Nyuuth 18 - JAM DE NHIALIC 2011

Wïïk de Babilon

¹ Na wën, aacï kakë thök, ke ya tïŋ tunynhial däŋ ke bɔ̈ piny paannhial, ke cath ke riɛldït, go piny riaau ë dhuëëŋde.

² Go cööt arëët ë röl dït, an: “Babilon dït acï wïïk, acï wïïk, ka cï aa panɔm de jɔɔk rac, ku ye të cï atïptïïp ke jaak nhiany mac thïn ëbɛ̈n, ku mɛcë diɛt rac nhiany thïn ëbɛ̈n aya.

³ Ë luɔi cï juöör ëbɛ̈n dek në mɔ̈ndɛn ë agɔ̈th, agönh ë bïïyë bɛɛlde, ku meliik ke piny nɔm aake ye lɔ në yen, ku ajalɛɛp ke piny nɔm aake cï kuɛth ë wëu në juëc de kakɛn mit ee kɔɔr.”

⁴ Guɔ röl däŋ ë raan piŋ, röl bɔ̈ paannhial, lueel en, an: “Bäkï bei thïn, wek kɔckï! Ke we cïï bï mat në yen ëtök në karɛcke, ke we bï liu ë kakɛn riäk en yiic!

⁵ Karɛcke acïk kenïïm kut ka cïk paannhial cuööp, go Nhialic enɔm tak ë luɔidɛn rɛɛc ye looi.

⁶ Luöikï kë cït kë wään bï luöi week, luöikï kë cït këde luɔide ku ŋuakkï nyin raanrou. Bïnydɛn wään cï thiɔ̈ɔ̈ŋ tɔ dɛkkï, jakï thiɔ̈ɔ̈ŋ raanrou takï dek.

⁷ Lɛc ee yen rɔt leec, ku kuɛth ee yen kuɛth ë kamit. Yen acït lɛ̈ŋ bä wek e leeŋ wëi ku dhiën bä wek e tɔ dhiau: Në luɛl ee yen e lueel ë yepiɔ̈u, an: ‘Yɛn rɛ̈ɛ̈r ke ya ye melik tik! Ku cä ye thuööm, ku yɛn cïï dhiëëu bï tïŋ anandï.”

⁸ Yen abï ka bï e riɔ̈ɔ̈k bɛ̈n ëkööl tök, thuɔɔu, ku dhiëëu, ku cɔŋdït. Ku abï lɔ kuith piny ë mac, luɔi rilë Bɛ̈nydït Nhialic Raan guiir löŋde.”

⁹ Ku meliik ke piny nɔm, meliik wään ee lɔ në yen, ku cïk kuɛth ë këmit në yen ëtök, abïk en dhiëëu, ku biëkkï keyöth, të woi kek tol nyop en,

¹⁰ ke ke kääc tëmec në riɔ̈ɔ̈c cï kek riɔ̈ɔ̈c ë lɛ̈ŋ cï e leeŋ wëi, ku luelkï, an, “Amawoou! Madinoou! Gök de pänydït Babilon, pänydïït ril! Ee thaar tök en aa yök yïn këduön tuc!”

¹¹ Ku dhiëëu ajalɛɛp ke piny nɔm ku biëkkï keyöth, në ciën cïn en raan ee kaken bɛ ɣɔɔc,

¹² kakɛn ë adhääp, ku ateek, ku kɔi lɛ̈k tuc ë ɣööcden, ku kɔi cɔl margariti, ku lupɔ piɛth lɔ mot, ku lupɔ thiith amujuŋ, ku lupɔ cɔl ariir, ku lupɔ thith, ku tiim kith ë ŋiëërdenic, ku ka ye looi ë lëny akɔ̈ɔ̈n ëbɛ̈n, ku ka ye looi ë tiim lɛ̈k tuc ë ɣööcden ëbɛ̈n, ku maläŋ, ku wëëth, ku gomgooi,

¹³ ku wɛ̈ɛ̈l cɔl kinamon, ku mer, ku wal ŋïr, ku miök tum, ku libano, ku mɔ̈u, ku miök, ku agamɔ lɔ mot, ku agamɔ kënë guöör, ku ɣɔ̈k, ku thök, ku jöŋgöör, ku abëël, ku lïïm, ku wëi ke kɔc.

