Nyuuth 19 - JAM DE NHIALIC 2011

¹ Na wën, aacï kakë thök, ke ya piŋ röl dïït ë kut dïït ë kɔc paannhial, ke luelkï an, “Aleluya! Kunydewëi, ku dhuëëŋ, ku riëëu, ku riɛldït, ayek kake Bɛ̈nydït Nhialicda!

² Lööŋkɛn cï guiir ayek yith ku piɛthkï ëgɔk, luɔi cï en löŋ de gök de akɔɔrröör guɔ guiir atuc, akɔɔrröör wään cï piny riɔ̈ɔ̈k ë bɛɛlde, ago riɛm de lïïmke guöör ëliŋliŋ ë yen.”

³ Gokï bɛ lueel, an, “Aleluya! Ku tolde ee lɔ nhial aɣet athɛɛr ya!”

⁴ Go röördït kathiërrou ku ŋuan ku läi kaŋuan gokï röt cuat piny lamkï Nhialic Raan rɛ̈ɛ̈r ë thöönydït nɔm, ku luelkï an, “Aleluya, Amiin!”

Këcamdïït ë Dhuëëŋ de Nyɔŋamääl

⁵ Ku bɔ̈ röl ë raan bei ë thöönydïtic, lueel, an, “Lɛckï Nhialicda, wek lïïmke kedhie, wek kɔc ee ye riëëu, kɔc kor ayï röördït!”

⁶ Guɔ röl piŋ röl cït röl ë kut dïït ë kɔc, ku cït awuööu de piëëu, ku cït röl dïït ë deŋ të mɛ̈ɛ̈r en arëët, ke luelkï, an, “Aleluya! Bɛ̈nydït Nhialicda Awärjäŋ, ee Melik!

⁷ Jɔku piɔ̈ɔ̈th miɛt ku doorku, ku lecku nɔm, luɔi cï thiëŋ de Nyɔŋamääl bɛ̈n, ku tiiŋde acï rɔt guik.

⁸ Ku acï gäm piöth bï en rɔt piɔ̈th ë lupɔ piɛth lɔ mot, lupɔ ɣer ëpak ku le riauriau.” (Lupɔ piɛth lɔ mot en aye luɔi piɛth ee kɔc ɣerpiɔ̈ɔ̈th looi.)

⁹ Ku yöök tunynhial ɛn, an, “Gäär, an: Thieithieei kɔc cï cɔɔl ë këcam de thiëŋ de Nyɔŋamääl.” Go lɛ̈k ɛn, an, “Wël ke Nhialic ka, wël yith.”

¹⁰ Guɔ rɔt cuat piny ë yecök, an, ja lam. Go ya yɔ̈ɔ̈k, an, “Acie yen! Yɛn ee lïm wo yïn ëtök, ku ya lïm wokë mïthëkɔckun ëtök kɔc ee ya cäätɔɔ ee jam de Yecu döt: ye Nhialic lam!” Wëi ke guiëërëwël kek aye cäätɔ luel këde Yecu.

Raan Cath ë Jöŋgör Akuur Kɔ̈u

¹¹ Na wën, ke ya tïŋ paannhial aɣɔ̈ɔ̈r, na wën, ke jöŋgör akuur tul, ku raan rɛ̈ɛ̈r ë yekɔ̈u, acɔl Adöt ku cɔl Yic, ku ee piathëpiɔ̈u yen aye löŋ guiir ku yen aye tɔŋ lɛɛr.

¹² Ku acït nyin liem de mac, ku nu gööl juëc ke dhuëëŋ ë yenɔm, ku acath ke rin cï gɔ̈ɔ̈r rin cïn raan ŋic ke, ee yen ŋic ke yetök.

¹³ Ku aceŋ lupɔ ë yekɔ̈u, lupɔ cï juɔɔl ë riɛm: ku rinke acɔlke Jam ë Nhialic.

¹⁴ Ku kuany cök ë rɛm ke tɔŋ, rɛm nu paannhial ke ke cath ë jöŋgöör akuur kɔ̈ɔ̈th, ku ceŋkï lupɔ piɛth lɔ mot ɣer ëpak ku le riauriau.

¹⁵ Ku bɔ̈ abätäu moth bei ë yethok, bï en juöör kip: ku abï ke jɔ cieŋ ë thieny wëëth: go kën ee mïth ke enap dhiim thïn duöm piny, aye mɔ̈u, mɔ̈n ë tuöc de agönhdïït ë Nhialic Awärjäŋ.

¹⁶ Ku acath ke rin cï gɔ̈ɔ̈r ë lupɔde kɔ̈u ku gäär ë yeɣäm an, “MELIK NU Ë MELIIK NÏÏM, KU BƐ̈NYDÏÏT NU Ë BÄNYDÏT NÏÏM.”

¹⁷ Na wën, ke ya tïŋ tunynhial tök ke kääc ë akɔ̈lic, go cööt ë röl dït, yöök diɛt ee riŋ nhial ëbɛ̈n ë kaam de nhial ku piny, an, “Bäkï, guɛ̈ɛ̈rkï ë këcam dïït ë Nhialic,

¹⁸ bäk rïŋ ke meliik bɛ̈n cuet, ku cuɛtkï rïŋ ke bäny ke rɛm, ku rïŋ ke jööt ril, ku rïŋ ke joŋgöör ku kɔc rɛ̈ɛ̈r ë kekɔ̈ɔ̈th, ku rïŋ ke kɔc kedhie, kɔc lääu nïïm ku lïïm, ayï kɔc kor ayï röördït.

¹⁹ Na wën, ke ya tïŋ lɛ̈n rac, ku tiëŋ Meliik ke piny nɔm, kekë rɛmkɛn ë tɔŋ, acïk kenïïm kut bïk tɔŋ bɛ̈n yiɛ̈n Raan rɛ̈ɛ̈r ë jöŋgör kɔ̈u, kekë remdɛn ë tɔŋ.

²⁰ Na wën, ke jɔ lɛ̈n rac dɔm, ku dɔm tiët alueeth ke yen ëtök, tiët wään ee göök gɛ̈iyë looi ë yenɔm, göök wään ee yen ke kɔc math kɔc cï röt tɔ gäär ë gäär de lɛ̈n rac, ku yek këcïcuëëc cït guöp en lam. Ku cuɛtë ke ë macic kedhie kaarou ke ke pïïr, cuɛtë ke ë baaric baar ee dëp ë thulpur.

²¹ Ku nɛ̈k kɔc wën cï döŋ në abätäu de raan rɛ̈ɛ̈r ë jöŋgör kɔ̈u, abätäu bɔ̈ bei ë yethok: go diɛt kuɛth ëbɛ̈n ë rïŋken.