Nyöŋ 6 - JAM DE NHIALIC 2011

Löŋ dït

¹ Go Mothe ŋoot ke jam an, “Kakë ayek lööŋ kedhie, lööŋ ë gëmë Bɛ̈nydït Nhialicdun yɛn, bä week bɛ̈n wɛ̈ɛ̈t. Riëëukï keek piny bä wek lɔ thïn ku ɣapkï.

² Në pïïrdun yic ëbɛ̈n, week ku mïth ke mïthkun, wek bï Bɛ̈nydït Nhialicdun dhil riëëu guöp, ku riëëukï lööŋke kedhie, lööŋ gäm week, aguɔkï rëër në run juëc ë piny gäm week nɔm.

³ Piɛŋkï keek, wek kɔc ke Yithriɛl ku riëëukï keek, ago käŋ ëbɛ̈n piath ke week, ku wek bï aa jur ril ë tör ku rɛ̈ɛ̈rkï piny ee wat ë ca ku miök ë kiëc, cït man cïï Bɛ̈nydït Nhialic de kuarkun ye lɛ̈k wook.

⁴ “Wek kɔc ke Yithriɛl piɛŋkï kënë, Bɛ̈nydït yetök, yen aye Nhialicda.

⁵ Nhiaar Bɛ̈nydït Nhialicdu në piɔ̈ndu ëbɛ̈n, ku në wëiku ëbɛ̈n ku në riɛldu ëbɛ̈n.

⁶ Ku Duökï nïïm kɔn määr liŋliŋ në ë lööŋ gäm wek ëköölë.

⁷ Wɛ̈ɛ̈tkï mïthkun në keek, yakï ke nyɔ̈ɔ̈kiic të rɛ̈ɛ̈r wek baai ayï të rɛ̈ɛ̈r wek tëmec ayï të cä wek lɔ̈ŋ ayï të luööi wek.

⁸ Duöötkï keek në we kök ku cieŋkï keek në wenïïm tueŋ ke ke bï we aa täk nïïm.

⁹ Gäärkï keek në ɣöötkun thook tueŋ ayï athïïn ke ɣöötkun thook.

Yöök në Biäk de Ciën Riëëu

¹⁰ “Të le Bɛ̈nydït Nhialicdun week bɛ̈ɛ̈i piny cï thɔ̈n kuarkun, yï Abraɣam, ku Yithaak ku Jakop an bïï week gäm piny de yic pɛ̈ɛ̈nydït kënkï kek yïk.

¹¹ Ku ɣööt abïk yiic thiäŋ në ka läk ku kënkï keek tääu thïn, ku abï dɛ yith kënkï keek wec. Ku tiim ke olip kekë enap kënkï keek cam. Të le Bɛ̈nydït week bɛ̈ɛ̈i ë pinyë ku cäk nïïm dɛ këcamkï wedhie.

¹² Dɔ̈tkï apiɛth ke we cïï nïïm bï määr ë Bɛ̈nydït Raan e bïï we bei ë Rip. Të wään ye wek lïïm thïn.

¹³ Yak riɔ̈ɔ̈c në Bɛ̈nydït Nhialicdun, ku yen yak lam yetök, ku yak kuëëŋ në rinke yetök.

¹⁴ Duökï yiëth kɔ̈k ee lam, ayï yiëth ke kɔc ceŋ në we lɔ̈m.

¹⁵ Të la wek yiëth kɔ̈k lɔ lam agönh de Bɛ̈nydït abï bɛ̈n ë wegup cït man ë mac bïï week bɛ̈n riɔ̈ɔ̈r taitai. Në biäk cïï Bɛ̈nydït Nhialicdun raan rɛ̈ɛ̈r kekë week yanh däŋ nhiaar.

¹⁶ “Duökï Bɛ̈nydït Nhialicdun ee them, cït man wään cä wek e looi në Matha.

¹⁷ Ku dɔ̈tkï apiɛth nɔn bä wek lööŋ cï gam kedhie aa riëëu.

¹⁸ Luɔikï ke cïï Bɛ̈nydït lueel, ee yic ku apiɛth, ku käŋ kedhie abïk piath tëde week. Wek bï piny piɛth nööm, paan wään cïï Bɛ̈nydït thɔ̈n kuarkun.

¹⁹ Ku we bï kɔc ke aterdun cuɔp wei. Cït man cï ë lueel.

²⁰ “Në akööl bï bɛ̈n tueŋë, mïthkun abïk aa lop, an, ‘Eeŋö ee Bɛ̈nydït Nhialicda wook yɔ̈ɔ̈k, an buk lööŋkë riëëu kedhie?’

²¹ Ku ëtɛ̈ɛ̈n yöök keek, an, ‘Wok aaye lïïm ke bɛ̈ny de Rip. Go Bɛ̈nydït wook luäk bei në riɛldɛn dït.

²² Ku acuk tïŋ në wonyïïn ke looi göök, ku looi ka ee kɔc ke Rip riääc kekë bɛ̈nyden ku lɔ bänyken kedhie.

²³ Acï wook luöny bei paan ë Rip ku bïï wook ee tënë ku gëm wook ee pinyë, cït man wään cï yen kuarkuɔ yɔ̈ɔ̈k nɔn yen ë pinyë yen bïï gäm keek.

²⁴ Go Bɛ̈nydït Nhialicda wo yɔ̈ɔ̈k, an, buk lööŋke riëëu kedhie, ku buk aa riɔ̈ɔ̈c në yen. Na lok looi, ke abï paanda aa tiit akööl nyïïn, ku abï wook tɔ kueth.

²⁵ Na lok këriëëc cïï Bɛ̈nydït thɔ̈n wook döt në piathëpiɔ̈u ku rïïuku, ke abï piɔ̈u miɛt kekë wook.