Nyöŋ 28 - JAM DE NHIALIC 2011

Athiɛɛi de Riëëu

¹ Na wën ke lueel Mothe an, “Na lak Bɛ̈nydït Nhialicdun lɔ riëëu, ku dɔ̈tkï lööŋkɛn gäm keek week ee köölë kedhie, në piɔ̈n adöt, abï week tɔ dït arëët awär juöör kɔ̈k nu ë piny nɔm.

² Riëëukï Bɛ̈nydït Nhialicdun, ku athiɛɛiyë ëbɛ̈n abï aa këdun.

³ “Bɛ̈nydït abï wuötkun ku duumkun thieei.

⁴ “Bɛ̈nydït abï week thieei në mïth juëc, ku rɛɛp juëc, ku ɣɔ̈k juëc ku thök juëc.

⁵ “Bɛ̈nydït abï week thieei në rɛɛp ke anyuɔl ku thieei këcam yak looi në keek.

⁶ “Bɛ̈nydït abï këriëëc yak looi ëbɛ̈n thieei.

⁷ “Bɛ̈nydït abï kɔc ke aterdun tiaam të le kek week mak. Abïk week aa mak në tuuŋ tök, ku abïk aa kat në week në tuŋ thook kedhie.

⁸ “Bɛ̈nydït Nhialicdun abï luɔidun thieei, abï adhɛnkun thiɔ̈ɔ̈ŋ në rap. Abï week thieei piny lee gäm weekë.

⁹ “Na lak lööŋ ke Bɛ̈nydït Nhialicdun lɔ döt, ku luɔikï këriëëc cï lɛ̈k week ëbɛ̈n, abï week tɔ ee kɔc ɣeriic ke nɔmde, cït man cï yen e than.

¹⁰ Ku ëtɛ̈ɛ̈n, abïï kɔc ke piny nɔm ëbɛ̈n jɔ tïŋ nɔn cïï Bɛ̈nydït week lɔc, bäk aa kɔc ke nɔmde, ku abïk aa riɔ̈ɔ̈c në week.

¹¹ Bɛ̈nydït abï week gäm mïth juëc, ku ɣɔ̈k juëc, ku rɛɛp juëc në piny cï thön kuarkun an bï gäm week.

¹² Abï week yiɛ̈n deŋ në aköölkë yiic, në adhaandɛn nu tënhial, ku thieei luɔidun ëbɛ̈n, ka wek bï juöör juëc aa dhɛ̈ɛ̈n, ku wek cïï bï aa dhëën tëde kɔc.

¹³ Bɛ̈nydït Nhialicdun abï week tɔ ee bäny ee juöör yiic, wek cïï bï aa kɔc ee kɔc kuany cök, wek bï aa kuɛth e run thook ëbɛ̈n ku cäkkï löny taitai, na lak lööŋkɛn gäm keek week ee köölë kedhie lɔ riëëu ë piɔ̈n adöt.

¹⁴ Ku duökï keek bï dhoŋ kɔ̈ɔ̈th taitai, ku duökï yiëth kɔ̈k lam ku luööikï keek.

Kë bï Raan Cïn Riëëu Yök

¹⁵ “Ku na kɛ̈nkï Bɛ̈nydït Nhialic riëëu, ku kɛ̈nkï lööŋkɛn gäm ke week ee köölë kekë wëëtde döt në piɔ̈n adöt, karɛckë kedhie abïk röt luöi week.

¹⁶ “Bɛ̈nydït abï wuötkun ku duumkun cieen.

¹⁷ “Bɛ̈nydït abï rɛɛpkun ke anyuɔl, ku këcam yak looi në keek cieen.

¹⁸ “Bɛ̈nydït abï week cieen, në gëm gëm Yen week mïth lik, ku rɛɛp lik, ku ɣɔ̈k kekë thök liaakäŋ.

¹⁹ “Bɛ̈nydït abï këriëëc yak looi ëbɛ̈n cieen.

²⁰ “Na lak kërac lɔ looi ku rɛɛckï Bɛ̈nydït, abï riääk bɛ̈ɛ̈i tëde week, ku anuɔɔn, ku nuan në këriëëc yak looi yic ëbɛ̈n, agut të bï Yen we dap riɔ̈ɔ̈k liŋliŋ.

