Nyuuth 22 - JAM DE NHIALIC 2011

¹ Na wën, ke tunynhial nyuth ɛn kiir ë pïïu ke pïïr, kiir ee pïïuke lɔ kïr cït man ë kuruthalo, ke bɔ̈ bei ë thöönydïtic thöönydïït ë Nhialic kekë Nyɔŋamääl, tëëk ë kueerdeyic cil.

² Ku tim ë pïïr anu ë kiir nɔm lɔŋë, tim ee luɔk ë mïth ee yiic thiëër ku rou, ee luɔk ë pɛ̈i nyïïn kedhie: ku yïth ke tim aye ke tɔ ye wɛ̈ɛ̈l ee juöör tɔ dem.

³ Ku acïn aciɛɛn bï bɛ nu ë pänydïtic. Ku thöönydïït ë Nhialic kekë Nyɔŋamääl abïk nu thïn: ku abïï lïïm ke aa lam.

⁴ Ku abïk tïŋ nyin, ku tɔ̈u rinke ë kenyïïn tueŋ.

⁵ Ku acïn wakɔ̈u bï bɛ nu, ku acïkï manyëalath ee kɔɔr, ayï ruɛl ë akɔ̈l, Bɛ̈nydït Nhialic en abï pinyden riaau, ku abïk piny cieŋ aɣet wadäŋ thɛɛr.

Bɛ̈n de Yecu

⁶ Go ya yɔ̈ɔ̈k, an, “Wëlkë alek gɔk ku yek yith. Ku Bɛ̈nydït Nhialic de tït ɣerpiɔ̈ɔ̈th, yen aa toc tunynhialde, le lïïmke nyuöth ka bï dhil dap tïc.

⁷ Ya kï, bɔ̈yë ënɔɔnë. Thieithieei raan ë wël cï guiir döt wël ke awerekë yic.

⁸ Ku yɛn Jɔn yɛn ë kakë piŋ ku tiëŋ ke. Na wën, aa cä ke piŋ ku tiëŋ ke, ke ya cuat rɔt piny ke ya läm ë tunynhial cök tuny ë nyuth ɛn ee kakë.

⁹ Go ya yɔ̈ɔ̈k, an, “Acie yen! Yɛn ee lïm wo yïn ëtök, ku ya lïm wokë tït mïthëkɔckun, ku kɔc ee wël ke awerekë döt: ye Nhialic lam!”

¹⁰ Go ya yɔ̈ɔ̈k, an, “Du wël cï guiir bot thook wël ke awerekë, piny acï thiɔ̈k.

¹¹ Raan racpiɔ̈u, ke tɔ̈u ke racpiɔ̈u: ku raan nhiany piɔ̈u, ke tɔ̈u ke nhiany piɔ̈u: raan piɛthpiɔ̈u, ke tɔ̈u ke piɛthpiɔ̈u, ku raan ɣeric, ke tɔ̈u ke ɣeric.”

¹² Go Yecu lueel an, “Ya kï, bɔ̈yë ënɔɔnë, ku yɛn cath wo ariöpdiën bä gäm raan ëbɛ̈n në kë rɔ̈ŋ ke luɔide.

¹³ Yɛn aye tueŋ ku ya ciëën, göl ë käŋ ku thök ë käŋ.”

¹⁴ Thieithieei kɔc ë lööŋkë döt, ke ke bï dɛ riɛl bï kek lɔ të nu tim de pïïr, ku tëkkï ë thook ke kal lek pänydït.

¹⁵ Ku jɔ̈k, ku kɔc ee thuëth, ku kɔc ee diäär kɔɔr, ku kɔc ee kɔc nɔ̈k akurkï, ku kɔc ee yiëth lam, kek atɔ̈ukï biic, ayï raan ëbɛ̈n raan nhiaar lueth ku ye lueth töör.

¹⁶ Yɛn Yecu, yɛn ë tunydiën nhial tooc bï week lëk kakë në këde ɣööt ke Nhialic. Yɛn ee meei de Debid, ku ya mɛnh dhiënde, ku ya ciëër ee piny riaau ciëër ë runëpiny.

¹⁷ Wëidït ku Nyɔŋamääl aluelkï, an, “Bä!” Ku raan pïŋ, ë lueel, an, “Bä!” Ku raan cï yal, ë bɔ̈, ayï raan de piɔ̈u keek, ë nöm pïïu ke pïïr youyou.

Thök

¹⁸ Yɛn lëk raan ëbɛ̈n raan ë wël cï guiir piŋ wël ke awerekë yic, an, Na de raan bï wëlkë ŋuak ë wël kɔ̈k, yen abïï Nhialic ŋuak ë riääk cï gɔ̈ɔ̈r ë awerekë yic.

¹⁹ Ku na de raan bï wël kɔ̈k jɔt ë wël cï guiirë yiic wël ke awerekë, ke biäkde abïï Nhialic jɔt ë awerek de pïïric, ku pänydïït ɣeric, ka cï gɔ̈ɔ̈r ë awerekë yic.

²⁰ Cäätɔ luel kakë alueel, an, “Ee yic, ya kï bɔ̈yë ënɔɔnë. Amiin!” Bä, Bɛ̈nydït Yecu!

²¹ Ë dhuëëŋ de Bɛ̈nydan Yecu Kërtho piɔ̈u ë ye tɔ̈u ke kɔc ɣerpiɔ̈ɔ̈th kedhie. Amiin.