Nyuuth 4 - JAM DE NHIALIC 2011

Läm de Paannhial

¹ Na wën, aacï kakë thök, ke ya jɔt a nyin, guɔ paannhial tïŋ acï liep thok. Ku röl cä kɔn piŋ acït röl ë kaaŋ ke jam ke yɛn, lueel, an, Bä nhial tënë, ku yïn bä nyuöth ka bï dhil lɔ̈ɔ̈k tïc ë kakë cök.

² Na wën, ke Wëidït ë ke jɔ nyuc ë yaguöp ënɔnthiinë: ku ja thööny tïŋ acï tuɛɛl piny paannhial, ku rɛ̈ɛ̈r Raan ë thööny nɔm.

³ Ku Raan rɛ̈ɛ̈r acït nyin kuur thith cɔl jathpi ayï kuur cɔl thardiɔn: ku nu mïït ee thööny geeu, ke cït nyin kuur tɔ̈c cɔl ameral.

⁴ Ku ade thöny kɔ̈k kathiërrou ku ŋuan ke ke cï thööny gɛɛu cil: ku yɛn ë röördït tïŋ kathiërrou ku ŋuan ke ke rɛ̈ɛ̈r, aceŋkï lupɔɔ ɣer: ku ceŋkï gööl ke dhuëëŋ ë kenïïm gööl ke adhääp.

⁵ Ku bɔ̈ wilëdeŋ bei ë thöönydïtic ku määrëdeŋ ku kɔc röt. Ku nu mɛ̈ckealath kadhorou ke ke dɛ̈p ë thöönydït nɔm tueŋ, kek aye Wëi ke Nhialic kadhorou.

⁶ Ku nu kë cït wɛ̈ɛ̈r ë acidhath ë thöönydït nɔm tueŋ, cït kuur cɔl kuruthalo. Ku läi kaŋuan anukï ë kaam de thöönydït kekë thöny kɔ̈k ee thöönydït geeu, läi cï gup thiäŋ ë nyïïn, tueŋ ku ciëën.

⁷ Ku lɛ̈n tueŋ acït guöp köör, ku lɛ̈n ee kek rou acït guöp thɔn, ku lɛ̈n ee kek diäk acït nyin raan, ku lɛ̈n ee kek ŋuan acït aduŋuɛɛt ee riŋ nhial.

⁸ Ku läike kaŋuan adekï kɔ̈ɔ̈th wuök kadhetem kedhie, ku acïk thiäŋ ë nyïïn biäk biic ku keyiic thïn, ku acïkï ee lɔ̈ŋ aköl ayï wakɔ̈u, ayek lueel, an, “Aɣeric, Aɣeric, Aɣeric, yen Bɛ̈nydït Nhialic Awärjäŋ, Bɛ̈nydït ë nu, ku nu, ku bï bɛ̈n.”

⁹ Ku të ye läike Bɛ̈nydït leec ku riëëukï ku luelkï, an, Thieithieei Bɛ̈ny rɛ̈ɛ̈r ë thöönydït nɔm Bɛ̈ny pïïr aɣet athɛɛr,

¹⁰ ke röördït kathiërrou ku ŋuan ke ke ye röt jɔ cuat piny ë Bɛ̈nydït nɔm Bɛ̈ny rɛ̈ɛ̈r ë thöönydït nɔm, ku yek Bɛ̈nydït lam Bɛ̈ny ë pïïr aɣet athɛɛr ya, ku yek göölkɛn ë dhuëëŋ cuat ë thöönydït nɔm tueŋ, ku yek lueel an,

¹¹ “Ee kë rɔ̈ŋ ke yïn, yïn Bɛ̈nydït, luɔi bï yïn lɛc yök ku yök riëëu ku riɛldït. Ë luɔi cï yïn käŋ cak kedhie, ku në këde piɔ̈ndu yen anu kek, ku yen aa ciɛkë ke.”