Nyöŋ 4 - JAM DE NHIALIC 2011

Mothe Aläŋ Yithriɛl bïï Bɛ̈nydït Riëëu

¹ Na wën ke Mothe ë yöök kɔc, an, “Riëëukï lööŋ nyuöth ke weekë kedhie, ku wek bï pïïr, ku ruömkï piny, bïï Bɛ̈nydït Nhialic de kuarkun gäm week.

² Duökï jam lɛ̈k weekë ŋuak nyin në däŋ pei, ku duökï de biäk bɛ̈ɛ̈ikï bei thïn. Riëëukï lööŋ ke Bɛ̈nydït Nhialicdun, lööŋ cä ke gäm wek.

³ Ku week wedhie acäk tïŋ ë we nyïïn, yen kë cïï Bɛ̈nydït looi në kuur ë Peyor. Acï kɔc nɔ̈k kedhie kɔc ee ye kuur ë Peyor lam,

⁴ ku wek kɔc adööt ee jam de Bɛ̈nydït Nhialicdun gam, wek ŋoot ke we pïïr aɣët cï ëköölë.

⁵ “Wek cä keek wɛ̈ɛ̈t ë lööŋ kedhie, cït man cïï Bɛ̈nydït Nhialicdï ya yɔ̈ɔ̈k an luɔi. Riëëukï keek në ee piny bäk lɔ rumë ku cieŋkï.

⁶ Riëëukï keek ë piɔ̈n adöt, yen ee kënë abï pɛlënɔmdun ku ŋïnydekäŋdun nyuöth juöör. Të lee kek ë lööŋkë piŋ kedhie, abïk aa lueel an, ‘Ee yic jurë aŋic käŋ ku ade pɛlënɔm dït!’

⁷ “Acïn jur däŋ, cakaa yen ë dït, jur de nɔm yanh thiääk kekë keek, të kɔɔr kek yen cït man ë Bɛ̈nydït Nhialicda, ke wook. Ee lɔ̈ŋda, piŋ të cïï wok en cɔɔl bï wo kony.

⁸ Acïn jur däŋ cakaa yen ë dït, jur de nɔm lööŋ cït lööŋ cän week wɛ̈ɛ̈t ee köölë.

⁹ Tiɛtkï röt apiɛth! Ku ŋiɛckï ë gɔk aguɔkï nïïm cuö mär në pïïrdunic ëbɛ̈n, ka cäk tïŋ në wenyïïn kedhie. Lɛ̈kkï keek mïthkun ku mïth ke mïthkun.

¹⁰ Abäk keek lɛ̈k kööl ë kääc wek ë Bɛ̈nydït Nhialicdun nɔm ë kuur ë Thinai nɔm, wään yɔ̈ɔ̈k En yɛn an, ‘Kut kɔc nïïm. Akaar bïk kë bä lɛ̈k keek piŋ, agokï piööc në riëëu bï kek Yɛn aa riëëu ë pïïrdenic, ku agokï mïthken aa wɛ̈ɛ̈t bïk yɛn aa riëëu.’

¹¹ “Lɛ̈kë mïthkun në luɔi wään cä wek lɔ kɔ̈ɔ̈c ë kuur thar, kuur wään cï paat piny ë tol col, ku luändïït adur, ku manydïït dɛ̈p ke lɔ nhial.

¹² lɛ̈kë keek luɔi cï Bɛ̈nydït jam kekë week në macic, ku luɔi cä wek rölde piŋ ke jam, ku kënkï tïŋ guöp tän tɔ̈u En.

¹³ Acï week lɛ̈k kë bäk dhil looi në luɔi bä wek män cï looi kekë week döt, wek bï lööŋ kathiëër dhil döt, lööŋ wään cï gɔ̈ɔ̈r në pɛɛm ke kur kaarou kɔ̈ɔ̈th.

¹⁴ Bɛ̈nydït acï ya yɔ̈ɔ̈k bä week wɛ̈ɛ̈t në lööŋ kedhie, löŋ bäk keek dhil riëëu në piny bäk lɔ rumë ku ɣapkï ë Jordan nɔm lɔɔk.

Yöök në Biäk de Läm ë Yiëth

¹⁵ “Wään bï Bɛ̈nydït jam kekë week ë macic në kuur ë Thinai nɔm, ku wek kën guöpde tïŋ tän tɔ̈u En, në baŋ de piathdun, jakï röt tiit apiɛth

¹⁶ aguɔkï kërac cïï bï looi, në luöi bä wek röt luöi yiëth de gup cït gup ke röör ayï diäär,

¹⁷ ayï läi roor, ayï diɛt nhial,

¹⁸ ayï karɛc ë mol piny, ayï rec nu wïïr.

