Nyuuth 2 - JAM DE NHIALIC 2011

Jam Gɛ̈ɛ̈rë Epetho

¹ Gäärë tunynhial de ɣön ë Nhialic nu Epetho alë: Kakë aluel raan keek, raan muk kuɛl kadhorou ë ciin cuënyde, raan cath ë kuc ke mɛ̈ckealath ë adhääp kadhorou yiic cil:

² Yɛn ŋic luɔidu, ayï luɔiduön tuc, ayï liɛɛr ë yïnpiɔ̈u, ku luɔi cïï yïn këde kɔc rac duëër guum, ku thëm cï yïn kɔc them kɔc ee röt tɔ ye tuuc ku cïkï ye tuuc, ago ke yök aye aluɛth.

³ Ku ŋiɛc guöm ee yïn käŋ guum ë liɛɛr ë yïnpiɔ̈u në baŋ de rinkï, ku näŋ ee yïn rɔt näk piny ë luɔi ku cïï bäp.

⁴ Ku ade cöök bän yïn jɔ̈ɔ̈ny, ee luɔi cï yïn nhiëërduön tueŋ pɔ̈l.

⁵ Tak yïnɔm ë të wään lööny yïn thïn, ku puk yïpiɔ̈u, bä luɔi tueŋ wään looi, be, an, cïï e loi, ke yɛn bï dap bɛ̈n tëde yïn, bä ku nyaai manyalath tëde, të kën yïn yïpiɔ̈u puk.

⁶ Ku cöökë ee këduön piɛth, män mɛɛn yïn luɔi de Nikolaitai, luɔi maan aya.

⁷ Raan de yïc, ke piŋ kë lëkë Wëidït ɣööt ke Nhialic. Raan ee tiam, abä päl cäm ë tim de pïïr, tim nu Paraditho de Nhialic.

Jam Gɛ̈ɛ̈rë Thumurna

⁸ Ku gäär tunynhial de ɣön ë Nhialic nu Thumurna alë: Kakë aluel raan keek, raan tueŋ ku ye raan ciëën, raan ëcï thou, ku be pïïr:

⁹ Yɛn ŋic luɔidu, ku ŋiɛc katuc ee yïn dhal, ayï kuany cï yïn nyin kuany (ku yïn cï bäny), ku ŋiɛc lɛ̈ɛ̈t rɛɛc de kɔc ee ye lueel, an, yek Judai, ku cïkï ye Judai, ku yek luaŋ de Catan.

¹⁰ Du riɔ̈c ëtaitai në ka bä guum. Tïŋ, jɔŋdït rac akɔɔr luɔi bï en kɔc kɔ̈k ë weyiic cuat ë aloocic, luɔi bï we them, ku we bï këtuc dhal week yök ë nïn kathiëër. Ee gämdu döt a thou yïn, ke yïn bä miɔɔc nɔm ë göl ë pïïr.

¹¹ Raan de yïc, ke piŋ kë lëkë Wëidït ɣööt ke Nhialic. Raan ee tiam acïï thon ee yic rou bï nɔ̈k.

Jam Gɛ̈ɛ̈rë Pergamo

¹² Ku gäär tunynhial de ɣön ë Nhialic nu Pergamo alë: Kakë aluel raan keek, raan muk abätäu moth ë thook kaarou:

¹³ Yɛn ŋic luɔidu, ku ŋiɛc të tɔ̈u yïn thïn, yen të nu thööny ë Catan, ku yïn ee rinkï döt ë muk, ku kɛ̈në gäm gɛm yïn ɛn jai, acakaa kööl ɣɔn nu Antipa cäätɔdiën adöt, raan cï nɔ̈k ë weyiic, të ye Catan rëër.

