Nyuuth 21 - JAM DE NHIALIC 2011

Paannhial cï Piac Cak ku Piny cï Piac Cak

¹ Na wën, ke ya tïŋ paannhial cï piac cak ku piny cï piac cak, luɔi cï paannhial tueŋ jäl ayï piny tueŋ: ku acïn wɛ̈ɛ̈r be nu.

² Ku tiëŋ pänydït ɣeric, Jeruthalem cï piac cak, ke bɔ̈ piny paannhial, abɔ̈ tëde Nhialic, acï rɔt guik cït man ee nyan thiak rɔt kiir në këde monyde.

³ Guɔ röl dïït ë raan piŋ abɔ̈ paannhial, lueel, an, “Tiëŋkï, paany de Nhialic atɔ̈u ke kɔc, ku abï rëër ke keek, agokï aa kɔcke, ku Nhialic guöp abï tɔ̈u ke keek, ago aa Nhialicden:

⁴ ku abï pïïu ke kenyïïn weec ë kenyïïn kedhie, ku thuɔɔu acïï bï be nu, ayï jiɛthëpiɔ̈u, ku dhiëëu, ku arɛɛm, acïkï bï bɛ nu: ka tueŋ acïk jäl ëliŋliŋ.”

⁵ Go Raan rɛ̈ɛ̈r ë thöönydït nɔm lueel, an, “Tiëŋkï, yɛn nyɔk käŋ ë luɔi kedhie!” Go ya yɔ̈ɔ̈k an, “Gäär: luɔi le wëlkë gɔk ku yek yith.”

⁶ Go ya yɔ̈ɔ̈k an, “Ë thök! Yɛn ee tueŋ ku ya ciëën, göl ë käŋ ku thök ë käŋ. Raan cï yal abä miɔɔc ë awaŋ de pïïu ke pïïr në dhuëëŋ.

⁷ Raan ë tiam abï käŋ lɔ̈ɔ̈k lak kedhie, ku yɛn bï aa Nhialicde, ku abï aa wëndï.

⁸ Ku na ariɔ̈c, ku kɔc reec gäm, ku kɔc nhiany piɔ̈ɔ̈th, ku kɔc ee kɔc nɔ̈k akurkï, ku kɔc ee diäär kɔɔr, ku kɔc ee thuëth, ku kɔc ee yiëth lam, ku aluɛth kedhie, këden ee täu bï kek tɔ̈u ë baar ë dëp ë macic ku thulpuric, yen aye thon ee kek rou.”

Jeruthalem cï Piac Cak

⁹ Na wën, ke tunynhial bɔ̈ tunynhial tök në tuuc kadhorou yiic tuuc wën cath ë guöl kadhorou, guöl cï thiäŋ ë ka ye piny riɔ̈ɔ̈k kadhorou ka bɔ̈ ciëën, bï ku jiɛɛm ke yɛn, lueel, an, “Bä eenë, yïn bä nyuöth nyan thiak, tiiŋ de Nyɔŋamääl.”

¹⁰ Go ya jɔt në riɛl ë Wëidït leer ɛn ë gök de kuurdït bäär nɔm, ku jɔ a nyuöth pänydït ɣeric Jeruthalem, ke bɔ̈ piny paannhial tëde Nhialic,

¹¹ ke cath ke dhuëëŋ de Nhialic, ku ɣɛɛrde acït kuur lɛ̈ɛ̈k tuc ë ɣööcde, acït kuur cɔl jathpi, ë lɔ kïr cït man ë acidhanh cɔl kuruthalo.

¹² Ku acï geeu ë gök de kal bäär, ku ade thook kathiëër ku rou, ku kääc tuucnhial kathiëër ku rou ë thook ke kal, ku thook ke kal acï ke gäär kɔ̈ɔ̈th rin, rin ke dhiëën ke wɛ̈ɛ̈t ke Yithriɛl kathiëër ku rou.

¹³ Biäk lɔ aköl amiäk ade thook kadiäk, ku biäk lɔ rutë ade thook kadiäk, ku biäk lɔ wöuwicë ade thook kadiäk, ku biäk lɔ aköl athɛ̈i ade thook kadiäk.

¹⁴ Ku kal ë pänydït ade këërkëër kathiëër ku rou, këërkëër cï rin ke tuuc ke Nyɔŋamääl kathiëër ku rou gɔ̈ɔ̈r ë kenïïm.

¹⁵ Ku tunynhial wën jam ke yɛn aa muk wai ë adhääp bï en dït ë pänydït bɛ̈n them, ku them dït ë thook ke kal ku dït ë kalde.

¹⁶ Ku pänydït ade aguuk kaŋuan, ku bɛ̈ɛ̈r de yenkɔ̈u akït ke päu le yenic päuwäu: go pänydït them ë wai, ago ya agum de meel ku bot kathiërdhïc: bɛ̈ɛ̈r de yenkɔ̈u ku päu le yenic päuwäu ku bɛ̈ɛ̈r bɛ̈ɛ̈r en akïtkï.

¹⁷ Go bɛ̈ɛ̈r ë kalde nɔm them, ago ya akeem kabɔt ku thiërŋuan ku ŋuan, raan kaam en aa them en en, yen aye kaam de tunynhial.

¹⁸ Ku kal acï yïk ë kuur cɔl jathpi: ku pänydït yen aye adhäm awai, cït acidhath awai.

¹⁹ Ku këërkëër ke kal ë pänydït acï ke kiir ë kuur kith yiic läk nyïïn. Këërkëër tueŋ ee jathpi, kë ye kek rou, ee thapiro, kë ye kek diäk, ee agat, kë ye kek ŋuan, ee ameral,

²⁰ kë ye kek dhïc ee onik, kë ye kek dhetem, ee thardiɔn, kë ye kek dhorou, ee kurithilo, kë ye kek bɛ̈t, ee beril, kë ye kek dhoŋuan, ee topadh, kë ye kek thiëër, ee kuruparatho, kë ye kek thiëër ku tök, ee jakintho, kë ye kek thiëër ku rou, ee amethit.

²¹ Ku kɛ̈l thook kathiëër ku rou ayek margaritii kathiëër ku rou, thoŋ tök ee margariti tök, ku thoŋ tök ee margariti tök, aɣɔ̈l keek kedhie: ku kueer ë pänydït ee adhäm awai, cït man ë acidhath lɔ kïr.

²² Ku acïn luaŋdïït cä tïŋ thïn: Bɛ̈nydït Nhialic Awärjäŋ, kekë Nyɔŋamääl, kek aye luaŋdït.

²³ Ku pänydït acïï akɔ̈l ee kɔɔr, ayï pɛɛi, lek ruɛl thïn: dhuëëŋ de Nhialic yen aaye pinyde riaau, ku nyɔŋamääl yen aye maanyde.

²⁴ Ku juöör abïk aa cath ë ɣɛɛrdeyic: ku meliik ke piny nɔm ayek dhuëëŋden bɛ̈ɛ̈i thïn ku riëëuden.

²⁵ Ku thok ke kalde acïkï bï aa thiöök aköl ananden, ku piny abï ciën wakɔ̈u ëtɛ̈ɛ̈n.

²⁶ Ku abïk dhuëëŋ de juöör bɛ̈ɛ̈i thïn ayï riëëuden.

²⁷ Ku acïn kënhiɛɛny bï lɔ thïn ëliŋliŋ, ayï raan ee kënhiany looi, ayï raan ee lueth töör: ee kɔc cï gɔ̈ɔ̈r rin në awerek de Nyɔŋamäälic awerek de pïïr keek kapäc kek abï lɔ thïn.