¹⁴ Ku kamit cï luɔk kak ee yïn ke ŋɔ̈ŋ acï ke jɔt tëde yïn, ayï kamit cuai ku ka läk acï ke jɔt tëde yïn kedhie, ku acïï ke bï bɛ yök anandu.

¹⁵ Ku ajalɛɛp wään ee kakë ɣaac, kɔc wään cï tɔ kueth ë wëu, abïk kɔ̈ɔ̈c tëmec në riɔ̈ɔ̈c bï kek riɔ̈ɔ̈c ë lɛ̈ŋ bï e leeŋ wëi, ke ke dhiau ku biëkkï keyöth, an:

¹⁶ “Amawoou, gök de pänydïït oou, pänydït wään ye lupɔ piɛth lɔ mot cieŋ, ku ceŋ lupɔ thiith amujuŋ, ku lupɔ thith ëgoi, ku ye rɔt kiir ë adhääp, ku kɔi lɛ̈k tuc ë ɣööcden, ku margariti!

¹⁷ Ee thaar tök tei en aa riëëkë wëu juëc cït ee kakë.” Ku bäny ke abëël wïïr kedhie, ku rem nu ë abëël yiic ëbɛ̈n, ku kɔc ee ka ke abëël looi, ku kɔc ee käŋ ɣɔɔc ë wɛ̈ɛ̈ric ëbɛ̈n, aake kääc tëmec,

¹⁸ ku cötkï, të woi kek tol nyop en, luekï, an, “Ee pänydïïtou kït kekë pänydïïtë?”

¹⁹ Agokï abuui dɛɛny ë kenïïm, kiiukï, ku dhiaukï, ku biëkkï keyöth, luelkï, an, “Amawoou! Madinoou, gök de pänydït oou! Pänydïït cï kɔc tɔ kueth ë wëu thïn kedhie, kɔc de abëëlkɛn ee cath ë wɛ̈ɛ̈ric, në juëc juëc ë wëuke! Ee thaar tök tei en aa tɔ ye kuany nyin oou!”

²⁰ Jakï piɔ̈ɔ̈th miɛt ë yen, yïn paannhial, ku wek kɔc ɣerpiɔ̈ɔ̈th, ku wek tuuc, ku wek tït, luɔi cï Nhialic we guöör në guiëër cï en löŋde guiir atuc!

²¹ Na wën, ke tunynhial ril aläl kuany kuur cït kuurdïït ee guär, deeny ë wɛ̈ɛ̈rdïtic, lueel, an, “Dhuur bï gök de pänydït Babilon dhuöör piny ë rup kï, ku cïï bï bɛ tïc ëliŋliŋ.

²² Ku acïn din ee kɔc thoom gut, ku din ee kiit, ku luɔɔu ee kɔc ee kɛŋ thiikë kooth, ku din ee kɔc ee kɛŋdït kooth, acïn dindɛn bïï bɛ aa piŋ ë yïyic ëtaitai, ku acïn atën bï bɛ yök ë yïyic ëtaitai, nɔn ee yen atën ë luɔiyou, ayï dhiën ë kuur ee guär, acïï bï bɛ aa piŋ ë yïyic ëtaitai:

²³ ku ɣɛɛr ë manyëalath acïï piny bï bɛ aa riaau ë yïyic ëtaitai, ayï röl ë monythiëk kekë nyan thiak acïï bï bɛ aa piŋ ë yïyic ëtaitai: ajalɛɛpku aake ye bänydït ke piny nɔm, ku ë adhuɛ̈ɛ̈thdu en aaye juöör math ëbɛ̈n!”

²⁴ Ku riɛm de tït kekë kɔc ɣerpiɔ̈ɔ̈th acï yök ë yeyic, kekë riɛm de kɔc ɣɔn cï nɔ̈k ë piny nɔm kedhie.