¹⁴ Ku yɛn cath wo cök liaakäŋ cök bän yï jɔ̈ɔ̈ny, cöök tök kï, nɔn de yïn kɔc ëtɛ̈ɛ̈n kɔc ee wëët ë Balaam muk, raan ɣɔn wëët Balak, an, bï kë bï kɔc tɔ kɔ̈th cuat kueer ë mïth ke Yithriɛl, an, bï ka cï lam aa cam, ku bïk diäär aa kɔɔr.

¹⁵ Ku cöökë aya, nɔn de yïn kɔc ë wëët ë Nikolaitai muk aya.

¹⁶ Yen puk yïn yïpiɔ̈u, be, an, jai, ke yɛn bï dap bɛ̈n tëde yïn, bä bɛ̈n biök wo keek në abätäu de yɛnthok.

¹⁷ Raan de yïc, ke piŋ ke lëkë Wëidït ɣööt ke Nhialic. Raan ee tiam, abä päl cäm ë mana cï thiaan, ku abä miɔɔc në kɔi ɣer, kɔɔi cïï rin ë piɛc cak gɔ̈ɔ̈r ë yekɔ̈u, rin cïn raan ŋic keek, ee raan cï gäm en etök.

Jam Gɛ̈ɛ̈rë Thuatira

¹⁸ Ku gäär tunynhial de ɣön ë Nhialic nu Thuatira alë: Kakë aluel Wën ë Nhialic keek, raan cït nyin liem ë mac, ku cït cök maläŋ cï lɔ bilbil:

¹⁹ Yɛn ŋic luɔidu, ku nhiëërdu, ku kuny ee yïn kɔc kony, ku gämdu, ku liɛɛr ë yïnpiɔ̈u, ku ŋiɛc luɔiduön ciëën nɔn wɛ̈ɛ̈r en luɔiduön tueŋ.

²⁰ Ku yɛn cath wo cöök bän yïn jɔ̈ɔ̈ny, päl ee yïn tiiŋ cɔl Jedhebel pɔ̈l, tiiŋ ee rɔt tɔ ye tiiŋ tiët, ku ye lïïmkï wɛ̈ɛ̈t, mɛth en keek, an, bïk diäär aa kɔɔr, ku bïk ka cï läm yiëth aa cam.

²¹ Ku acä gäm akööl, an, bï yepiɔ̈u yiɛ̈n puk ë kɔ̈ɔ̈r ee yen röör kɔɔr, ku reec e piɔ̈u puk.

²² Tïŋ, abä cuat në agen nɔm, yen kekë röör ë tɔ̈u në yen ëtök, bï këtuc ke dhal aläl, të reec kek kepiɔ̈ɔ̈th puk në luɔidɛn yek looi.

²³ Ku mïthke abä ke nɔ̈k abïk thou, ku abï ɣööt ke Nhialic ŋic kedhie, nɔn aa yɛn raan ee kɔc caath piɔ̈ɔ̈th, ku wɔi kë nu ee kɔc yiic thïn: ku yɛn bï raan ëbɛ̈n gäm kë rɔ̈ŋ ke luɔide week wedhie.

²⁴ “Ku wek yɔ̈ɔ̈k, ku yɔ̈ɔ̈k kɔc kɔ̈k nu Thuatira, të de en kɔc cïï wëëtë ee muk, kɔc kuc kathuth ke Catan, acït man ee kek e lueel, wek yɔ̈ɔ̈k, an, Acïn kethieek däŋ bä tääu ë weyiëth.

²⁵ Ku kë cath ke week ënɔɔnë tei, yak muk aril aɣet të bän bɛ̈n.

²⁶ Ku raan ë tiam, raan ë luɔidï döt athöökë käŋ, yen abä gäm riɛl ë juöör nïïm:

²⁷ ku abï keek aa cieŋ në thieny wëëth, ku abïk thou abïk lɔ thorthor cït man ë töny ke tiɔp, acït man ë riɛl cä yök tëde wäär:

²⁸ ku abä gäm ciëër ë runëpiny.

²⁹ Raan de yïc, ke piŋ kë lëkë Wëidït ɣööt ke Nhialic.