Nyöŋ 33 - JAM DE NHIALIC 2011

Mothe Athiei Dhiën ke Yithriɛl

¹ Kakë ayek wël ë lueel Mothe, raan de Nhialic keek, ɣɔn thieei yen mïth ke Yithriɛl ke kën kɔn thou.

² Bɛ̈nydït aa bɔ̈ në kuur de Thinai nɔm, aa jöt cït man ë akɔ̈l në Edom, go kɔcke riaau në kuur de Paran nɔm. Aa cath kekë aguum ke tuucnhial ɣeriic, ku muk many dɛ̈p në ciin cuënyde.

³ Bɛ̈nydït anhiaar kɔcke, ku ee kɔc ke nɔmde gël Agoku wonïïm guöt piny në yecök, ku rïïuku lööŋke.

⁴ Wok ee löŋ ë gëmë Mothe wook riëëu, ee këdan piɛth në amatnɔm de Jakopic.

⁵ Bɛ̈nydït acï ya Meliŋ ë Jecurun, wään bï bäny ke kɔc kenïïm mat, ku mät dhiëën ke Yithriɛl ëbɛ̈n tëtök.

⁶ Go Mothe jam në biäk de dhiën de Ruben an: “Tɔ Ruben pïïr ke cïï thou, cakaa nɔn lik ë kɔcke.”

⁷ Ku lueel jamë në biäk de dhiën de Juda an: “Bɛ̈nydït, piŋ dhiënden të dhiëëu kek kuɔɔny, bɛ ë keek määt në dhiën kɔ̈kkë. Ku Ye tɔŋ thɔ̈ɔ̈r në baŋden, Bɛ̈nydït. Ku kuɔny keek në kɔc ke aterden.”

⁸ Ku lueel jamë në biäk de dhiën de Lebi an: “Yïn Bɛ̈nydït, nyuɔɔthë këde piɔ̈ndu në Yurim kekë Thumim në kueer de lïïmkuön piɛthpiɔ̈ɔ̈th, kɔc ke Lebai. Acï keek them në Matha. Ku yök keek ke ke loi yic në pïïu ke Meriba lɔ̈ɔ̈m.

⁹ Acïk riëëudɛndït nyuöth yïn, awär riëëu rïïu kek kɔcken ayï mïthëkɔcken ayï mïthken, acïk lööŋku riëëu ku aake piɛthpiɔ̈ɔ̈th në mändu.

¹⁰ Abïk mïthku wɛ̈ɛ̈t bïk löŋdu aa riëëu. Abïk miɔ̈c de wal ŋïr ku miɔ̈c ye nyop aa gam në yïïŋdï kɔ̈u.

¹¹ Bɛ̈nydït thieei dhiënden bïï riɛl, ku tɔ yïpiɔ̈u mit wekë këdɛn yek looi. Dhoŋ kɔc ke aterden kɔ̈ɔ̈th kedhie, ku du keek be bɛ tɔ jɔt röt.

¹² Ku lueel jamë në biäk de dhiën de Benjamin, an: “Kënë ee dhiën nhiɛɛr Bɛ̈nydït ku ye göl, aye tiit aköölnyïïn kedhie, ku ee rëër në keyiic cil.

¹³ Ku lueel jamë në biäk de dhiën de Jothep an: “Tɔ Bɛ̈nydït thiei pinyden në deŋ. Ku pïïu ee tuöl piny.

¹⁴ Ku tɔ pinyden thiei në mïth ke tiim, piny kueth në mïth ke tiim ee luɔk në pɛ̈i nyïïn ëbɛ̈n.

¹⁵ Tɔ kurkɛn thɛɛr kum nɔm në mïth ke tiim mit.

¹⁶ Tɔ pinyden thiäŋ kekë këriëëc piɛth ëbɛ̈n, kë cï thieei në piath de Bɛ̈nydït. Raan ee jam në bun dɛ̈pic, tɔ ë athiɛɛiyë bɔ̈ tëde dhiën de Jothep. Në baŋ wään ee yen bɛ̈ny në mïthëkɔcken yiic.

¹⁷ Jothep ade nɔm riɛl de thɔn, kekë tuŋ ke thɔn cï jök, tuŋke ayek aguum ke Manatha, ku aguum kathiëër ke Eparaim, ku në ee tuŋkë ayen ke juöör guööt, ku jiëp keek ë piny thar.”

¹⁸ Ku lueel jamë në biäk de dhiën ë Dhebulun kekë dhiën de Yithriɛl, an: “Tɔ Dhebulun tɔ kueth në luɔiden yen käŋ ɣaac wïïr, ku tɔ kuɛth de Yithakar ŋuak rɔt baai.

¹⁹ Acïk alɛi caal në kurken yiic, ku gɛmkï miɔ̈c piɛth ëtɛ̈ɛ̈n Ayek kuɛthden yök wïïr ku në ë liɛɛt nu ë wɛ̈ɛ̈r yɔu.”

²⁰ Ku lueel jamë në biäk de dhiën de Gad, an: “Pianykï Nhialic, Raan ë tɔ paanden dït, Gad ee tïït cït man ë köör bï cök nɛ̈ɛ̈i bei ku në yen nɔm.

²¹ Acïk piny piɛth nööm ke ee këden, Baŋ de bɛ̈ny ë rem de tɔŋ acï gäm keek. Acïk wël ku lööŋ ke Bɛ̈nydït Riëëu, wään bïï bäny ke Yithriɛl mat nïïm tëtök.”

²² Ku lueel jamë në biäk de dhiën ë Dan, an: “Dan ee mɛnh ë köör, Ee kɛɛc nhial në Bacan.”

²³ Ku lueel jamë në biäk de dhiën ë Naptali an: “Naptali acïï Bɛ̈nydït thiëi kueth aläl në dhuëëŋ de yen piɔ̈u, Pinyden abï ɣet ë wöuwic gɔl në Baar ë Galili.”

²⁴ Ku lueel jamë në biäk de dhiën ë Acer, an: “Acer acï thieei awär dhiën kɔ̈kkë. Tɔ nhiɛɛr ë mïthëkɔcken ku tɔ pinyde kueth në tiim ke olip.

²⁵ Tɔ wuötke gël thook në wëëth ku maläŋ, ku tɔ rɛ̈ɛ̈r në mätic aköölnyïïn kedhie.”

²⁶ Kɔc ke Yithriɛl acïn yanh cït Nhialicdun, Raan ë paannhial rɛɛtic ke luäk week, ku ee cath ë luät yiic ke bï we bɛ̈n kony.

²⁷ Nhialic Yen ee we Kony aköölnyïïn, ku ciindɛn athɛɛr yen aye we luök. Ee kɔc ke aterdun cuɔp wei të la wek tueŋ, ku yöök week an riäkkï keek kedhie.

²⁸ Ago mïth ke Yithriɛl jɔ rëër në mätic, aa awaŋ de Jakop yetök, aake rɛ̈ɛ̈r apiɛth piny thiäŋ ke rap ku mɔ̈u, të ye thäny ee bɛ̈n nhial piny piɔɔk në pïïu.

²⁹ Kɔc ke Yithriɛl, ee miɛt ë piɔ̈u cït ŋö, duëër wek piɔ̈ɔ̈th miɛt! Acïn kɔc cït week, jur ye Bɛ̈nydït kony. Ku Bɛ̈nydït guöp Yen aye köndun ku ye abätäudun, ee week kony ku tɔ we tiëm. Kɔc ke aterdun abïk bɛ̈n, bïk we lip, në kok bä wek piɔ̈ɔ̈th kok, ku ɣäänkɛn ke läm abäk keek duöm piny.