Nyuuth 6 - JAM DE NHIALIC 2011

Adɔ̈k

¹ Na wën, ke ya tïŋ Nyɔŋamääl të wën kuek en adöŋ tök bei ë adɔ̈k yiic kadhorou, ku ja lɛ̈n tök ë läi yiic kaŋuan piŋ ke lueel në röl cït määrëdeŋ, an, “Bä tïŋ!”

² Guɔ anyin jɔt, ku ja jöŋgör akuur tïŋ, ku raan rɛ̈ɛ̈r ë yekɔ̈u amuk dhaŋ, ku cï gäm göl ë dhuëëŋ, go lɔ biic ke tiëm, ku bï lɔ ke tiëm.

³ Na wën, aacï adöŋ ee kek rou kuɛ̈k bei, ke ya piŋ lɛ̈n ee kek rou ke lueel, an, “Bä tïŋ!”

⁴ Go jöŋgör däŋ bɛ̈n bei, jöŋgör aluɛɛl, go raan rɛ̈ɛ̈r ë yekɔ̈u gäm riɛl bï en mät nyaai ë piny nɔm, ke kɔc ë ke bï röt nɔ̈k kapäc, ku cï gäm abätäu dït.

⁵ Na wën, aacï adöŋ ee kek diäk kuɛ̈k bei, ke ya piŋ lɛ̈n ee kek diäk alueel, an, “Bä tïŋ!” Aguɔ anyin jɔt, ku ja jöŋgör col tïŋ: ku raan rɛ̈ɛ̈r ë yekɔ̈u amuk medhaan ë yecin.

⁶ Guɔ röl piŋ ë läi kaŋuan yiic cil, alueel, an, “Konh töŋ de agamɔ ee ya gïrïïc kadiäk, ku ye koth ke barli kadiäk aa gïrïïc kadiäk, ku du miök ee riɔ̈ɔ̈k ayï mɔ̈u!”

⁷ Na wën, aacï adöŋ ee kek ŋuan kuɛ̈k bei, ke ya piŋ röl ë lɛ̈n ee kek ŋuan alueel, an, “Bä tïŋ!”

⁸ Guɔ anyin jɔt, na wën, dï, ke jöŋgör kän linhakuur tul: ku rin ke raan rɛ̈ɛ̈r ë yekɔ̈u acɔlke Thuɔɔu, ku biɔth cök ë Paan ë kɔc cï Thou. Ku acï ke gäm riɛl ë biäk töŋ de piny nɔm biäk wën ee kek ŋuan, riɛl bï kek kɔc aa nɔ̈k ë abätäu, ku në cɔk, ku në jɔɔk, ku në läi rac ke piny nɔm.

⁹ Na wën, aacï adöŋ ee kek dhïc kuɛ̈k bei, ke ya tïŋ wëi ke kɔc ë yïïŋ de läm thar kɔc ɣɔn cï nɔ̈k ë baŋ de jam ë Nhialic ku në luɔi ee kek cäätɔɔ ë löŋ döt:

¹⁰ Agokï cööt ë röl dït luelkï, an, “Ee nɛn, yïn Bɛ̈nydït, ɣeric ku ye yic, en bï yïn löŋ guiir, ku bä riɛmda guöör ë kɔc rɛ̈ɛ̈r ë piny nɔm në biäk cï kek wo nɔ̈k?”

¹¹ Go ke miɔɔc ë lupɔɔ ɣer kedhie, ŋɛk ke këde, ku ŋɛk ke këde, ku acï lɛ̈k keek, an, bïk yök ke ke lɔ̈ŋ tëthiinakäŋ, aɣet të bï kɔckɛn ee kek lïïm ëtök thök ë näk, ayï mïthëkɔcken, kɔc bï nɔ̈k cït man ë kek.

¹² Na wën, ke ya jɔt anyin, të wën kuek en adöŋ ee kek dhetem bei, go piny rɔt niɛŋ arëët, go akɔ̈l cuɔl ëcut, cït cuaal cï cuëëc ë nhïm col, ku jɔ pɛɛi ciët riɛm liŋliŋ.

¹³ Ku lööny kuɛl nhial piny, cït man ë ŋaap cï mïthke lööny piny mïth ŋoot ë ke tɔ̈c, të cï ë yom de rut ye niɛŋ arëët.

¹⁴ Go tënhial nyaai cït man ë awerek cï dolic, ku nyiɛɛiyë kurdït kedhie tëden ayï tuöör.

¹⁵ Go meliik ke piny nɔm, ku bänydït, ku kɔc juëcëkäŋ, ku bänydït ke rem, ku kɔc ril, ku lïm ëbɛ̈n ayï raan lääunɔm ëbɛ̈n, agokï thiaan ë kɔ̈k yiic ku kur ke kuurdït yiic.

¹⁶ Ku yöökkï kurdït kekë kur kor, an, “Lɔ̈ɔ̈nykï ë wonïïm, thiankï wook ë Bɛ̈nydït nyin, Bɛ̈ny rɛ̈ɛ̈r ë thöönydït nɔm, ku në agönhdïït ë Nyɔŋamääl:

¹⁷ kööldïït ë agönhdɛn dït acï guɔ ɣëët, ku eeŋa duëër kɔ̈ɔ̈c lëu?”