Nyöŋ 9 - JAM DE NHIALIC 2011

Kɔc Reec Bɛ̈nydït

¹ Go lueel an, “Piɛŋkï kënë, kɔc ke Yithriɛl, ee köölë we kɔɔr bäk tem, ke we lɔ ë wɛ̈ɛ̈r de Jordan nɔm lɔŋtui, bäk piny lɔ nööm, piny de juöör dït ku rilkï awär week. Pɛ̈ɛ̈nydïtken adïtkï, ku acï ke gël ë kɛ̈ldït bär lɔ nhial.

² Ku kɔc gupken abɛ̈ɛ̈rkï ku rilkï, ayek wɛ̈ɛ̈t ke Anakim, ku acäk piŋ, ke luel an, acïn raan duëër kɔ̈ɔ̈c ë kenïïm ë tɔŋ.

³ Ku ënɔɔnë, abäk tïŋ ë wenyïïn wapäc, luöi bïï Bɛ̈nydït Nhialicdun cath ë wenïïm tueŋ cït many dɛ̈p. Abäk keek tiaam, të la wek ke we lɔ tueŋ, aguɔkï keek cuɔp wei, ku riäärkï keek nyïïn ëthiäu, cït man cïï Yen e lueel.

⁴ “Të cïï Bɛ̈nydït Nhialicdun keek cuɔp wei në biäkdun, duökï ee lueel ë wepiɔ̈ɔ̈th, an ë bïï week ee pinyë bäk bɛ̈n nööm në biäk de piathëpiɔ̈ndun. Ei, Bɛ̈nydït Yen alɔ ee kɔckë cuɔp wei në biäkdun, në luöi ye kek juöör ee karɛc looi.

⁵ Acie baŋ de piathëpiɔ̈ndun, ku yak këpiɛth looi, yeka jɔ Bɛ̈nydït week tɔ nöm pinyden. Abïï juöörkë cuɔp wei në biäk de karɛcken, ku në biäk kɔɔr Yen bïï thöndɛn wään cï lɛ̈k kuarkun döt, Abraɣam, Yithaak, ku Jakop.

⁶ Abäk dhil ŋic an Bɛ̈nydït aa cïï week gëm ee piny ee ŋiëc luɔkkë, në baŋ de piathëpiɔ̈ndun. Ei, ee wek kɔc ril nïïm.

⁷ “Duökï nïïm mär në luöi cä wek Bɛ̈nydït Nhialicdun tɔ göth ë jɔ̈ɔ̈ric, gɔl ë kööl ɣɔn nyääŋ wek Rip piny agut të ɣëët wek eenë, wek ee Bɛ̈nydït rɛɛc.

⁸ Ayï ɣɔn ë kuur ë Thinai nɔm, wek cïï Bɛ̈nydït tɔ göth, në agönh rɔ̈ŋ ke luöi duëër En we riɔ̈ɔ̈r nyïïn.

⁹ Yɛn ë lɔ nhial ë kuur nɔm, bä kuur cïï Bɛ̈nydït lööŋ gäär ë yekɔ̈u lɔ bɛ̈ɛ̈i, löŋ cï mac ke week, yɛn cï rëër ëtɛ̈ɛ̈n në nïn kathiërŋuan ku wɛ̈ɛ̈riic kathiërŋuan, ke cïn kë cam ku këdek.

¹⁰ Na wën, ke Bɛ̈nydït ë gëm ɛn pɛɛm ke kur kaarou, ku acïï yen këdɛn ɣɔn lëk week ë macic gɔ̈ɔ̈r ë yeciin, kööl ɣɔn bä wek amatnɔm looi ë kuur nɔm ëtɛ̈ɛ̈n.

¹¹ Ee yic, në ee nïnkë yiic kathiërŋuan ku wɛ̈ɛ̈riic kathiërŋuan cök, go Bɛ̈nydït yɛn gäm pɛɛm ke kur kaarou, kur cï yen ke löŋ cï mac gäär thïn.

¹² “Na wën, ke Bɛ̈nydït ë yɔ̈ɔ̈k en, an, ‘lɔɔr piny raan tök ë kuur nɔm, kɔckuön wään bɛ̈ɛ̈iyë bei ë Rip, acïk riääk ku aloikï kërac. Acïk röt yal wei në këdiën cä lɛ̈k keek an bïk looi, ku acïk röt luöi yanh däŋ.’

