Nyöŋ 29 - JAM DE NHIALIC 2011

Löŋ cï Bɛ̈nydït Mac ke Yithriɛl Piny de Mowap

¹ Kakë ayek cök ke lööŋ cï Bɛ̈nydït lɛ̈k Mothe, bï ke mac kekë kɔc ke Yithriɛl piny de Mowap, kakë kedhie lɔ në män wään cïï Bɛ̈nydït kɔn mac ke keek në kuur de Thinai nɔm.

² Go Mothe kɔc ke Yithriɛl caal tëtök kedhie, ku yɔ̈ɔ̈k keek an, “Acäk tïŋ ë we nyïïn yen kë cïï Bɛ̈nydït luöi melik de Rip, ku kë cï luöi bänyken, ku ka cï luöi pinyden ëbɛ̈n.

³ Wek cï riääk tïŋ, ku ka ke gäi, ku göök dït cï Bɛ̈nydït ke looi.

⁴ Ku agut cï ee köölë akën we tɔ yök ka cä keek tïŋ yiic.

⁵ Bɛ̈nydït acï week wat në jɔ̈ɔ̈ric në run kathiërŋuan yiic (40), ku lupɔɔkun ayï warkun akënkï bɛ̈n riääk.

⁶ Wek cïn nïïm kuïn cï pam camkï, ayï mɔ̈u ku nɔn mɔ̈n tuc dɛkï, ku Bɛ̈nydït acïï ka kaarkï keek bɛ̈n gäm week në biäk bï Yen week wɛ̈ɛ̈t luöi Yen Bɛ̈nydït Nhialicdun.

⁷ Ku wään aa cuk bɛ̈n ee tënë, go Thiɣon melik de Ɣecbon ku Og melik de Bacan, gokï bɛ̈n bïk bɛ̈n thɔ̈ɔ̈r në wook. Ku acuk keek bɛ̈n tiaam,

⁸ ku nömkï pinyden ku tëku dhiëën ke yï: Ruben, ku Gad, ku biäk de dhiën de Manatha.

⁹ Riëëukï cök ke ë löŋ cï macë kedhie në piɔ̈n adöt, aguɔkï tiam në këriëëc yak looi yic ëbɛ̈n.

¹⁰ “Ë köölë wek kääc në Bɛ̈nydït Nhialicdun lɔ̈ɔ̈m, week wedhie, bänykuön ke dhiëën, ku röördït, ku bänykun, ku röör ke Yithriɛl kedhie,

¹¹ ku diäär, ku mïth, ku alɛi rëër në weyiic, alɛi ee tim yep ku yek pïïu yiɛ̈n week.

¹² Wek tɔ̈u ee tënë ee köölë, bäk ee löŋ macë looi, löŋ mɛcë ë Bɛ̈nydït Nhialicdun ke week, ku wek bï ka lueel dhil gam,

¹³ ago Bɛ̈nydït week jɔ gam ke we ye kɔcke ënɔɔnë, ku abï aa Nhialicdun, cït man cï Yen e thön week ku thön kuarkun yï: Abraɣam, ku Yithaak, ku Jakop.

¹⁴ Acie week wapäc, wek cïï Bɛ̈nydït löŋë mac ku kake luɔɔide.

¹⁵ Aloi ee löŋ cï macë ke wook wodhie, wok kɔc kääc ë Bɛ̈nydït Nhialicda lɔ̈ɔ̈m ee köölë, ku aloi ke mïth ke mïthkuɔn bï lɔ̈ɔ̈k dhiëëth.

¹⁶ “Takkï wenïïm në täu ë tɔ̈u pïïr wään ë Rip, ku täu ë tɔ̈u ë cäth në piny de juöör kɔ̈k yiic.

¹⁷ Wek cï yiëthkɛn nhiany tïŋ, yiëth cï looi në tiim, ku kur, ku ateek, ku adhääp.

