Nyöŋ 8 - JAM DE NHIALIC 2011

Piny Piɛth bïï lɔ Nööm

¹ Go Mothe ŋoot ke jam an, “Riëëukï lööŋ cä ke gäm wek kedhie ee köölë, aguɔkï rëër, ku ŋuakkï wenyïïn, ku bäk piny cïï Bɛ̈nydït thɔ̈n kuarkun nööm.

² Yak we nïïm tak, në luöi wään cïï Bɛ̈nydït week wat ë jɔ̈ɔ̈ric në ee runkë yiic kathiërŋuan, ku ye we tuöc ka tuc thook them En ke week, ago kë kaarkï bäk looi ŋic, ku na bäk lööŋke riëëu.

³ Ee week tɔ nɛ̈k cɔk ku gëm week mana bäk cam, kë cam kën ë kuarkun kɔn cam. Aa wëët week an raan acie pïïr ë këcam yetök raan ee pïïr ë jam cïï Bɛ̈nydït lueel.

⁴ Në ye runkë yiic kathiërŋuan lupɔɔkun akënkï rɛɛt, ku we kën ë keek bɔ̈ɔ̈t cök.

⁵ Yak tak nɔn Ye Bɛ̈nydït Nhialicdun we kiɛm piny ku dui week cït man ye wun mïth mïthke dui.

⁶ Ka yak lööŋ ke Bɛ̈nydït Nhialicdun döt, bäk cath në kuɛɛrke yiic ku bäk riëëu guöp.

⁷ Bɛ̈nydït Nhialicdun aleer week piny ee ŋiëc luɔk, piny de yic kiɛɛr ku nyïïnke, ku awɛɛŋ ke pïïu piny ayek röt mɔc ë wëkiic ku kuriic,

⁸ piny ee luɔk agamɔ, ku barli, ku enap, ku ŋaap, ku pomegraneet, ku tiim ke olip, ku miök ë kiëc.

⁹ Wek cïï cɔk bï nɔ̈k ëtɛ̈ɛ̈n, ku acïn kë bï we dak. Wek bï wëëth wec në kurkë yiic, ku wɛ̈ckï ayööm bei ë kurkë yiic.

¹⁰ Wek bï nïïm dɛ këcam dït, ka wek bïï Bɛ̈nydït Nhialicdun thieei në biäk de piny ee ŋiëc luɔk, piny cï gäm week.

Yöök në Baŋ bïï Kɔc Nïïm Määr ë Bɛ̈nydït

¹¹ Dɔ̈tkï apiɛth nɔn cä wek nïïm bï määr ë Bɛ̈nydït Nhialicdun, dɔ̈tkï lööŋkɛn cä gäm week ee köölë kedhie ku yak ke riëëu.

¹² Të cä wek nïïm dɛ këcam kaarkï ëbɛ̈n, ku cä ɣöötkuön rɛ̈ɛ̈r wek thïn yïk, ɣööt piɛth,

¹³ ku të cïï ɣɔ̈kkun, ayï thökkun, ayï atekkun, ayï adhɛ̈pkun, ayï kakuön kɔ̈k acïk kenyïïn ŋuak,

¹⁴ takkï apiɛth luöi cä wek röt bï leec ku märkï nïïm ë Bɛ̈nydït Nhialicdun, Raan ë kony week ë Rip, të wään ya wek lïïm thïn.

¹⁵ Acï week wat në ee jɔ̈ɔ̈r dït ë riɔ̈ɔ̈cë yic ëbɛ̈n, të de yic karɛc ayï manciëëi de thok wurïï. Yen piny ril cïn yic pïïu. Acï pïïu bɛ̈n tɔ bɔ̈ bei ë kuur lɔ giliu yic në këdun.

¹⁶ Acï week gäm mana ë jɔ̈ɔ̈ric bäk cam, këcam kën kuarkun kɔn cam. Acï we tuöc ka tuc thook them En ke week, aguɔkï athiɛɛi kekë kapiɛth jɔ yök në ke cök.

¹⁷ Ka duökï ee tak nɔn cä wek röt tɔ kueth në riɛldun ku aŋoŋdun wapäc.

¹⁸ Yak ŋic nɔn Yen Bɛ̈nydït Nhialicdun, Yen ë gëm week riɛl bï we tɔ kueth. Aa loi ee kënë në baŋ ŋoot En ke ye Adöt ee köölë, në löŋ cï mac kekë kuarkun.

¹⁹ Duökï nïïm kɔn määr në Bɛ̈nydït Nhialicdun. Ku duökï yiëth kɔ̈k kɔn lam ku duökï ke luui. Wek yɔ̈ɔ̈k ee köölë, të la wek yen lɔ looi, wek bä riɔ̈ɔ̈r nyïïn ë yic.

²⁰ Na cäkkï Bɛ̈nydït lɔ riëëu, ke we bï riɔ̈ɔ̈r nyïïn cït juöör ɣɔn kɔn ë ke riɔ̈ɔ̈r nyïïn në wenïïm, në baŋ kɛ̈n wek röl de Bɛ̈nydït Nhialicdun piŋ.