¹³ “Acïï Bɛ̈nydït lɛ̈k ɛn aya, an, ‘Yɛn ŋic riɛl ril ë kɔckë nïïm.

¹⁴ Du them luöi bï yïn En jɔ̈ɔ̈ny. Akaar bä keek riɔ̈ɔ̈r nyïïn ë pinynɔm, ago ciën raan bï keek bɛ nyɔk ë täk ananden. Ku yïn bä tɔ ye jur ril aläl awär keek.

¹⁵ Aguɔ rɔt puk ku laar piny ë kur thar, ke ya muk kur kaarou, ku cïï lööŋ gäär thïn, lɔ̈k de mac aye bɛ̈n bei ë kuur nɔm.

¹⁶ Acä tïŋ luöi cä wek lööŋ cïï Bɛ̈nydït Nhialicdun gäm week guɔ rɛɛc, ka we cï awäc luöi Yen, në luɔi cä wek röt luöi yanh akäl ë miɔɔr cï looi ë wëëth.

¹⁷ Aguɔ pam ë kur cuat piny ë wenïïm ku kuɛm keek abïk lɔ thorthor.

¹⁸ Na wën, ke ya be yanɔm guöt piny ë Bɛ̈nydït nɔm në lɔ̈ŋ, në nïniic kathiërŋuan ku wɛ̈ɛ̈riic kathiërŋuan ke cïn këcam ku cïn këdek. Yɛn aa loi ee kënë në baŋ cä wek Bɛ̈nydït luöi kërac ku acäk tɔ gɔ̈th.

¹⁹ Yɛn aa riɔ̈c në agönh tuc de Bɛ̈nydït, në luöi cien gɔ̈th arëët, në agönh duëër En week riɔ̈ɔ̈r nyïïn, ku Bɛ̈nydït ë lɔ̈ŋdï bɛ̈n bɛ gam.

²⁰ Ku Bɛ̈nydït acï gɔ̈th ke Aron aya, ka akɔɔr bïï nɔ̈k. Aguɔ lɔ̈ŋ në biäk de Aron ë tëthiinë yiic.

²¹ Yɛn cï ee kërɛɛc cäk looiyë nööm, yen akäl ë miɔɔr wëëth, ku cuat ë mac yic. Na wën ke dhuɔŋ abï lɔ thorthor, ku tiäp abï aa abuui, ku cuat ë abuuiyë në nyinic, nyin ee wat ë kuur thar piny.

²² “Ku wek cï Bɛ̈nydït Nhialicdun tɔ göth aya, wään tɔ̈u wek ë Tabera, ku Matha. Ku Kibroth Ɣataaba.

²³ Ku wään cien we tooc në Kadec Barniya ku thɔn week bäk piny lɔ nööm piny cï gäm week, acäk bɛ̈n rɛɛc thok, ku akɛ̈nkï ŋɔ̈ɔ̈th ku riëëukï lööŋke.

²⁴ Gɔl ee të wään ŋiɛc week, wek ee Bɛ̈nydït rɛɛc thok.

²⁵ Aguɔ yanɔm jɔ guöt piny ë Bɛ̈nydït nɔm në ë nïniic kathiërŋuan ku wɛ̈ɛ̈riic kathiërŋuan, në luöi ŋiɛc ɛn en nɔn cï Bɛ̈nydït Ye lueel an bïï we riëër nyïïn.

²⁶ Aguɔ Bɛ̈nydït lɔ̈ŋ, an, ‘Awärjäŋ, du kɔcku riɔ̈ɔ̈r nyïïn, kɔckuön cï luök, ku bɛ̈ɛ̈iyë kek bei ë Rip në riɛlduön dït

²⁷ Tak awuutku yï: Abraɣam ku Yithaak ku Jakop, ku du riɛl ë nɔm, ku kërac, ku kuöc luɔɔi ee kɔckë woi.

²⁸ Na lɔ ke nɔ̈k, abïï kɔc ke Rip lueel, nɔn kën yïn kɔcku lëu ë luöi bïï yïn keek lɛɛr piny cï lueel an bä gäm keek. Abïk lueel an ë yï yɔŋ kɔcku në luöi bïï yïn keek lɔ nɔ̈k ë jɔ̈ɔ̈ric, në baŋ mɛɛn yïn keek.

²⁹ Ku aŋic, nɔn ye kek kɔckuön cï lɔc bï aa kɔcku, cï ke bɛ̈ɛ̈i bei ë Rip në riɛlduön dït.’