Nyöŋ 34 - JAM DE NHIALIC 2011

Thon de Mothe

¹ Go Mothe jäl në riaaŋ de Mowapic ke lɔ të nu kuur de Nebo, leer në kuur de Pithga nɔm në Jeriko të lɔ aköl amiäk. Go Bɛ̈nydït nyuöth piny ëbɛ̈n ëtɛ̈ɛ̈n, gɔl në paan de Giliyad ɣeet rut ya të lɔ wun de Dan.

² Ku nyuth paan de Naptali ëbɛ̈n, ku paan de Eparaim kekë Manatha ëbɛ̈n ku paan de Juda ɣeet të lɔ aköl athɛ̈i në Wɛ̈ɛ̈r ɣer kɔ̈u.

³ Ku lee të lɔ wöuwic paan de Juda, ku riaaŋ ee thar ɣet të lɔ Jeriko, päny de tiim ke akööt.

⁴ Na wën ke lëk ë Bɛ̈nydït Mothe, an, “Kënë ee piny wään cä thön Abraɣam ku Yithaak ku Jakop, abä gäm mïth ke mïthken, acä tɔ tïŋ, ku yïn cä bï tɔ lɔ ëtɛ̈ɛ̈n.”

⁵ Ago Mothe awun de Bɛ̈nydït thou ëtɛ̈ɛ̈n piny de Mowap, cït man cï Bɛ̈nydït ë lueel an bï thou.

⁶ Go Bɛ̈nydït thiɔ̈k në wak ë Mowapic, të tuööm nɔm kekë wun de Beth Peyor, ku agut cï ëköölë acïn raan ŋic tën ë thiɔ̈kë yen thïn.

⁷ Ku Mothe aa de nɔm ruöön bɔt ku thiërrou ku rou ɣɔn thou en. Aa ril aläl cït man ɣɔn ee yen dhuk, ku aa ŋoot ke piɛth nyin.

⁸ Go kɔc ke Yithriɛl yen dhiëëu në nïn kathiërdiäk në riaaŋ de Mowapic.

⁹ Ku Jocua wën de Nun aa pelnɔm aläl në baŋ cïï Mothe yen lɔc ke ee raan bï tëde lɔ̈ɔ̈k lak. Ku kɔc ke Yithriɛl aake riëëu Jocua ku dötkï lööŋ ke Bɛ̈nydït wään bï Mothe gäm keek.

¹⁰ Ku acïn tiët cï kɔn tɔ̈u paan de Yithriɛl tiët cït Mothe. Bɛ̈nydït aaye jam kekë yen ke ke tuööm nïïm.

¹¹ Ku acïn tiët däŋ cï kagɛ̈iyë ku göök looi cït man ë ka wään cï Bɛ̈nydït Mothe tooc bï ke lɔ luöi melik de Rip kekë bänyke ku paande ëbɛ̈n.

¹² Ku acïn tiët däŋ cï ka göök ku kake riɔ̈ɔ̈c bɛ looi cït man cïï Mothe ke looi në kɔc ke Yithriɛl nïïm.