Nyöŋ 31 - JAM DE NHIALIC 2011

Jocua Adɔm tëde Mothe

¹ Go Mothe lɔ ë wut këc ku jiɛɛm ke kɔc ke Yithriɛl.

² Lueel an, “Ënɔɔnë yɛn cï run aa bɔt ku thiërrou. Ku wek cä bï bɛ lëu në wät. Ku acïï Bɛ̈nydït lɛ̈k ɛn an yïn cïï Jordan bï teem kɔ̈u.

³ Bɛ̈nydït Nhialicdun abï lɔ lɔɔk ë wenïïm tueŋ. Abï ë juöörkë riɔ̈ɔ̈k në wenyïïn, ku wek bï pinyden nööm. Ku Jocua ayadäŋ abï lɔ lɔɔk në wenïïm tueŋ, cït man cï Bɛ̈nydït ye lueel.

⁴ Ku abï Bɛ̈nydït ke luöi kë cït kë wään cï luöi yï Thiɣon kekë Og. Kek Meliik ke kɔc ke Amor wään bï keek riɔ̈ɔ̈c ayï pinyden.

⁵ Ku abï Bɛ̈nydït keek tääu në yïcin, ku abäk ke dhiɛl luöi ka cï lɛ̈k week ëbɛ̈n.

⁶ Tɔ rɔt ril ku tɔ rɔt ee jöt. Du riɔ̈c ku du piɔ̈u pɛ̈u wei në biäkden. Në luɔi bïï Bɛ̈nydït Nhialicdun cath kekë week, acïï week bï kɔn pɔ̈l ku cïï we nyiëëŋ wei.”

⁷ Ku ëtɛ̈ɛ̈n Mothe ë Jocua bɛ̈n cɔɔl ku yöök në kɔc ke Yithriɛl nïïm kedhie an, “Tɔ rɔt ril ku tɔ rɔt ee jöt, në baŋ bï yïn dhiɛl jäl wekë ë kɔckë, lak piny wään cïï Bɛ̈nydït lɛ̈k kuarkun an bïï gäm keek. Ku abä dhiɛl tɛ̈k keek ke ye këden.

⁸ Ku Bɛ̈nydït guöp abï lɔ në wenïïm tueŋ ku abï tɔ̈u ke week, ku acïï week bï kɔn pɔ̈l ku cïï we nyiëëŋ wei. Du riɔ̈c ku du piɔ̈u jieth.

Kuën de Löŋ

⁹ Go Mothe ë löŋë gäär piny, ku gëm bäny ke kakë Nhialic, wɛ̈ɛ̈t ke lɔ, kɔc ë athänduŋ de män ë Bɛ̈nydït ɣääc ku lɔ röördït ke Yithriɛl kedhie.

¹⁰ Na wën ke yöök Mothe keek, an, “Të ye run kadhorou thook thök ëbɛ̈n, në ruöön ye käny pɔ̈l, në kaam ye Dhuëëŋ de Kɛ̈ɛ̈t de mät looi.

¹¹ Të ye kɔc ke Yithriɛl kedhie bɛ̈n në Bɛ̈nydït Nhialicdun nɔm, tëdɛn bï lɔc, yɛn bï ee löŋë kueen në kenïïm kekë piŋ.

¹² Kut kɔc nïïm, röör ku diäär ku mïth ku kɔc lei rɛ̈ɛ̈r në wuötken yiic, agokï piŋ ku wëëtkï në luɔi bï kek Bɛ̈nydït Nhialicdun aa riëëu, ku bïk wël nu ee löŋë yic kedhie aa kuany cök apiɛth.

¹³ Ku mïthkun kuc ee löŋë abïk dhil piŋ ku wëëtkï ë luɔi bï kek aa riɔ̈ɔ̈c ë Bɛ̈nydït Nhialicdun në akööl bä wek ke rëër piny bä wek lɔ thïn ë Jordan nɔm lɔɔk.

Jam Ciëën Lëkkë Bɛ̈nydït Mothe

¹⁴ Go Bɛ̈nydït Mothe yɔ̈ɔ̈k an, “Ënɔɔnë akööl ke Thondu acïk thiɔ̈k, cɔl Jocua ku bɛ̈ɛ̈iyë ë paany de mätic, aguɔ bɛ̈n gäm lööŋke.” Ago Mothe kekë Jocua lɔ në paany de mätic.

¹⁵ Go Bɛ̈nydït tuöl ë paany yic ke ee mën de luäät ago luäät kɔ̈ɔ̈c në paany thok.