²¹ Abï jɔɔk juëc tuöc week, jɔŋë ë jɔŋë cök abäk ciën raan töŋ bï döŋ në piny bäk lɔ rumë.

²² Bɛ̈nydït abï we tuöc jɔɔk ee kɔc nɔɔl, ku bɔ̈ɔ̈t, ku atuöc, abï week tuöc cɔk, ku kupiɔ̈r tuc bï rɛɛpkun riɔ̈ɔ̈k. Yen ee riääkkë abï tɔ̈u ke week aɣët të bä wek thou.

²³ Acïn deŋ bï tuɛny, ku pinydun abï riɛl ë tör cï wëëth.

²⁴ Në nyin ë deŋic, Bɛ̈nydït abï we tuöc amaŋ de tɔɔr ku amaŋ de abuui agut të bä we riääk.

²⁵ “Bɛ̈nydït abï kɔc ke aterdun tɔ tiam week. Abäk keek mak në tuuŋ tök, ku wek bï aa kat në keek në tuŋ thook kedhie, ku kɔc ke piny nɔm kedhie, abïk riɔ̈ɔ̈c arëët të tïŋ kek kë cï tuöl tëde week.

²⁶ Të la wek thou, diɛt ku läi roor abïk bɛ̈n bïk rïŋkun bɛ̈n cuet, ku abï ciën raan ee keek tuur ëtɛ̈ɛ̈n.

²⁷ Bɛ̈nydït abï jɔŋ ee kɔc tɔ toŋ gup tuöc week, cït man cï Yen ë luöi kɔc ke Rip. Abï tëtöök tɔ tuc ë wegup. We bï gup thiäŋ në piär, ku we bïï kuuk gup, ku abï ciën kë bï we tɔ waar.

²⁸ Bɛ̈nydït abï week tɔ cïn wenïïm, abï week yup në cɔɔr ku anuɔɔn ë nɔm.

²⁹ We bï aa tɔ̈u ë paarpaar aköl cït man ë raan cï cɔɔr, ku we cïï kueerdun bï yök thar. Wek cïï bï kuɛth në këriëëc yak looi yic ëbɛ̈n. Wek bïï aa yɔŋ ë ceŋ, ku rum week, ku abï ciën raan kony week.

³⁰ “Wek bï nyan kaarkï aa lɔc, ku abïï ë raan däŋ thiaak. Wek bï ɣööt aa yïk, ku we cïï bï rëër thïn taitai. Wek bï tim de enap com, ku wek cïï mïthke bï cam taitai.

³¹ Ɣɔ̈kkun abï keek aa tɛm röt ke we daai, ku wek cïï rïŋken bï cuet. Mulkun abïï keek aa thɛl wei ke we tɔ̈u thïn, ku acïï keek bïï bɛ pɔ̈k nïïm week, thökkun abï keek gäm kɔc ke aterdun ku acïn raan bï week kony.

³² Wɛ̈ɛ̈tkun ku duetkun abï keek gam ke ke ye lïïm de kɔc lei ke we tɔ̈u thïn. Aköölnyïïn we bï we nyïïn aa ruɛɛt piny, ke we daai youyou, na de të bï mïthkun röt puk.

³³ Jur lei abï rɛɛpkun jɔt ëbɛ̈n, rɛɛp cäk keek puur në luɔi ril ke ke bï luɔk, acïn kë bäk yök thïn, ee yaaŋ cuth rɔt kekë luɔi rac.

³⁴ Nuandun abï week tɔ cïn wenïïm.

³⁵ Bɛ̈nydït abï week kum cök në tëtöök cie dem, poor abï we thiɔ̈ɔ̈ŋ gup, gɔl në wenïïm alee guut ë wecök.

³⁶ “Bɛ̈nydït abï week lɛɛr piny lei në melikdun, jur kɛ̈n wek kɔn lɔ rëër thïn ayï kuarkun, ku wek bï yiëth cï looi në kur ku tiim aa lɔ luööi ëtɛ̈ɛ̈n.

