Nyöŋ 7 - JAM DE NHIALIC 2011

Kɔc ke Bɛ̈nydït

¹ Go Mothe ŋoot ke jam an, “Bɛ̈nydït Nhialic abï week bɛ̈ɛ̈i piny bäk lɔ nööm, ku abï juöör juëc cuɔp wei ë ye yic, ku pɛ̈l wek lɔ tueŋ ku bäk juöör kathiërrou dït ku rilkï në week cuɔp wei, kɔc ke Ɣit, ku kɔc ke Girgac, ku kɔc ke Amor, ku kɔc ke Kanaan, ku kɔc ke Peridh, ku kɔc ke Ɣib, ku kɔc ke Jebuth.

² Të le Bɛ̈nydït Nhialicdun ë kɔckë tääu në we cin ku tiamkï keek, ke abäk keek dhil nɔ̈k kedhie. Duökï määth loi në keek, ku duökï keek nyuth kokëpiɔ̈u.

³ Duökï thiëk ë keyiic, ku duökï mïthkun tɔ thiëk ë keyiic, ku duökï wɛ̈ɛ̈tken tɔ thiëk ë keyiic.

⁴ Në luöi bïï duetken wɛ̈ɛ̈tkun pɔ̈k piɔ̈ɔ̈th wei tëde Bɛ̈nydït ku lamkï yiëth kɔ̈k. Të lee ë kënë rɔt looi Bɛ̈nydït abï gɔ̈th ke week ku riëër wenyïïn raantök.

⁵ Ka ënɔɔnë, jakï yïkken thuöör piny, ku dhuɔŋkï waike kur yaath kɔ̈ɔ̈th, ku yiɛpkï yanh tik Acera piny, ku nyuɔpkï yiëthken.

⁶ Luɔikï ee kënë në baŋ ya wek kɔc ɣeriic ke Bɛ̈nydït Nhialicdun. Në kɔc ke pinynɔm ëbɛ̈n yiic acï week lɔc bäk aa kɔckɛn ke nɔmde.

⁷ “Bɛ̈nydït aa cï we lɔc në baŋ cä wek kɔc kɔ̈k wöör në juëc, wek aaye jur koor arëët ë piny nɔm,

⁸ Bɛ̈nydït anhiaar week, ku akɔɔr bï gutguut cï yen kuëëŋ ke kuarkun aa döt. Yeka, cï yen week kony, në riɛldɛndït ku wëër week bei në lïïmic, lïïm de melik ë Rip.

⁹ Takï wenïïm, Bɛ̈nydït Nhialicdun, Yen aye Nhialic Yetök, ku Yen aye Adöt. Abï löŋdɛn cï mac döt, ku nyuth nhiëërdɛn agɔk aguum ke rɛm ë kɔc ee ye nhiaar ku yek lööŋke riëëu,

¹⁰ ku abï kɔc ee Yen maan dui.

¹¹ Ka ënɔɔnë, riëëukï, ka cïï ë week wɛ̈ɛ̈t, riëëukï lööŋ kedhie, lööŋ cä gäm week ë köölë.

Athiɛɛi de Riëëu

¹² Na cäk ee lööŋkë piŋ ku riëëukï keek në piɔ̈n adöt, ke Bɛ̈nydït Nhialicdun abï ŋoot ke muk löŋdɛn cï mac ke week ku abï we nyuöth nhiëër agɔk, cït man cien ë lɛ̈k kuarkun.

¹³ Abï we nhiaar ku thieei week, aguɔkï juëc ku dɛkï mïth juëc, abï duumkun thieei aguɔkï nïïm dɛ rap, ku mɔ̈u, ku miök de olip, ku abï we thieei në miɔ̈c bï yen we miɔɔc në ɣɔ̈k juëc ku amɛ̈l. Abï week gäm athiɛɛiyë ëbɛ̈n në piny cï lɛ̈k kuarkun an bïï gäm week.

¹⁴ Acïn kɔc bï nu ë piny nɔm kɔc bï dɛ athiɛɛi de kuɛth cït week. Acïn moc ayï tik bï aa rol ë weyiic, ku acïn weŋ bï nɔm ciën dɔu.

¹⁵ Bɛ̈nydït abï we gël në jɔɔk ëbɛ̈n, ku acïï week bï yiɛ̈n jɔɔk rac cït ka cäk keek yök ë Rip, ku abï keek yiɛ̈n kɔc ke aterdun kedhie.

¹⁶ Riäkku jur nyin ëbɛ̈n, jur cïï Bɛ̈nydït Nhialicdun tääu ë wecin, ku duökï keek nyuth kokëpiɔ̈u. Duökï yiëthken lam, kënë abï rac aläldïïtë tëde week.

¹⁷ Duökï röt ë jɔ̈ɔ̈ny wapäc an juöörkë ajuëckï në wook, ka acuku keek duëër cuɔp wei.

¹⁸ Duökï riɔ̈c në keek, takï wenïïm në kë cïï Bɛ̈nydït Nhialicdun luöi Melik de Rip kekë kɔcke kedhie.

¹⁹ Takï wenïïm në göök dït riliic wään cäk keek tïŋ ë wenyïïn kake gäi ku göök, ku riɛldït cïï Bɛ̈nydït Nhialicdun week wɛ̈ɛ̈r bei, ku në ee kueerë acï kɔcke Rip riɔ̈ɔ̈r nyïïn abï kɔc riääc wek e keek ënɔɔnë riɔ̈ɔ̈r nyïïn kedhie.

²⁰ Abï keek tɔ päu kapäc, ku abï kɔc cï ban cï lɔ tëde thiaan riɔ̈ɔ̈r nyïïn.

²¹ Ka duökï riɔ̈c ee kɔckë Bɛ̈nydït Nhialicdun atɔ̈u ke week, Ee Nhialiny dït Raan duëërë riɔ̈ɔ̈c.

²² Abï ë juöörkë cuɔp wei ë tueŋlek, të la wek ke we lɔ tueŋ. Acäkkï keek bï lëu në riäär ë nyin raan tök, na lak looi wäkya, läi roor abïk juëc, ku abïk week bɛ riääc.

²³ Bɛ̈nydït abï kɔc ke aterdun tääu ë wecin, ku tɔ keek päu kapäc aɣët të bïï keek riɔ̈ɔ̈r nyïïn.

²⁴ Abï Meliikken tääu ë wecin. Abäk keek nɔ̈k, ka kɔc abïk nïïm määr ë keek. Acïn raan töŋ bï week tɔ kääc, wek bï raan ëbɛ̈n riɔ̈ɔ̈r nyin.

²⁵ Nyuɔpkï yiëthken. Duökï piɔ̈ɔ̈th bï dɛ ateek ayï adhɛ̈p nu ë kekɔ̈ɔ̈th, ku duökï ke döm röt. Na lak looi wäkya abïk rac aläl, në baŋ mɛɛn ë Bɛ̈nydït Nhialic läm de yiëth.

²⁶ Duökï yanh tök në ee yiëthkë yiic leer ë ɣöötkun yiic, na lak looi wäkya, ke aciɛɛn cït aciɛɛn tɔ̈u ë ke kɔ̈ɔ̈th abï tääu ë we kɔ̈ɔ̈th. Wek bï ee yiëthkë dhil maan ku biankï keek gup, në biäk tɔ̈u aciɛɛn ë Bɛ̈nydït ë ke gup.