Nyuuth 12 - JAM DE NHIALIC 2011

Tik ku Ŋuäldït

¹ Na wën, ke gökdïït gɛ̈iyë tiëc paannhial, tik aceŋ akɔ̈l cït lupɔ, ku nu pɛɛi ë yecök, ku ceŋ göl ë dhuëëŋ ë yenɔm göl de kɔ̈u kuɛl kathiëër ku rou,

² ku amäl guöp, en ee tiiŋë: go dhiau, në rɔ̈p cï e rɔ̈ɔ̈p, ku në rɛ̈m ë dhiënh dhiëëth en.

³ Na wën, ke gök däŋ gɛ̈iyë tiëc paannhial, ŋuäldïït thith ka, ŋuäl de nïïm kadhorou ku tuŋ kathiëër, ku ceŋ dhor kadhorou ë nïïmke.

⁴ Ku thel biäk töŋ ë kuɛl nhial ë yeyɔ̈l, biäk wën ee kek diäk, go ke cuat ë piny nɔm: ku kääc ŋuäldït ë tik nɔm tiiŋ kɔɔr dhiëthë, ke bï mɛnhë cuääl, të cï en e dhiëëth.

⁵ Go mɛwä dhiëëth, mɛnh bï juöör cieŋ ëbɛ̈n ë thieny wëëth: go mɛnhde gap nhial leer të nu Nhialic, ku të nu thöönydɛndït.

⁶ Ku jɔ tik kat ke lɔ ë jɔ̈ɔ̈ric, jɔ̈ɔ̈r de yic tëdɛn cïï Nhialic guik thïn, ke bï muk ëtɛ̈ɛ̈n agum töŋ de nïn ku bot kaarou ku thiërdhetem 1260.

⁷ Na wën, ke tɔŋ biɔ̈k paannhial: Maikɔl kekë tuuckɛnnhial acïk biök ë ŋuäldït, ku biɔ̈k ŋuäldït kekë tuuckɛnnhial,

⁸ agokï ke cuö tiaam, ku acïn tëdɛn cï rɔt bɛ yök paannhial.

⁹ Go ŋuäldït ciɛɛc biic, yen aye kërɛɛc thɛɛr, cɔl Jɔŋdït Rac ku cɔl Catan, jɔŋ ee piny math nɔm ëbɛ̈n, ë ciɛɛc biic le ë piny nɔm, ku ciec tuuckɛnnhial në yen ëtök.

¹⁰ Guɔ röl dït piŋ, röl jam paannhial, lueel, an, “Kunydewëi ë bɛ̈n ënɔɔnë, ku bɔ̈ riɛldït, ku ciɛɛŋ de Nhialic, ku riɛl ë Kërthode, në cuɛt wën cï raan ë mïthëkɔckuɔ gaany cuat piny raan ë keek gaany ë Nhialicda nɔm aköl ku wakɔ̈u.

¹¹ Gokï tiaam në riɛm de Nyɔŋamääl, ku në jamdɛn cïk lueel ke ke ye cäätɔɔ, ku kënkï wëiken tak a thou kek.

¹² Yen miɛt we piɔ̈ɔ̈th, wek bɛ̈i nhial, ku wek kɔc tɔ̈u thïn. Amawoou ë piny nɔm ku wɛ̈ɛ̈r: ë luɔi cï jɔŋdït rac lɔ piny të nuö wek, ke cï gɔ̈th aläl, wën ŋic en en nɔn cï akööl liaakäŋ döŋ tëde yen.

¹³ Na wën, aacï ŋuäl e tïŋ nɔn cï e cuat ë piny nɔm, ke jɔ tiiŋ wën cï mɛwä dhiëëth yɔŋ.

¹⁴ Go tik gäm wuök kaarou, wuök ke gök ë aduŋuɛɛt, bï en ke kat ë ŋuäl nɔm, le jɔ̈ɔ̈ric, tëde, të bï e muk thïn ë ruöön tök, ku run kaarou, ku biäk ë ruöön.

¹⁵ Go ŋuäl pïïu ŋɔ̈k bei ë yethok ë tik cök cït man ë amool, an, tɔ tik jɔtë wei ë amool.

¹⁶ Go piny tik kony, ku liep ethok, en piny, liek amool wën cïï ŋuäl ŋɔ̈k bei ë yethok.

¹⁷ Go ŋuäl gɔ̈th ke tik, ku jɔ jäl le tɔŋ yiɛ̈n mïthkɛn cï döŋ, kɔc ee lööŋ ke Nhialic döt, ku ciɛthkï në gäm de Yecu Kërtho.

¹⁸ Go ŋuäl jɔ kɔ̈ɔ̈c ë wɛ̈ɛ̈r yɔu.