³⁷ Në ee wuöt bïï Bɛ̈nydït week lɔ thiäi piny thïn, kɔc abïk aa gäi në kë cï rɔt luöi week, we bïï ë kääŋ aa yup, abïk we dɔl gup ku buikï we gup.

³⁸ “Wek bï kɔ̈ɔ̈th juëc aa com, ku ee kalik tei kek bäk tem, në biäk bïï gɔt rɛɛpkun cam.

³⁹ Wek bï dom de enap aa com ku tiɛtkï keek, ku wek cïï mïthken bï tet taitai, ku cäkkï mɔ̈nden dek, käm abïk enap riɔ̈ɔ̈k.

⁴⁰ Tiim ke olip abïk aa ciɛl pinydun ëbɛ̈n, ku we bï nïïm ciën miök bä wek tɔc, në biäk bï mïth ke olip lööny piny ke ke kën kɔn luɔk.

⁴¹ Wek bï nïïm aa dɛ wäthii ku duet, ku acïkï bï aa kakun, në biäk bïï ë keek peec, ke ke ye kɔc ë dɔm tɔŋ.

⁴² Tiimkun kedhie ayï rɛɛpkun abïï käm keek riɔ̈ɔ̈k.

⁴³ “Kɔc lei rɛ̈ɛ̈r pinydun, abïk aa lɔ ke ke ril, ku riɛldun abï aa lɔ ke thök ë määth.

⁴⁴ Alɛi abïk nïïm dɛ wëu dhënkï week, ku we bï nïïm ciën kë dhɛ̈nkï keek. Ku në käŋ cök ëbɛ̈n abïk aa bänykun, ku abäk keek aa kuany cök.

⁴⁵ “Kek ee riääkkë kedhie abïk bɛ̈n tëde week, ku abïk tɔ̈u në week agut të bïï ë week riɔ̈ɔ̈k, në biäk kën wek Bɛ̈nydït Nhialicdun riëëu, ku dɔ̈tkï lööŋkɛn cï gäm week kedhie.

⁴⁶ Kek abï aa nyuöth de kuöm bïï Nhialic week kuum ku mïth ke mïthkun aɣet athɛɛr.

⁴⁷ Bɛ̈nydït acï week thieei në käŋiic ëbɛ̈n, ku akënkï luööi në miɛtëpiɔ̈u ku në piɔ̈ɔ̈th mit.

⁴⁸ Ka ënɔɔnë, wek bï kɔc ke ater aa lɔ luööi, kɔc bïï Bɛ̈nydït keek tuöc week. Wek bïï cɔk nɔ̈k kekë reu, ku ciënkï kɔ̈ɔ̈th lupɔɔ, ku we bï këriëëc ëbɛ̈n aa kɔɔr. Bɛ̈nydït abï week yɔŋ cï ka ɣɛ̈ɛ̈c wëëth agut të bïï ë week riɔ̈ɔ̈k.

⁴⁹ Bɛ̈nydït abï week yiɛ̈n jur bï bɛ̈n ë piny thar, jur kuöc wek thoŋde. Abïk lööny ë we kɔ̈ɔ̈th cï cuɔɔr.

⁵⁰ Jur bï we luöi ka tuc thook, ku acïn kokdepiɔ̈u bïk nyuöth raan ëbɛ̈n, mɛnh koor ayï raan dït.

⁵¹ Abïk ɣɔ̈kkun cuet ku rɛɛpkun, ku we bï thou në cɔk. Acïn rap töŋ bïk nyäŋ week, ayï mɔ̈u, ayï miök, ayï weŋ, ayï thök, ku we bï thou.

⁵² Abïk wuöt ëbɛ̈n mak, wuöt nu ë piny gëmë Bɛ̈nydït Nhialicdun weekë, ku kɛ̈ldït bär cï gël, kɛ̈l yak keek ŋɔ̈ɔ̈th abïk wïïk.

⁵³ “Të jɔ kɔc ke aterdun wuötkun gɛɛu cil, wek bï nuan aläl ke we kɔɔr këcam, ka we bï mïth cuet, mïth cïï Bɛ̈nydït Nhialicdun gäm week.

