Nyuuth 17 - JAM DE NHIALIC 2011

Akɔɔrröör cï Leec

¹ Na wën, ke tunynhial bɔ̈, tunynhial töŋ de tuuc kadhorou wën cath në guöl kadhorou, bï ku jiɛɛm ke yɛn, lueel, an, “Bä eenë, bä yï nyuöth guiëër cï löŋ de akɔɔrröör guiir atuc, akɔɔrröör rɛ̈ɛ̈r ë piëëu juëc nïïm,

² yen akɔɔrröör ë ye meliik ke piny nɔm thut, ku ye kɔc rɛ̈ɛ̈r ë piny nɔm tɔ wit mɔ̈n ë bɛɛl de yen.

³ Go ya jɔt leer en ë jɔ̈ɔ̈ric në Wëidït: ku ja tik tïŋ ëtɛ̈ɛ̈n, ke rɛ̈ɛ̈r ë lɛ̈n rɛɛc thith kɔ̈u, lɛ̈n cï kɔ̈u thiäŋ ke rin ke lɛ̈ɛ̈t rac, ku ciɛth ke nïïm kadhorou, ku tuŋ kathiëër.

⁴ Ku ceŋ tik lupɔ thiith amujuŋ ku lupɔ thith, ku cï rɔt kiir ë adhääp ku kɔi lɛ̈k tuc ë ɣööcden, ku kɔi cɔl margariti, ku muk bïny ë adhääp ë yeciin bïny cï thiäŋ ë kanhiany ku ka ke bɛɛlde karɛc aläldïïtë,

⁵ ku ade rin cï gɔ̈ɔ̈r ë yenɔm tueŋ an, “KËCÏMOONY KA, Babilon DÏÏTË KÏ, MAN AKƆƆRRÖÖR KU YE MAN KANHIƐNY KE PINY NƆM.”

⁶ Guɔ tik tïŋ acï wit ë dëŋ ee yen riɛm de kɔc ɣerpiɔ̈ɔ̈th dek, ku riɛm de cäätɔɔ ke Yecu. Na wën, acä ye tïŋ, ke ya gäi ë gäi dït.

⁷ Go tunynhial a thiëëc, an, “Eeŋö ë yïn gäi?” Yïn bä lɛ̈k jam de këcïmoony, në biäk de tik, ku në biäk de lɛ̈n rɛɛc ë ye ɣääc, lɛ̈n cath ke nïïm kadhorou ku tuŋ kathiëër.

⁸ Lɛ̈n rɛɛc wën cï tïŋ aa nu, ku aliu, ku akɔɔr bɛ̈n bei ë adhum cïï thar tiëcic, le määr ëtaiwei. Ku kɔc rɛ̈ɛ̈r ë piny nɔm abïk gäi, kɔc kënë rinken gɔ̈ɔ̈r ë awerek de pïïric ɣɔn thɛɛr ciɛkë piny thar, të woi kek lɛ̈n rac, lɛ̈n ë nu, ku aliu, ku abï nu.

⁹ Täŋ ë pɛlënɔm kï: Nïïmke kadhorou ayek kurdït kadhorou, kur ë tik ke rëër ë kenïïm:

¹⁰ ku yek meliik kadhorou aya: dhïc acïk wïïk, ku tök anu, ku däŋ aŋoot wei, na miäk cï bɛ̈n, ka bï dhil tɔ̈u tëthiinakäŋ.

¹¹ Ku lɛ̈n rɛɛcë ë nu, ku cïï nu, yen aye bɛ̈tden, ku ye töŋ de dhorou yiic, ku alɔ määr ëtaiwei.

¹² Ku tuŋ kathiëër wën cï tïŋ ayek meliik kathiëër, meliik ŋoot ë ke kën paan cieŋkï yök, ku acï ke gäm biɔɔŋ bïk aa meliik ë thaar tök, në lɛ̈n rac ëtök.

¹³ Meliikkë löŋden akït, ku yek lɛ̈n rac yiɛ̈n riɛlden ku bɛ̈ɛ̈nyden.

¹⁴ Ku abïk tɔŋ yiɛ̈n Nyɔŋamääl, ku abï Nyɔŋamääl ke tiaam, luɔi ee yen Bɛ̈nydït ë bäny nïïm, ku ye melik ë meliik nïïm, ku kɔc cath në yen acï ke cɔɔl, ku cïke lɔc, ku yek adööt.”

¹⁵ Go lɛ̈k ɛn, an, “Piëëu wën cï tïŋ, të rëërë akɔɔrröör, ayek kɔc, ku kuut ke kɔc, ku juöör, ku liëp.

¹⁶ Ku tuŋ kathiëër wën cï tïŋ ë lɛ̈n rac nɔm, kek abïk akɔɔrröör maan guöp, ku tɔkï kuany nyin, ku cïn kɔ̈u lupɔ, ku abïk rïïŋde cuet, ku nyopkï ë mac.

¹⁷ Ee luɔi cï Nhialic löŋ tääu ë kepiɔ̈ɔ̈th, bïk këde piɔ̈nde looi, ke löŋden bï kït, agokï ciɛɛŋden gäm lɛ̈n rac, a thöökë wël ke Nhialic ë luɔi.

¹⁸ “Ku tiiŋ wën cï tïŋ ee gök de pänydïït ceŋ meliik ke piny nɔm.”