Nyöŋ 30 - JAM DE NHIALIC 2011

Athiɛɛi bïï Yök të cïï Kɔc Gam

¹ Na wën ke lueel Mothe an, “Ënɔɔnë wek bï jɔ lɔc në kaam de athiɛɛi kekë aciɛɛn. Të cï kakë kedhie jɔ tuöl tëde week ku wek cï jɔ rɛ̈ɛ̈r ë juööriic. Të cïï Bɛ̈nydït Nhialicdun week thiäi thïn, wek bï lööŋ wään cä gäm week jɔ tak.

² Na lak röt lɔ pɔ̈k Bɛ̈nydït, ke week në mïthkun wedhie, ku riëëukï lööŋ ke Bɛ̈nydït në piɔ̈ɔ̈thkun ëbɛ̈n, lööŋ gäm ke week ee köölë

³ Ëtɛ̈ɛ̈n Bɛ̈nydït Nhialicdun abï piɔ̈u kok kekë week, abï week bɛ̈ɛ̈i ciëën në Juööriic, juöör cï En ke week thiäi thïn, ku abï week bɛ tɔ kueth.

⁴ Cak aa wek ë cï thiäi ë aguuk mec kë piny yiic. Bɛ̈nydït Nhialicdun abï week määtiic ku abï week bɛ̈ɛ̈i ciëën.

⁵ Aguɔkï piny bɛ nööm, piny wään cïï kuarkun kɔn cieŋ. Ku abï week tɔ kueth ku tɔ week tɔ juëc awär juëc de kuarkun ɣɔn.

⁶ Ku Bɛ̈nydït Nhialicdun abï week ku mïthkun gäm piɔ̈ɔ̈th ke riëëu, aguɔkï jɔ nhiaar në piɔ̈ɔ̈thkun ëbɛ̈n, ku we bï ŋoot ke we rɛ̈ɛ̈r ë pinyë yic.

⁷ Ku abï acienkë kedhie pɔ̈k në kɔc dɛ we ater gup. Kɔc man week ku yek week yɔŋ.

⁸ Ku wek bï Bɛ̈nydït bɛ riëëu ku kuanykï lööŋke yiic kedhie, lööŋ gäm ke week ëköölë.

⁹ Ku ëtɛ̈ɛ̈n Bɛ̈nydït Nhialicdun abï week tɔ kueth aläl në luɔi de wecin ku abï week tɔ kɛɛr ayï daau ke ɣɔ̈kkun ayï rɛɛp ke pinydun abïk juëc. Ku Bɛ̈nydït abï piɔ̈u bɛ miɛt kekë week ku tɔ week kueth, cït man wään ee yen piɔ̈u miɛt kekë wärkun.

¹⁰ Na lak Bɛ̈nydït Nhialicdun riëëu, ku lak lööŋke ku wëlke döt, lööŋ cï keek gɔ̈ɔ̈r në awerek de löŋic, ku pɔ̈kkï röt Bɛ̈nydït Nhialicdun në piɔ̈ɔ̈thkun ëbɛ̈n ku në wëikun ëbɛ̈n.

¹¹ “Ku ënɔɔnë, ke lɛ̈k week ëköölë, acie kë tuc thok aläl tëde week, ku acie kë mec aya.

¹² Acie kë nu nhial ya, aguɔkï thiëëc, an, Eeŋa bï lɔ nhial ya bï lɔ bɛ̈ɛ̈i ku bï bɛ̈n lɛ̈k wook, agoku jɔ riëëu?

¹³ Ku acie kë tɔ̈u ë wɛ̈ɛ̈r lɔŋtui, aguɔkï lop, an, “Eeŋa bï lɔ ë wɛ̈ɛ̈r lɔŋtui bï lɔ bɛ̈ɛ̈i ku bï bɛ̈n lɛ̈k wook agoku jɔ riëëu?

¹⁴ Ei, jam athiääk kekë week arëët. Anu në we thook ku anu në wepiɔ̈ɔ̈th, ka week aduëërkï riëëu.

¹⁵ Në ëköölë wek bä tɔ löc, në kaam de këpiɛth kekë kërac, ku në kaam de pïïr kekë thuɔɔu.

¹⁶ Ku wek yɔ̈ɔ̈k keek ëköölë, bäk Bɛ̈nydït Nhialicdun aa nhiaar, ku bäk cath në yecök, ku bäk lööŋke döt, ku wëlke ku jiɛɛmke, ku ëtɛ̈ɛ̈n wek bï jɔ pïïr ku ŋuakkï wenyïïn, ku Bɛ̈nydït Nhialicdun abï week thieei në pinyduön lak nööm bï aa këdun ë yic.

¹⁷ Ku na lak wepiɔ̈ɔ̈th wɛl wei ku ciënkï riëëu, ku na cï week thɛl wei ku guötkï wenïïm piny në yiëth kɔ̈k nïïm lamkï keek.

¹⁸ Alɛ̈k week ëköölë, an, wek bï dhil riɔ̈ɔ̈r nyïïn ëdhöc, wek cïï bï ceŋ aläl në piny tɛɛm wek Jordan kɔ̈u la wek thïn bäk lɔ nööm.

¹⁹ Ë köölë yɛn cɔl nhial kekë piny bïk këduön bäk tïŋ ënɔɔnë wok ta ke löc në kaam de pïïr kekë thuɔɔu. Ku në kaam de athiɛɛi ku aciɛɛn de Nhialic, ku week lackï pïïr.

²⁰ Nhiaarkï Bɛ̈nydït Nhialicdun. Yak riëëu ku yak röt tɔ ë adööt ku ëtɛ̈ɛ̈n week në mïthkun wek bï cieŋ apiɛth ee pinyë, piny cï thɔ̈n kuarkun yï Abraɣam ku Yithaak ku Jakop.