^54-55 Ayï wɛ̈ɛ̈t adhuëëŋ dït abïk nuan aläl në akööl le wunden gɛɛu cil në kɔc ke ater, ka raan abï mïthkɛn kɔ̈k cuet në biäk cïn en nɔm këcam däŋ. Ku acïn kë bïï gäm mänhë, ayï tiiŋdɛn nhiɛɛr, ayï mɛnhde në mïth cï döŋ yiic.

^56-57 Ayï duet adhuëëŋ dït, nyan kueth arëët, nyan cïn të cï yen kɔn lɔ thïn, abï lui në ee kueerë. Të le kɔc ke ater wunden gɛɛu cil, abï nuan aläl ke kɔɔr këcam, ka abï mɛnhdɛn ë piac dhiëëth cuet në cuëër, ku cuet lap aya. Acïï ke bï cuet kekë monydɛn nhiɛɛr ku nɔn ee mɛnh tök në mïth ke yiic.

⁵⁸ “Na kënkï wɛ̈ɛ̈t de Nhialic ëbɛ̈n riëëu, wɛ̈ɛ̈t cï gɔ̈ɔ̈r në awerekë yic, ku na kënkï rin ke Bɛ̈nydït Nhialicdun riëëu, rin ke gäi, rin ye kɔc riɔ̈ɔ̈c,

⁵⁹ abï week ku mïth ke mïthkun tuöc jɔɔk cie waar ku jɔɔk tuc thook ee kɔc thöl, jɔɔk cïï duëër kɔ̈ɔ̈c taitai.

⁶⁰ Abï week yiɛ̈n jɔɔk tuc thook ɣɔn bäk keek kɔn yök ë Rip kedhie, ku we cïï gup bï kɔn waar taitai.

⁶¹ Ku Yen aya abï jɔɔk kithiic ee kɔc thöl ëbɛ̈n tuööc, jɔɔk kën ë ke lueel në awerekë yic awerek de lööŋ ku wɛ̈ɛ̈t de Nhialic, ku wek bïï riɔ̈ɔ̈c.

⁶² Cak aa wek ë cï juëc abäk ciët kuɛl nu nhial, ee kɔc liaakäŋ tei kek abï pïïr ë weyiic, në biäk kën wek Bɛ̈nydït Nhialicdun riëëu.

⁶³ Cït man Ye Bɛ̈nydït piɔ̈u miɛt në kuɛthdunic, ku juëc bä wek juëc, yen abï Yen piɔ̈u miɛt aya në riääk riëëk En week, ku bïï riääk dït tëde week. Wek bï cuän bei në piny bäk lɔ nöömë yic.

⁶⁴ “Bɛ̈nydït abï week thiäi piny në juööriic ëbɛ̈n, gɔl në piny thar biäkë leer ë biäkë, ku ëtɛ̈ɛ̈n we bï yiëth ë loi në tiim ku kur aa luööi, yiëth kɛ̈nkï keek kɔn lam ayï kuarkun.

⁶⁵ “Acïn män bäk yök ee juöörkë yiic ëbɛ̈n, acïn të bä cɔl an tëdun, Bɛ̈nydït abï week doony në diɛɛr, ku ciën aŋäth, ku mum ë nɔm,

⁶⁶ pïïrdun abï aa tɔ̈u në këracic ë ceŋ. Aköl ku wakɔ̈u we bï aa riääk aläl, ku abï aa tɔ̈u ke we riɔ̈c në thuɔɔu.

⁶⁷ Piɔ̈ɔ̈thkun abïk aa lɔ lik në këriëëc ëbɛ̈n yak tïŋ. Të ye piny ruu miäk adurduur we bï thëën aa ŋuöön, ku të cïï piny aa thëën we bï miäk adurduur aa ŋuöön.

⁶⁸ Bɛ̈nydït abï week tuɔɔc ciëën Rip në abëël wïïr, cakaa nɔn cï Yen ë lueel an, wek cïï duëër bɛ lɔ ëtɛ̈ɛ̈n taitai. Ëtɛ̈ɛ̈n we bï röt ɣɔ̈c kɔc ke aterdun ke we ye lïïm, ku acïn raan bï piɔ̈u de luɔi ɣɔɔc en week.