¹⁶ Ago Bɛ̈nydït lɛ̈k Mothe, an, “Yïn bï lony wekë wärkuön ku kɔckë abïk röt gäm yiëthkɛn ke piny lei rëër kek thïnë, abïk yɛn pɔ̈l ku dhoŋkï män cä looi wokë keek.

¹⁷ Ku në ee köölë yɛn bï gɔ̈th wokë keek, ku päl keek. Yɛn bï ya nyin thiaan në keek ku abä keek riɔ̈ɔ̈r nyïïn në karɛc ku nuɛɛn juëc abïk keek yök. Ku në ee köölë abïk aa lop, an, “Karɛc cï wok yökë cie luöi cïï Nhialicda be tɔ̈u kekë wook?

¹⁸ Ku ë yic ë köölë yɛn bï thiaan në keek, në biäk de karɛckɛn cïk looi ëbɛ̈n, ë gɛm cï kek röt gäm yiëth kɔ̈k.

¹⁹ Ku ënɔɔnë gäärkï dinë piny, ku piɔ̈ɔ̈ckï kɔc ke Yithriɛl në yen ku tɔ kïïtkï, ago aa cäätɔ tëde yɛn në këden.

²⁰ Të lan keek lɔ bɛ̈ɛ̈i piny ee wat në ca ku miök de kiëc, piny wään cä kuëŋ wärken an bä gäm keek ku ëtɛ̈ɛ̈n abïk nïïm dɛ kacaam juëc, abïk röt pɔ̈k yiëth kɔ̈k ku lamkï keek. Ku reeckï yɛn ku dhoŋkï mändï kɔ̈u.

²¹ Ku të le karɛc juëc ku nuɛɛn juëc keek yök, yen ee dinë abï ya cäätɔ gɛɛny keek. Në biäk cïï mïth ke mïthken nïïm bï määr në yen. Yɛn ŋic këdɛn bïk looi, ayï wään ŋuɔɔt ɛn ke ke kɛ̈n bɛ̈ɛ̈i piny ɣɔn cän kuëëŋ an bä gäm keek.

²² Ago Mothe dinë bɛ̈n gäär piny ë wɛ̈ɛ̈rë yic ku wëët kɔc ke Yithriɛl në yen.

²³ Go Bɛ̈nydït Jocua wën de Nun yɔ̈ɔ̈k, an, tɔ rɔt ril ku rit yïpiɔ̈u, në baŋ bï yïn mïth ke Yithriɛl lɛɛr piny cän kuëëŋ an bä gäm keek, ku yɛn guöpdï yɛn bï tɔ̈u wokë week.

²⁴ Ku të wën cï Mothe wël ke lööŋ thöl në gäär gɔl në yenɔm leer ciëën,

²⁵ go kɔc ke Lebai yɔ̈ɔ̈k, kɔc ee athänduŋ de män ë Bɛ̈nydït ɣääc

²⁶ lueel an, ‘Nämkï awerek de Löŋ de Nhialic ku tääukï keek në athänduŋ de män ë Bɛ̈nydït Nhialicdun lɔ̈ɔ̈m ago ya cäätɔ në biäkdun.

²⁷ Në luɔi ŋiɛc ɛn week, luɔi ya wek kɔc cïn piɔ̈ɔ̈th ku rɛɛckï Bɛ̈nydït, ku na yak Bɛ̈nydït rɛɛc thok ke ya ŋoot ke ya pïïr wo week, ee rɛɛc cït ŋö yen bä wek En lɔ̈ɔ̈k rɛɛc të la yɛn thou?

²⁸ Kuötkï röördït ke dhiëënkun ku bänykun kedhie në yanɔm aguɔ ee wëlkë bɛ̈n lueel ke ke piŋ. Ku caal paannhial kekë piny bïk aa cäätɔ në këden.

²⁹ Në baŋ ŋiɛc ɛn en miäk të cän thou wek bï riääk aläl, ku pɔ̈kkï röt wei në lööŋ cä lɛ̈k week, në ee nïn bɔ̈yë, riääk abï we lɔ̈ny në biäk bä wek karɛc looi ë Bɛ̈nydït nyin, ku takï rac piɔ̈u në ka looi cinkun.

Din de Mothe

³⁰ Ago Mothe dit kiit ke piŋ amatnɔm de kɔc ke Yithriɛl kedhie, gɔl në dit nɔm alee guut në dit thar ciëën.