¹⁹ Ku të cä wek nhial lieec ku tiëŋkï akɔ̈l kekë pɛɛi ku kuɛl, ku ka nu nhial kedhie, duökï röt bï tɔ them, aguɔkï keek lam. Acïï Bɛ̈nydït Nhialicdun keek gäm juöör kɔ̈k ë pinynɔm bïk keek aa lam.

²⁰ Ku wek ee kɔc ë luɛ̈kë bei në Rip, yen manydïït ë wëëth dɛ̈p. Aa bïï week bei, bïï week bɛ̈n tɔ ye kɔcke, cït man tɔ̈u wek ee köölë.

²¹ Ku në biäkdun Bɛ̈nydït Nhialicdun ë gɔ̈th kekë yɛn, ku kuëëŋ arëët, an, cä bï lɔ në wɛ̈ɛ̈r de Jordan nɔm lɔɔk, piny piɛth bïï gäm week.

²² Yɛn bï thou e pinyë, ku cä wɛ̈ɛ̈r de Jordan bï teem taitai, ku ënɔɔnë wek cï thiɔ̈k ë luöi bä wek kiir teem, ku lak piny piɛth lɔ ɣap.

²³ Ku dɔ̈tkï apiɛth, ke we cïï nïïm bï määr në män cïï Bɛ̈nydït Nhialicdun looi kekë week. Riëëukï löŋde ku duökï röt lui yath,

²⁴ në biäk cït ë Bɛ̈nydït Nhialicdun lɔ̈k de mac, acïï kë tɛɛr ke Yen ee pɔ̈l.

²⁵ “Ayï miäk të la wek ceŋ aläl ee paanë, ku lak nïïm dɛ mïth ku mïth ke mïthkun, duökï kërac loi, në luɔi bä wek röt luöi yanh de guöp taitai. Kënë arac në Bɛ̈nydït nyin, ku abï Yen tɔ göth.

²⁶ Yɛn cï tënhial cɔɔl kekë piny ee köölë, bïk bɛ̈n daai në këdun, an, na lak yɛn cïï lɔ riëëu, ke we bï dap riäär ee pinyë yic. Wek cïï bï rëër aläl në ë piny tɔ̈u ë Jordan nɔm lɔŋtui, pinyduön bäk lɔ nöömë. Wek bï riɔ̈ɔ̈r nyïïn taitai.

²⁷ Bɛ̈nydït abï week thiäi piny ë juööriic, të bïï kɔc liaakäŋ kapäc lɔ pïïr ë we yiic.

²⁸ Ku ëtɛ̈ɛ̈n, wek bï yiëth ye guaŋ ë kɔc cin aa luööi, yiëth ë loi keek në tiim ku kur, yiëth cie daai, ku cïkkï ee piŋ, ku cïkkï cäm, ku cïkkï ee ŋör.

²⁹ Ku ëtɛ̈ɛ̈n, wek bï Bɛ̈nydït Nhialicdun kɔɔr, ku na lak lɔ kɔɔr në piɔ̈ɔ̈thkun ëbɛ̈n abäk yök.

³⁰ Të la wek lɔ nuan, ku cï kakë röt luöi wek kedhie, wek bï röt pɔ̈k Bɛ̈nydït ëtɛ̈ɛ̈n, ku jakï Bɛ̈nydït riëëu guöp.

³¹ Ee Nhialic de kokëpiɔ̈u, acïï week bï pɔ̈l, ku acïï week bï riɔ̈ɔ̈r nyïïn, ku acïï nɔm bï määr në män cï looi guöpde kekë kuarkun.

³² “Thiëckï ënɔɔnë në biäk ë akööl ɣɔn thɛɛr, akööl ɣɔn kënë we kɔn dhiëëth, lɔɔr ciëën ya agut cï të ɣɔn bï Nhialic raan cak ë pinynɔm, kɔɔr piny nɔm ëbɛ̈n. De këdïït cït e kënë cï kɔn tuöl wään tueŋ? De raan cï kë cït ee kënë kɔn piŋ?

³³ De kɔc cï röl de Nhialic kɔn piŋ ajam ë macic, cït man cä wek en piŋ, ku piɛ̈ɛ̈rkï?

