Nyuuth 11 - JAM DE NHIALIC 2011

Cäätɔɔ Kaarou

¹ Go ya gäm aruöör cït wai: ku lueel, an, “Jɔt rɔt, them luaŋdït ë Nhialic, ku yïïŋ de läm, ku kɔc ee lam thïn.

² Ku kal nu ë luak kɔ̈u biic jɔ pɔ̈l, du them, acï gäm juöör: ku abïk pänydït ɣeric aa dum ë kecök ë pɛ̈i kathiërŋuan ku rou.

³ Ku yɛn bï cäätɔɔkï kaarou gäm riɛl, ku abïk këden aa guiir agum töŋ de nïn ku bot kaarou ku thiërdhetem, ke ke ceŋ lupɔɔ ke cual.”

⁴ Kɔckë ayek tiim ke olip kaarou ku yek kuc ke mɛ̈ckealath kaarou, kääc ë Bɛ̈nydïït de piny nɔm.

⁵ Ku na de raan kɔɔr luɔi nɛ̈k en keek, ke mac bɔ̈ biic ë kethook, ciɛm kɔc de kek ater: ku na de raan kɔɔr luɔi nɛ̈k en keek, ka bï dhil nɔ̈k aya, abï thou.

⁶ Kɔckë adekï riɛl bï kek tënhial thiöök, ke cïn deŋ bï tuɛny ë akööl ke guiëërdɛn ee kek këden guiir: ku ciɛthkï në riɛl ë piëëu nïïm puk kek keek abïk aa riɛm, ku duikï piny ë jɔɔk ëbɛ̈n, ë duidɛn ë kepiɔ̈ɔ̈th.

⁷ Ku të cï kek këdɛn ee kek cäätɔɔ thöl ë luɛl, ke lɛ̈n rac lɛ̈n bɔ̈ biic ë adhum thuthic ke bï tɔŋ yiɛ̈n keek, ku jɔ ke tiaam, ku nɛ̈k keek abïk thou.

⁸ Ku gupkɛn cï thou abïk dhɔt piny ë kueer ë pänydïtic pänydïït gök cɔl Thɔdom, ku cɔl Rip, ë cɔ̈t cï yäl kɔ̈u bei, ku ye të cï Bɛ̈nydïïtda piäät thïn aya.

⁹ Ku kɔc kɔ̈k ë kɔc yiic ku dhiëën yiic ku thook yiic ku juöör yiic abïk gupkɛn cï thou aa woi ë nïn kadiäk ku biäk, ku cïkï gupken pɛ̈l täu tɛ̈ɛ̈uwë keek ë raŋic.

¹⁰ Go kɔc rɛ̈ɛ̈r ë piny nɔm gokï piɔ̈ɔ̈th miɛt në thonden, ku dɔlkï, ku abïk röt miɔɔc ë käŋ kapäc, luɔi cï tïtkë kaarou kɔc rɛ̈ɛ̈r ë piny nɔm leeŋ wëi.

¹¹ Na wën, ë nïn kadiäk ku biäk, ke wëi ke pïïr ë ke bɔ̈ tëde Nhialic bïk ku lek ë keyiic, ku jɔkï kɔ̈ɔ̈c ë kecök, go kɔc piɔ̈ɔ̈th päu arëët kɔc wën cï ke tïŋ.

¹² Na wën, ke ke jɔ röl dïït bɔ̈ nhial piŋ, röl lueel en, an, “Bäkï nhial eenë!” Gokï lɔ paannhial ë luätic, ke ke woi kɔc de kek ater.

¹³ Ku ë thaar manë guöp ke piny nieŋ rɔt arëët, go pänydït biäk tök wïïk biäk wën thiëër kek, ku näk aguum kadhorou de kɔc në nieŋ cï piny rɔt niɛŋ: na wën, ke kɔc cï döŋ ke ke riɔ̈c, agokï Nhialic de paannhial leec nɔm.

¹⁴ Amawoou ee kek rou acï wan: amawoou ee kek diäk kï, bɔ̈yë ënɔɔnë.

Kaaŋ de Dhorou

¹⁵ Go tunynhial ë kek dhorou kaaŋde kooth, ku tul röl dït ke kɔc paannhial, luelkï, an, “Ciɛɛŋ de piny nɔm acï guɔ aa këde Bɛ̈nydïïtda, ku ye këde Kërthode: ku abï piny cieŋ aɣet athɛɛr ya.

¹⁶ Go röördït kathiërrou ku ŋuan röördït rɛ̈ɛ̈r ë thöönyken nïïm, agokï röt cuat piny gutkï kenïïm piny, lamkï Nhialic,

¹⁷ ku luelkï, an, “Thieithieei, yïn Nhialic Bɛ̈nydït, Bɛ̈ny ë käŋ lëu kedhie, Bɛ̈ny ë nu, ku anu, luɔi cï yïn riɛldu nööm, ku ceŋ piny!

¹⁸ Ku juöör acïk gɔ̈th, ku jɔ agönhdu bɛ̈n, ku bɔ̈ kööl bï löŋ de kɔc cï thou guiir. Kööl bï yïn tït lïïmku gäm ariöpden, ayï kɔc ɣerpiɔ̈ɔ̈th, ayï kɔc riëëu rinku, kɔc kor ku röördït. Ku kööl bï yïn kɔc riɔ̈ɔ̈k kɔc ee piny riɔ̈ɔ̈k nɔm!”

¹⁹ Na wën, ke luaŋdïït ë Nhialic liep paannhial, go Athänduŋ de löŋ cï mac tïŋ luɛɛk, ku tul wilëdeŋ, ku kɔc röt, ku määrëdeŋ, ku nieŋ cï piny rɔt niɛŋ, ku gök de kɔɔi ë deŋ.