Nyuuth 15 - JAM DE NHIALIC 2011

Tuucnhial Cath në Riääk Ciëën

¹ Na wën, ke ya tïŋ gök däŋ paannhial, gök dïït ë kɔc tɔ gäi aläl, tuucnhial kadhorou tuuc cath ë ka ye piny riɔ̈ɔ̈k kadhorou ka bɔ̈ ciëën, luɔi cï agönh tuc ë Nhialic guɔ thök ë keyiic.

² Na wën, ke ya tïŋ wɛ̈ɛ̈rdït ke cït acidhanh cï liääp kekë mac, ku tiëŋ kɔc wën cï lɛ̈n rac tiaam, ku tiamkï këcïcuëëc kë cït guöp en, ku gäärde, ku kuën ë rinke, ke ke kääc ë wɛ̈ɛ̈rdït cït acidhath nɔm, ke ke muk thoom ke Nhialic.

³ Ku kitkï din ë Mothe lïm ë Nhialic, ku din ë Nyɔŋamääl, luelkï, an: “Yïn Bɛ̈nydït Nhialic Awärjäŋ, luɔidu adït ee kɔc tɔ gäi! Yïn Melik de Juöör kuɛɛrku apiɛthkï ku yek yith!

⁴ Eeŋa cïï duëër riɔ̈ɔ̈c ë yïn, ku cïï rinku e leec, yïn Bɛ̈nydït? Yïn yïtök yïn aɣeric. Juöör abïk bɛ̈n kedhie bïk bɛ̈n lam ë yïnɔm, në tïc cï luɔiduön piɛth guɔ tïc.”

⁵ Na wën, aacï kakë thök, ke ya jɔt anyin, ku jɔ luaŋ ɣeric tuöl, ke cï liep thok, luaŋ de yic paany de cäätɔ paannhial:

⁶ go tuucnhial wën kadhorou bɛ̈n bei luɛɛk, tuuc muk ka ye piny riɔ̈ɔ̈k kadhorou, ke ke ceŋ lupɔ cɔl linɔn, lupɔ ɣer ë pak ee lɔ riauriau, ku acïk kepiɔ̈ɔ̈th göi ë thiönh ë adhääp.

⁷ Go lɛ̈n tök ë läi kaŋuan yiic go tuuc kadhorou gäm guöl ë adhääp kadhorou guöl cï thiäŋ ë agönh ë Nhialic, Raan pïïr aɣet athɛɛr ya.

⁸ Go luaŋdït thiäŋ ke tol në dhuëëŋ de Nhialic, ku në riɛldɛn dït: ku acïn raan duëër lɔ luɛɛk të ŋoot ë ka ye piny riɔ̈ɔ̈k kadhorou ke ke kën guɔ thök, kak ë muk tuucnhial kadhorou.