Nyuuth 13 - JAM DE NHIALIC 2011

Läi Kaarou

¹ Na wën, ke ya kääc ë liɛɛt nɔm ë wɛ̈ɛ̈r yɔu: guɔ lɛ̈n rac tïŋ ke bɔ̈ bei ë wɛ̈ɛ̈ric, acath ke nïïm kadhorou, ku tuŋ kathiëër, ku nu dhor kathiëër ë tuŋke kɔ̈ɔ̈th, ku cï rin ke lɛ̈t rac gɔ̈ɔ̈r ë nïïmke kɔ̈ɔ̈th.

² Ku lɛ̈n rɛɛc wën cä tïŋ acït guöp kuac, ku cït cök lɛ̈ndïït rɛɛc cɔl köörayuääl, ku cït thok köör: ku ye ŋuäldït en aa gëm en riɛlde, ku thöönyde, ku bɛ̈ɛ̈nydɛndït cath ke ye.

³ Ku yɛn ë nɔm tök ënïïm yiic tïŋ acït kë cï yup abï thöök, na wën, ke be dem yen të wën cï yup abï thöök: arëk abï piny nɔm gäi ëbɛ̈n ë lɛ̈n rɛɛcë:

⁴ agokï ŋuäl lam, ŋuäl cï lɛ̈n rac gäm riɛlde, ku lamkï lɛ̈n rac, luelkï, an, “Eeŋa kït kekë lɛ̈n rac? Ku ye ŋa duëër biök ke ye?”

⁵ Ku acï gäm thok, thoŋ ee kadït lueel, ku ye lɛ̈t rac lueel, ku gɛ̈m riɛl bï tɔ̈u ë pɛ̈i kathiërŋuan ku rou.

⁶ Go yethok liep bï Nhialic aa läät, ku lɛ̈ɛ̈t rinke, ku täude, ayï kɔc ë tɔ̈u paannhial.

⁷ Ku gëm riɛl bï en tɔŋ yiɛ̈n kɔc ɣerpiɔ̈ɔ̈th, ago ke tiaam: ku gëm bɛ̈ɛ̈ny bï en dhiëën cieŋ ëbɛ̈n ku ceŋ kɔc ëbɛ̈n ku thook ëbɛ̈n ku juöör ëbɛ̈n.

⁸ Ku abï lam ë kɔc tɔ̈u ë piny nɔm kedhie, kɔc kënë rinken gɔ̈ɔ̈r awerek de pïïric, awerek de Nyɔŋamääl cï nɔ̈k të ɣɔn ciɛkë piny thar.

⁹ Na de raan de yïc, ke piŋ.

¹⁰ Raan ë kɔc peec tɔŋ, ka bï peec tɔŋ aya: ku raan ë kɔc nɔ̈k ë abätäu ke bï dhil nɔ̈k ë abätäu aya. Ruöt ee kɔc ɣerpiɔ̈ɔ̈th kepiɔ̈ɔ̈th ruut kï, ku gäm ee kek gam kï.”

¹¹ Na wën, ke ya tïŋ lɛ̈n rɛɛc däŋ ke bɔ̈ bei piny, ku ciɛth ke tuŋ kaarou cït nyɔŋamääl, ku ye jam cït man ë ŋuäl.

¹² Ku ciɛth ke riɛl ë lɛ̈n rɛɛc tueŋë e yenɔm, riɛl ëbɛ̈n, go piny nɔm kekë kɔc rɛ̈ɛ̈r thïn tɔ lam lɛ̈n rɛɛc tueŋ, lɛ̈n wään cï tëtök dem tëtöŋ ë yupë yen abï thöök.

¹³ Ku ye göökdït gɛ̈iyë looi, arëk abï mac tɔ bɔ̈ piny nhial ë kɔc nïïm.

¹⁴ Ku ye kɔc rɛ̈ɛ̈r ë piny nɔm math në baŋ de göök gɛ̈iyë cï gäm en bï ke looi ë lɛ̈n rac nɔm, ee kɔc rɛ̈ɛ̈r ë piny nɔm yɔ̈ɔ̈k, an, bïk këdäŋ cuëëc kë cït guöp lɛ̈n rɛɛc wään cï yiëk tëtök në abätäu, ku acï pïïr.

¹⁵ Ku gëmë riɛl bï këcïcuëëc kë cït guöp lɛ̈n rac yiëkic wëi abï jam, ku tɔ kɔc näk ëbɛ̈n kɔc reec këcïcuëëc kë cït guöp lɛ̈n rac lam.

¹⁶ Ku tɔ kɔc gäär gup kedhie, kɔc kor ku röördït, kɔc cï bäny ku kɔc kuanynyïïn, kɔc lääu nïïm ku lïïm, nɔn gɛ̈ɛ̈rë cin cuëëcken ku nɔn gɛ̈ɛ̈rë kenyïïn tueŋ,

¹⁷ ke cïn raan duëër käŋ aa ɣɔ̈ɔ̈c ku ɣɛɛc käŋ, ee raan de guöp gäär etök, ku ye raan de guöp rin ke lɛ̈n rac, ku nɔn ee yen kuën ë rinke, yen aduëër aa ɣööc.

¹⁸ Pɛlënɔm kï. Raan ŋic käŋ ë kuen kuën ë lɛ̈n rac, luɔi ee yen kuën ë raan: ku kuënde ee bot kadhetem ku thiërdhetem ku dhetem.