¹⁸ Dɔ̈tkï apiɛth nɔn bï yen ciën moc, ayï tik, ayï baai, ayï dhiën, në kɔc kääc ee në ee köölë bï rɔt wɛl wei në Bɛ̈nydït Nhialicda bïï yiëth ke juöör kɔ̈k lɔ lam. Kënë abï ciët mei ee luɔk ke kec ku bïï mïth ke awɔɔk.

¹⁹ Thɛmkï apiɛth ë cïn raan ë we yiic, raan piŋ ee ka kɔɔr keek ee köölë ku lee rɔt yɔ̈ɔ̈k yetök an käŋ kedhie abïk piath tëde yen, cakaa yen ë lɔ kueerdɛn däŋ gɔl, kënë aduëër week riɔ̈ɔ̈k wedhie, kɔc piɛth ayï kɔc rac akït.

²⁰ Bɛ̈nydït acïï raan cït ee kënë bï päl awäc. Atuny de agönh de Bɛ̈nydït abï ciët lɔ̈k de mac ë yeguöp, ku riääk cï keek gɔ̈ɔ̈r në awerekë yic kedhie abïk lööny në yekɔ̈u agut të bï Bɛ̈nydït yen riɔ̈ɔ̈k taitai ë pinynɔm.

²¹ Abïï Bɛ̈nydït ye tɔ ee kë ye kääŋ yup në dhiëën ke Yithriɛl kedhie, ku abï riääk bɛ̈ɛ̈i në yeguöp, riääk de acien cï keek gɔ̈ɔ̈r kedhie në löŋ cï mac yic, löŋ cï gɔ̈ɔ̈r në awerek de wɛ̈ɛ̈t ë Bɛ̈nydïtic.

²² “Në rɛm bï bɛ̈n wadäŋ abïï mïth ke mïthkun ku alɛi tɔ̈u tëmec tïŋ, yen riääk ku nuan cï Bɛ̈nydït bɛ̈ɛ̈i pinydun.

²³ Duum abïk aa riaaŋ cie luɔk, piny cï thiäŋ ke thulpur ku amilɔ, acïn kë bïï com thïn, ayï wal acïkï bï ciɛl ëtɛ̈ɛ̈n, pinydun abï ciët pɛ̈ɛ̈nydït ke Thɔdom, ku Gomoora, ku Adma, ku Dheboyim, wään cïï Bɛ̈nydït ke riɔ̈ɔ̈k ɣɔn cï yen gɔ̈th aläl,

²⁴ ku ëtɛ̈ɛ̈n, juöör abïk jɔ aa lop ëbɛ̈n an, “Eeŋö looi ë Bɛ̈nydït ke cït ee kënë pinydun? Eeŋö tɔ Yen göth aläldïïtë aya?

²⁵ Ku abïï aa bɛ̈ɛ̈r alëyɔ̈ɔ̈, an, “Ee biäk cïï kɔc ke Bɛ̈nydït löŋ cïk mac në Yen dhoŋ kɔ̈u, Nhialic de kuarken, wään bïï Yen keek bei ë Rip.

²⁶ Acïk yiëth kɔ̈k luööi, yiëth kënkï keek kɔn lam, yiëth cïï Bɛ̈nydït pɛ̈n keek an cïkï keek bï aa lam.

²⁷ Ka Bɛ̈nydït acï jɔ gɔ̈th kekë kɔcke, ku yïn pinyden, ee riääkkë ëbɛ̈n, riääk cï gɔ̈ɔ̈r në awerekë yic.

²⁸ Go Bɛ̈nydït gɔ̈th aläldïïtë, ku në agönhdɛndït, acï kek bɛ̈n cuän bei pinyden ku cuɛt keek piny lei, ku yen të rëër kek ka e köölë.

²⁹ “Ade ka kɔ̈k cïï Bɛ̈nydït Nhialicda keek tɔ ee kacïmoony, ku Bɛ̈nydït acï löŋde nyuɔɔth, ku wook në mïth ke mïthkuɔ abuk dhil riëëu aɣet athɛɛr.