Nyuuth 5 - JAM DE NHIALIC 2011

Awerek ku Nyɔŋamääl

¹ Na wën, ka ya tïŋ awerek ë ciin cuëny de Bɛ̈nydïït ë rëër ë thöönydït nɔm awerek cï gɔ̈ɔ̈ric ku gäär kɔ̈u, ku cï boot në ka cït adɔ̈k kadhorou.

² Ku ja tunynhial ril tïŋ, ke thiëc kɔc ë röl dït, an, “Eeŋa rɔ̈ŋ ke liëm duëër en awerek liep, ku në kuëŋ duëër en adɔ̈kkë kuɛ̈k bei?”

³ Ku acïn raan nu paannhial, ayï piny nɔm, ayï piny thar, raan duëër awerek lëu ë liëp, ayï wui woi en en.

⁴ Aguɔ dhiau arëët, ë luɔi cïn en raan cï yök raan rɔ̈ŋ ke liëm ë awerek, ayï wui woi en en aya.

⁵ Na wën, ke ya yöökë raan tök ë röördït yiic, an, “Du dhiau: tïŋ, Köör ë dhiën ë Juda, ee Meei de Debid, acï tiam, në liëm bïï en awerek liep ku në kuëŋ bï en adɔ̈k kadhorou kuek.”

⁶ Na wën, ke ya tïŋ Nyɔŋamääl, ke kääc ë thöönyic cil, ku läi kaŋuan yiic cil, ku röördït yiic cil, nyɔɔŋ cït kë cï nɔ̈k, ku de nɔm tuŋ kadhorou, ku nyïïn kadhorou, kek aye Wëi ke Nhialic kadhorou Wëi cï tuööc ë piny nɔm ëbɛ̈n.

⁷ Go bɛ̈n, bï ku nööm awerek ë ciin cuëny de Raan ë rëër ë thöönydït nɔm.

⁸ Na wën, aacï awerek nööm, ke läi kaŋuan ku röördït kathiërrou ku ŋuan ke ke cuɛt röt piny ë Nyɔŋamääl nɔm, ke ke muk thoom raan ëbɛ̈n, ku mukkï guöl ë adhääp de yiic wal ŋïr ee nyop agokï tumëtum, kek aye lɔ̈ŋ ee kɔc ɣerpiɔ̈ɔ̈th Nhialic lɔ̈ŋ.

⁹ Ku kitkï din ë piɛc cak, luelkï, an, “Yïn rɔ̈ŋ we luɔi duëër yïn awerek nööm, ku kuek adɔ̈kkë bei: Ë luɔi cï yï nɔ̈k, ago wo wɛ̈ɛ̈r bei në riɛmdu në këde Nhialic ë dhiën yiic ëbɛ̈n, ku thok yiic ëbɛ̈n, ku kɔc yiic ëbɛ̈n, ku juöör yiic ëbɛ̈n,

¹⁰ ku tɔ wook ee meliik ku bäny ke kake Nhialicda, ku wo bï piny cieŋ nɔm.”

¹¹ Na wën, ke ya jɔt a nyin, ku ja tuucnhial juëc piŋ röt, tuuc ë thöönydït geeu, ku geukï läi ku röördït, ku kuënden ee aguum kathiëër raanthiëër ë agum, ku agum juëc raan juëc,

¹² ku luelkï ë röl dït, an, “Nyɔŋamääl en arɔ̈ŋ ke luɔi bï en riɛldït yök, ku yök juëcdekäŋ, ku pɛlënɔm, ku riɛl, ku riëëu, ku dhuëëŋ, ku athiɛɛi!”

¹³ Ku këriëëc cï cak ëbɛ̈n, ayï ka nu paannhial, ayï ka nu ë piny nɔm, ayï ka nu ë piny thar, ayï ka nu ë wɛ̈ɛ̈ric, ku ka nu ë keyiic kedhie, acä ke piŋ, ke luelkï an: “Athiɛɛi, ku riëëu, ku dhuëëŋ, ku riɛldït, ë ke tɔ̈u në Raan rɛ̈ɛ̈r e thöönydït nɔm, ku në Nyɔŋamääl, aɣet wadäŋ thɛɛr ya.”

¹⁴ Go läi kaŋuan lueel, an, “Amiin!” Ku cuɛt röördït röt piny lamkï.”