Nyöŋ 5 - JAM DE NHIALIC 2011

Lööŋ Kathiëër

¹ Go Mothe kɔc ke Yithriɛl cɔɔl tëtök kedhie ku yöök keek, an, Wek kɔc ke Yithriɛl piɛŋkï lööŋ gäm ke week ee köölë, ŋiɛckï keek ëgɔk, ku dhiɛlkï keek riëëu.

² Në kuur de Thinai nɔm, Bɛ̈nydït Nhialicda acï mät looi.

³ Ku aa cïï mät loi kekë kuarkuɔ kapäc, aa loi mät kekë wook, wok kɔc tɔ̈u ee tënë ee köölë.

⁴ Bɛ̈nydït acï jam kekë week ke we woi wenyïïn ë kuur nɔm në macic.

⁵ Yɛn cï bɛ̈n kɔ̈ɔ̈c në kaamdun ë Bɛ̈nydït, bä week lɛ̈k kë ye lueel. Në biäk wään cïï kek riɔ̈ɔ̈c në mac ku wek kën bɛ̈n lɔ nhial ë kuur nɔm. “Acïï Bɛ̈nydït lueel an,

⁶ ‘Yɛn ee Bɛ̈nydït Nhialicdun, Nhialic ɣɔn bïï week bei paan ë Rip, të wään ya wek lïïm thïn.

⁷ “Duökï yiëth kɔ̈k ee lam, ee Yɛn Yatök.

⁸ “Duökï röt lui yiëth cït gup ka nhial, ayï ka nu piny, ayï ka nu wïïr, ayï ka nu ë piny thar.

⁹ Duökï wenïïm ee guöt piny në yiëth nïïm, ku duökï keek lam, në luöi Yan Bɛ̈nydït Nhialicdun, Yɛn cïï raan tɛɛr ke Yɛn duëër pɔ̈l. Yɛn ee kɔc man yɛn luöi këtuc, agut cï mïth ke mïthken në rɛm ye kek diäk, ayï rɛm ye kek ŋuan.

¹⁰ Ku Yɛn ee nhiëër agɔk nyuöth aguum ke rɛm de kɔc nhiaar Yɛn ku yek lööŋkï gam.

¹¹ ‘Duökï rin ke Bɛ̈nydït Nhialicdun ee cɔ̈l baŋ në ka ɣäär yiic, në luöi bï Bɛ̈nydït Nhialicdun raan ëbɛ̈n luöi këtuc, raan ee yen cɔɔl rin baaŋ në ka ɣääriic.

¹² ‘Yak kööl de Thabath döt, ku yak tɔ ee kööl ɣeric cït man cän week yɔ̈ɔ̈k, Yɛn Bɛ̈nydït Nhialicdun.

¹³ Wek de nïïm akööl kadhetem, akööl bä wek luɔidun looi thïn,

¹⁴ ku kööl ye akööl dhorou ee Thabath ë Bɛ̈nydït Nhialicdun, kööldɛn ë lɔ̈ŋ. Duökï ee lui thïn, week në wɛ̈ɛ̈tkun, ku duetkun, ayï lïïmkun, ayï mulkun, ayï ɣɔ̈kkun, ayï kɔc alɛi rɛ̈ɛ̈r në week pinydun, aguɔkï lɔ̈ŋ wedhie week në lïïmkun.

¹⁵ Takï wenïïm wään, wek aaye lïïm ë Rip. Aguɔ week luäk bei në riɛldiëndït, Yɛn Bɛ̈nydït Nhialicdun. Yen aa jan week yɔ̈ɔ̈k an riëëukï kööl de Thabath.

¹⁶ ‘Ye wuur riëëu ke ke moor, cït man cän yïn yɔ̈ɔ̈k Yɛn Bɛ̈nydït Nhialicdun, aguɔkï ceŋ ë run juëc, ku abï piath ke week, piny bï Bɛ̈nydït Nhialicdun gäm week.

