Nyuuth 16 - JAM DE NHIALIC 2011

Guöl ke Agönh ë Nhialic

¹ Guɔ röl dïït ë raan piŋ, röl bɔ̈ bei luɛɛk, ayöök tuucnhial kadhorou, an, “Jälkï, lak luööŋkï ka nu ë guöl yiic ë piny nɔm, guöl ke agönh tuc ë Nhialic.

² Go tunynhial tueŋ lɔ, le ku luuŋ gulde piny, go të rɛɛc tök aläldït tïc ë kɔc gup, kɔc de gup gäär ë lɛ̈n rac, ku yek këcïcuëëc cït guöp en lam.

³ Ku luuŋ renden gulde ë wɛ̈ɛ̈ric, go rɔt tɔ cït riɛm de raan cï thou, go ka pïïr ka de yiic wëi thou ëbɛ̈n, ka nu ë wɛ̈ɛ̈rdïtic.

⁴ Go diëëŋden gulde luööŋ ë kiɛɛr yiic ku awɛɛŋ ke piëëu yiic, gokï aa riɛm.

⁵ Guɔ tunynhial de pïïu piŋ a lueel, an, “Yïn piɛthpiɔ̈u, yïn Raan nu, ku yïn Raan ë nu, Raan ɣeric, në guiëër cï yïn löŋ guiir alë!

⁶ Luɔi ee kek riɛm de kɔc ɣeriic ku tït luööŋ wei, ku cï ke gäm riɛm dekkï: yen arɔ̈ŋ ke keek!

⁷ Guɔ yïïŋ de läm piŋ röl, ke lueel, an, “Yeka, yïn Bɛ̈nydït Nhialic Awärjäŋ, lööŋkuön cï guiir ayek yith ku cï ke tiiŋ yiic ëgɔk!”

⁸ Ku luuŋ ŋuɛɛnden gulde ë akɔ̈l nyin, go gäm nyum bï en kɔc nyop ë mac.

⁹ Go kɔc nyop ë tuöc dït: ku yek rin ke Nhialic läät Raan de riɛl ë ka ye piny riɔ̈ɔ̈kë nïïm, ku reeckï kepiɔ̈ɔ̈th puk piɔnykï.

¹⁰ Ku luuŋ dhïnyden gulde ë thöönydïït ë lɛ̈n rac nɔm, go pinydɛn ceŋ cuɔl abï aa cäär, gokï liëpken aa nyii në rɛm reemëke gup,

¹¹ ku yek Nhialic de paannhial läät në baŋ de rɛm reemëke gup ku në baŋ de tëtööken, ku reeckï kepiɔ̈ɔ̈th puk ë luɔidɛn rac.

¹² Ku luuŋ dhetemden gulde ë wɛ̈ɛ̈r ë Yuparatic, go pïïuke dëu, ke kueer bï luöi meliik bɔ̈ të lɔ aköl amiäk.

¹³ Na wën, ke ya tïŋ atïptïïp col kadiäk, cït gup aguek, ke ke bɔ̈ bei ë ŋuäl thok, ku lɛ̈n rac thok, ku tiët alueeth thok:

¹⁴ ayek atïptïïp ke jɔɔk rac, atïptïïp ee göök gɛ̈iyë looi, ku lekï biic lek të nu meliik ke piny nɔm ëbɛ̈n, lek ke kut nïïm në këde tɔŋ, tɔŋ de kööldïït ë Nhialic Awärjäŋ.

¹⁵ “Piɛŋkï! Ya kï, bɔ̈yë cït cuɛ̈ɛ̈r. Thieithieei raan ee yïn, ku ye lupɔɔke tiit, ke cïï bï aa cath ke cïn kɔ̈u lupɔ, bï kɔc ayärde tïŋ!”

¹⁶ Go ke kut nïïm të cɔl Armagedon në thoŋ ë Ɣeberuu.

¹⁷ Ku luuŋ dhoronden gulde ë yomic, ku bɔ̈ röl dït bei luɛɛk, luaŋ de paannhial, bï bei ë thöönydïtic, röl luel en, an, “Ë jɔ thök!”

¹⁸ Ku jɔ deŋ wil aläl, ku nu röt ke kɔc, ku määrëdeŋ, ku bɔ̈ niëŋ dïït nieeŋë piny rɔt, acïn kë cï kɔn ciët en ëcaŋɣɔn nu kɔc ë piny nɔm, yen dït ë niëŋ cï piny rɔt niɛŋ arëëtdïïtë!

¹⁹ Go pänydït e yic tek ë diäk, ku wiëëk pɛ̈ɛ̈nydït ke juöör: go Nhialic Babilon dït tak ë yenɔm, bï gäm bïny de yic mɔ̈n ë tuöc ë agönhdɛn dït.

²⁰ Go tuöör kat kedhie, ku cïn kuurdït be tïc.

²¹ Ku lööny kɔi dït piny nhial löönykï ë kɔc nïïm, thiek de kɔi tök akït kekë cuaal bɔ̈ɔ̈ric: go kɔc Nhialic aa läät në baŋ de riääk de kɔi, riääk riëëk en piny adït aläldïïtë.