Nyuuth 14 - JAM DE NHIALIC 2011

Nyɔŋamääl ku Kɔcke

¹ Na wën, ke ya jɔt anyin, ku jɔ Nyɔŋamääl tuöl ke kääc ë kuurdït Dhiɔn nɔm, ku kääc kɔc në yen ëtök agum kabɔt ku thiërŋuan ku ŋuan, ke ke cath në rinke, ku rin ke Wun, ke ke cï gɔ̈ɔ̈r ë kenyïïn tueŋ.

² Guɔ kɔc piŋ röt, röt bɔ̈ nhial, acït man ë awuööu de piëëu, ku cït awuööu ë määr dïït ë deŋ: ku piɛŋ din ë kɔc ŋic thoom gut, agutkï thoomken:

³ Ku kitkï din cït kë ë piɛc cak ë thöönydït nɔm, ku läi kaŋuan nïïm, ku röördït nïïm: ku acïn raan duëër dinë yök, ee agum kabɔt ku thiërŋuan ku ŋuan de kɔc kapäc, kɔc cï wɛ̈ɛ̈r bei ë piny nɔm.

⁴ Kɔckë ee kɔc kën kegup tɔ rac në diäär: ayek kɔc kën kɔn lɔ ë diäär: Kɔckë ee kɔc ë Nyɔŋamääl kuany cök, të de en të le yen thïn. Kɔckë aake wëërë bei ë kɔc yiic, bïk aa kɔc cïï piny kɔn luɔk ë ke në këde Nhialic ku në këde Nyɔŋmääl.

⁵ Ku acïn luenh cï yök ë kethook: atɔ̈ukï ë thöönydïït ë Nhialic nɔm ke ke cïn gäŋ duëërë ke gɔ̈k.

Tuucnhial Kadiäk

⁶ Na wën, ke ya tïŋ tunynhial däŋ, ke riŋ ë paannhialic cil, ke cath ke wëlpiɛth thɛɛr bï ke guiëër kɔc rɛ̈ɛ̈r ë piny nɔm, ku guïïr juöör ëbɛ̈n ku dhiën ku liëp ku kɔc ëbɛ̈n,

⁷ ku lueel ë röl dït, an, “Riëëukï Nhialic, ku lɛckï nɔm: thaar bï en löŋ guiir kï, cï bɛ̈në: jakï Raan lam Raan ë cak nhial ku ciɛk piny ku wɛ̈ɛ̈r ku awɛɛŋ ke piëëu!”

⁸ Na wën, ke tunynhial däŋ löök bɛ̈n, bï ku lueel, an, “Acï wïïk! Acï wïïk, yen Babilon pänydïït dïïtë, luɔi cï en juöör tɔ dëk ëbɛ̈n në mɔ̈n ë agɔ̈th agönh ë bïïyë bɛɛlde!”

⁹ Na wën, ke tunynhial däŋ tuny ee kek diäk löök lɔ ë kecök, ku lueel ë röl dït, an, “Na de raan ë lɛ̈n rac lam, ku lɛm këcïcuëëc kë cït guöp en, ku gɛm gäär bï e gɔ̈ɔ̈r nyin tueŋ, ayï yeciin,

¹⁰ ka yenguöp abï dek ë mɔ̈n ë agönh ë Nhialic, mɔ̈n cï dhiim ë abïny ë agönhdɛn cï tïc, ke cïn kë cï liääp ke ye, ku abï leeŋ wëi në mac ku thulpur ë tuucnhial ɣeriic nïïm, ku Nyɔŋamääl nɔm:

¹¹ ku tol ë lɛ̈ŋ ee ke leeŋ wëi ee lɔ nhial aɣet athɛɛr ya, ku acïn lɔ̈ŋ ee kek lɔ̈ŋ aköl ku wakɔ̈u, kek kɔc ee lɛ̈n rac lam ku lɛmkï këcïcuëëc ke cït guöp en, ayï raan ëbɛ̈n raan gam gäär bï e gäär guöp rinke.”

¹² Ruöt ee kɔc ɣerpiɔ̈ɔ̈th kepiɔ̈ɔ̈th ruut kï, kɔc ee lööŋ ke Nhialic döt, ku dötkï gäm cï kek Yecu gam.

¹³ Guɔ röl ë raan piŋ röl bɔ̈ nhial, lueel, an, “Gäär, an: Thieithieei ë kɔc bï thou ë Bɛ̈nydïtic gɔl ënɔɔnë aɣet wadäŋ!” “Ɣɛɛ, ee yic, alueel Wëidït, në ke lɔ̈ŋ në luɔidɛn tuc, ku luɔidɛn cïk looi ee keek biɔɔth cök.”

Tëm de Pinynɔm

¹⁴ Na wën, ke ya jɔt anyin, ku jɔ luän ɣer tuöl, ku rɛ̈ɛ̈r raan ë luät nɔm raan cït guöp Wën ë raan, aceŋ göl ë adhääp ë yenɔm, ku muk menyjel moth ë yeciin.

¹⁵ Na wën, ke tunynhial däŋ bɔ̈ bei ë luaŋdïtic, ke cɔl raan wën rɛ̈ɛ̈r ë luät nɔm, cɔɔl ë röl dït an, “Bɛ̈ɛ̈iyë menyjeldu bei, ku tem: kööl ë tëm kï, cï bɛ̈në, dom de piny nɔm ë guɔ luɔk ka cï riɛl!”

¹⁶ Go raan rɛ̈ɛ̈r ë luät nɔm go menyjelde ɣaak ë piny nɔm, ago piny nɔm thök ë tëm.

¹⁷ Na wën, ke tunynhial däŋ bɔ̈ bei luaŋdïït nu paannhial, ke muk menyjel moth ayadäŋ.

¹⁸ Ku jɔ tunynhial däŋ bɛ̈n bei të nu yïïŋ de läm, tuny cath ke riɛl bï en mac cieŋ: bï ku cɔɔl tunynhial muk menyjel moth, cɔɔl ë röl dït, lueel, an, “Tääuwë menyjelduön moth thïn, ku ŋuithë mïth ke enap de piny nɔm ka lɔ juanyany, mïthke acïk thök ë luɔk!”

¹⁹ Go tunynhial menyjelde ɣaak ë piny nɔm, ku kut mïth ke enap nïïm, enap de piny nɔm, go ke cuat ë gök de këdäŋic kën ee mïth ke enap dhiim thïn aye mɔ̈u, mɔ̈n ë agönh tuc de Nhialic.

²⁰ Go kën ee mɔ̈u dhiim thïn duöm piny ë jöŋgöör ë pänydït këc biic, ku jɔ riɛm bɛ̈n bei ë kën ee mɔ̈u dhiim thïn yic, abï pëk ë joth ee jöŋgöör mac thook, thiëëŋ piny abï ɣet nhial në meel bot kaarou ku thuthde aaye akeem kadhïc.