ayï wɛ̈ɛ̈r,

³ lueel, an, “Duökï piny riäk, ayï wɛ̈ɛ̈r, ayï tiim, të ŋoot wok ë wo kën lïïm ke Nhialicda gɔ̈ɔ̈r nyïïn tueŋ në katim.”

⁴ Ku yɛn ë kuën ë kɔc cï gɔ̈ɔ̈r ë katim piŋ, agum kabɔt ku thiërŋuan ku ŋuan, kɔc cï gɔ̈ɔ̈r ë katim ë dhiëën ke mïth ke Yithriɛl yiic kedhie.

⁵ Dhiën ë Juda acï aguum kathiëër ku rou gɔ̈ɔ̈r thïn: Dhiën ë Ruben acï aguum kathiëër ku rou gɔ̈ɔ̈r thïn: Dhiën ë Gad acï aguum kathiëër ku rou gɔ̈ɔ̈r thïn:

⁶ Dhiën ë Acer acï aguum kathiëër ku rou gɔ̈ɔ̈r thïn: Dhiën ë Naptali acï aguum kathiëër ku rou gɔ̈ɔ̈r thïn: Dhiën ë Manatha acï aguum kathiëër ku rou gɔ̈ɔ̈r thïn:

⁷ Dhiën ë Thimion acï aguum kathiëër ku rou gɔ̈ɔ̈r thïn: Dhiën ë Lebi acï aguum kathiëër ku rou gɔ̈ɔ̈r thïn: Dhiën ë Yithakar acï aguum kathiëër ku rou gɔ̈ɔ̈r thïn:

⁸ Dhiën ë Dhebulun acï aguum kathiëër ku rou gɔ̈ɔ̈r thïn: Dhiën ë Jothep acï aguum kathiëër ku rou gɔ̈ɔ̈r thïn: Dhiën ë Benjamin acï aguum kathiëër ku rou gɔ̈ɔ̈r thïn:

Kuutdïït ë Kɔc

⁹ Na wën, aacï kakë thök, ke ya jɔt anyin, ku ja kut dïït ë kɔc tïŋ, ku cïn raan duëër e lëu ë kuɛ̈n, kɔc ë bɔ̈ bei ë juööriic ëbɛ̈n, ku dhiëën yiic ëbɛ̈n, ku thäi yiic ëbɛ̈n, ku liëp yiic ëbɛ̈n, ke ke kääc ë thöönydït nɔm ku Nyɔŋamääl nɔm, ke ke ceŋ lupɔɔ ɣer, ku mukkï yïth ke akööt ë kecin.

¹⁰ Ku cötkï ë röl dït, an, “Kunydewëi ë tɔ̈u ke Nhialicda, Raan rɛ̈ɛ̈r ë thöönydït nɔm, ku tɔ̈u ke Nyɔŋamääl!”

¹¹ Ku kääc tuucnhial kedhie ke ke cï thöönydït geeu, ku geukï röördït ku läi kaŋuan, gokï röt cuat piny ë thöönydït nɔm, ku gutkï kenïïm piny, lamkï Nhialic,

¹² luelkï, an, “Amiin: Athiɛɛi, ku dhuëëŋ, ku pɛlënɔm, ku thieithieei, ku riëëu, ku riɛldït, ku riɛl ee käŋ lëu, ë ke ye tɔ̈u në Nhialicda aɣet wadäŋ thɛɛr ya. Amiin!”

¹³ Na wën, ke bëërë raan tök ë röördït thiëëc ɛn, an, “Ee yïŋa ee kɔckë kɔc ceŋ lupɔɔ ɣer, ku ye tënou ë bïï kek?”

¹⁴ Guɔ lueel, an, “Bɛ̈ny, aŋic yïn.” Ago pɔ̈k nɔm ɛn, an, “Kɔckë ee kɔc ë bɔ̈ bei ë këtucdïït ë ke dhalic, ku acïk lupɔɔken waak, tɔkï ke ɣer ë riɛm de Nyɔŋamäälic.

¹⁵ Yen a tɔ̈u kek ë thöönydïït ë Nhialic nɔm, ku yek luööi aköl ku wakɔ̈u ë luaŋdɛndïtic. Ku Raan rɛ̈ɛ̈r ë thöönydït nɔm abï keek gël nïïm në täude.

¹⁶ Acïï cɔk ke bï bɛ nɔ̈k ananden, ku cïkï bï bɛ yal ananden, ayï akɔ̈l acïï keek bï aa nɔ̈k, acakaa atuöc ŋö, acïï ke bï aa nɔ̈k.

¹⁷ Nyɔŋamääl nu ë thöönydïtic cil abï keek aa tiit, ku ye ke kuaath të nu awɛŋ ke pïïu ke pïïr, ku Nhialic abï pïïu aa weec ë kenyïïn kedhie.”