¹⁷ ‘Du raan näk abïï thou.

¹⁸ ‘Du lɔ we tiiŋ lei ku tik ë cïï lɔ kekë mony däŋ.

¹⁹ ‘Du kuël.

²⁰ ‘Du raan ciëk thok në lueth.

²¹ ‘Du tiiŋ de raan däŋ woi në yïpiɔ̈u, ku du ɣönde woi në yïpiɔ̈u, ayï pinyde, ayï lïïmke, ayï ɣɔ̈kke, ayï mulke, ayï këriëëcdɛn tɔ̈u kekë yen ëbɛ̈n du woi në yïpiɔ̈u.’

²² “Kakë ayek lööŋ wään lëkë Bɛ̈nydït amatnɔmdun ëbɛ̈n, wään kuöt wek nïïm ë kuur nɔm. Wään bï Yen jam ke week ë röldït ë macic ku në luändït yic, aa gëm week ee lööŋkë ku acïn kɔ̈k pei. Ku ëtɛ̈ɛ̈n acï ke bɛ̈n gäär ë pɛɛm ke kur kaarou kɔ̈ɔ̈th ku gëm keek Yɛn.

Kɔc Acïk Riɔ̈ɔ̈c

²³ “Na wën acï kuur nɔm dɛ̈p ë mac ëbɛ̈n, ku piɛŋkï röl ke bɔ̈ në mɔ̈ɔ̈thic, go bäny ku röördït ke dhiëënkun bɛ̈n tëde yɛn

²⁴ ku luelkï, an, ‘Bɛ̈nydït Nhialicda acï wo nyuöth dïtde, ku dhuëëŋde, të wën piŋ wok en ke jam ë macic! Ee köölë acuk tïŋ nɔn duëër ë raan ŋoot ke pïïr, cakaa nɔn cïï Nhialic jam kekë yen.

²⁵ Ku ënɔɔnë eeŋö duëër wok röt bɛ kɔ̈ɔ̈r thuɔɔu? Yen ë many rɛɛcë abï wook riɔ̈ɔ̈r nyïïn. Wok bï dhil thou të le wok Bɛ̈nydït Nhialic bɛ piŋ röl ke jam.

²⁶ De raan cï kɔn pïïr, raan cï Nhialic Pïïr piŋ ke jam ë macic?

²⁷ Lɔɔr ciëën Mothe, ku piŋ këriëëc ëbɛ̈n, kë bï Bɛ̈nydït Nhialicda lueel. Ku jɔ rɔt puk ku lɛ̈kë wook kë cï lɛ̈k yïn. Abuk piŋ ku abuk riëëu.’

²⁸ “Na wën, aa cï Bɛ̈nydït ee kënë piŋ, go ya yɔ̈ɔ̈k, an, ‘Yɛn cï kë lueel ee kɔckë piŋ, ku këden ee yic.

²⁹ Na yek kë cït ee kënë tak aya aköölnyïïn! Ku na yek ya riëëu guöp ku rïïukï lööŋkï kedhie, ago piath ke keek ayï kuatden aɣet athɛɛr.

³⁰ Lɔɔr, ku lɛ̈k ë keek, bïk röt pɔ̈k ë pɛɛnyken yiic.

³¹ Ku yïn Mothe, yïn bï rɛ̈ɛ̈r wekë yɛn eenë, ku yïn bä gäm lööŋkï kedhie kekë piööcdï. Wɛ̈ɛ̈t ë kɔc ë keek, agokï keek dhil aa riëëu në piny bä lɔ gäm keek.’

³² “Wek kɔc ke Yithriɛl, abäk dhil ŋic ë gɔk nɔn bä wek këriëëc ëbɛ̈n cïï Bɛ̈nydït Nhialicdun lɛ̈k week dhil looi.

³³ Riëëukï keek kedhie, ago piath ke week, ku aguɔkï lɔ rëër ë run juëc piny bä lɔ gäm week.