³⁴ De yanh cïï jur kɔn bɛ̈ɛ̈i bei në jurdäŋ yic, ku tɔ keek ee kɔcke, cït man cï Bɛ̈nydït Nhialicdun ye luöi week ë Rip? Ke woikï ë wenyïïn, acï riɛldɛndït kekë riɛl luɔɔi, acï kuöm ku tɔɔŋ bɛ̈ɛ̈i, ku looi göök ku kak ke gäi, ku kadït ee riɔ̈ɔ̈c tɔ loi rɔt.

³⁵ Bɛ̈nydït acï week nyuöth ee kënë, ke bäk jɔ ŋic an ee Yen ee Nhialic yetök, acïn Nhialic däŋ nu.

³⁶ Acï week tɔ piŋ rölde paannhial ke bï week wɛ̈ɛ̈t, ku tɔ week tïŋ manydïïtde në pinynɔm, ku jɔ week jääm ë wëlke ë macic cil.

³⁷ Ku në biäk nhiɛɛr En kuarkun, ku lɔc week në kecök, ku bïï wek bei guöpde piny de Rip në riɛldɛndït.

³⁸ Ku cop juöör dït ku rilkï awär week, ku bïï week thïn, ku gëm week pinyden, piny rɛ̈ɛ̈r wek thïn agut cï ee köölë.

³⁹ Ka week ŋiɛckï ee köölë, ku duökï nïïm mär, Bɛ̈nydït ee yen Nhialic nu paannhial kekë piny. Acïn Nhialic däŋ nu.

⁴⁰ Riëëukï lööŋke kedhie, lööŋ cä gäm week ee köölë, ku käŋ kedhie abïk piath tëde week ku kuatdun. Ku wek bï ceŋ apiɛth, piny bïï Bɛ̈nydït Nhialicdun gäm week, ke bïï aa këdun aɣet athɛɛr.

Pɛ̈ɛ̈nydït ke Thiaan nu ë Jordan të lɔ Aköl Amiäk

⁴¹ Go Mothe pɛ̈ɛ̈nydït kadiäk lɔc, në wɛ̈ɛ̈r de Jordan lɔŋ të lɔ aköl amiäk,

⁴² Pɛ̈ɛ̈nydït bï kɔc aa lɔ thiaan thïn, të cïï raan raan wääth, raan cïn nɔm ater ke ke yen. Raan cï näk aduëër rɔt kual ë pänydïït tökic, ku raanë acïï bïï nɔ̈k.

⁴³ Dhiën de Ruben, ade nɔm Bedher, nu ë riaaŋ nu ë jɔ̈ɔ̈ric, ku dhiën de Gad, ade nɔm Ramoth, nu piny de Giliyad, ku dhiën de Manatha ade nɔm Golan, nu piny de Bacan.

Anyooth ë Kueer bïï Lööŋ ke Nhialic Gam

⁴⁴ Kënë ee löŋ ë tɛ̈ɛ̈uwë Mothe ë mïth ke Yithriɛl nïïm.

⁴⁵ Kakë ayek wëët ku lööŋ ku cök ke piööc, ë gëmë Mothe keek mïth ke Yithriɛl, wään bï kek bɛ̈n bei ë Rip.

⁴⁶ Ku kɔc ke Yithriɛl nu në wak thiääk kekë Beth Peyor ë wɛ̈ɛ̈r de Jordan nɔm lɔɔk të lɔ aköl amiäk, piny de Thiɣon melik de kɔc ke Amor, raan wään mac Ɣecbon, ago Mothe kekë mïth ke Yithriɛl, yen bɛ̈n tiaam ɣɔn bï kek bei paan ë Rip.

⁴⁷ Acïk pinyde bɛ̈n peec ku peckï piny de Og melik de Bacan, kek meliik kaarou de kɔc ke Amor, ëtɛ̈ɛ̈n në wɛ̈ɛ̈r de Jordan nɔm lɔɔk të lɔ aköl amiäk.

⁴⁸ Ku yen ee pinyë aye gɔl në Aroyer, në lil de Arnon thok leer kuur de Thirion, (yen aye Ɣermon),

⁴⁹ ku mɛ̈tkï ëtök në Araba nu ë wɛ̈ɛ̈r de Jordan nɔm lɔɔk të lɔ aköl amiäk, leer ë Wɛ̈ɛ̈r de Araba, ɣëët piny nu ë kuur de Pithga thar.