Nyöŋ 26 - JAM DE NHIALIC 2011

Miɔ̈c de Tëm

¹ Go Mothe lueel an, “Të cä wek piny gëm ë Bɛ̈nydït Nhialicdun week jɔ nööm, ku jakï rëër ëtɛ̈ɛ̈n,

² raan ëbɛ̈n ë we yiic, abï biäk ë tëm tueŋ në rɛɛpke yiic ëbɛ̈n aa tääu në diöny yic, ku abäk dhil jɔt në week ëtök, lɛɛrkï të töŋ de läm.

³ Lɔɔr tëde bɛ̈ny de kake Nhialic tɔ̈u ë luɔi yic ee köölë, ku lëkkë yen, an, ‘Acä lɛ̈k Bɛ̈nydït Nhialicdï ee köölë nɔn cän bɛ̈n piny cïï Bɛ̈nydït thön kuarkuɔ an bïï gäm wook.’

⁴ “Ëtɛ̈ɛ̈n bɛ̈ny de kake Nhialic abï diöny jɔ nööm në yïciin, ku jɔ tääu në yïïŋ de Bɛ̈nydït Nhialicdun nɔm.

⁵ Ku ë Bɛ̈nydït nɔm ëtɛ̈ɛ̈n yïn bï ee wëlkë jɔ lɛ̈k Bɛ̈nydït an: ‘Akuaar aaye raan de Aramiin ee cath tei, raan ë leer baaide Rip ke bï lɔ ceŋ ëtɛ̈ɛ̈n. Kuënden aa lik ɣɔn lee kek ëtɛ̈ɛ̈n, ku acïk bɛ̈n juëc ku yek jur ril.

⁶ Go kɔc ke Rip wook luööi arac, ku tɔkï wook lui në riɛl ke wo ye lïïm.

⁷ Goku Bɛ̈nydït Nhialic de kuarkuɔ lɔ̈ŋ bï wo kony. Go Nhialic lɔ̈ŋda piŋ ku tïŋ nuanda, ku luɔi tuc thok, ku jiɛthëpiɔ̈nda.

⁸ Ku në riɛldɛn dït ku riɛldït acï wook kony buk bɛ̈n bei në Rip. Acï göök looi ku kake gäi, ku tɔ ka ee kɔc tɔ riɔ̈c loi röt.

⁹ Acï wook bɛ̈ɛ̈i ee tënë, ku gëm wook piny ee wat ë ca ku miök ë kiëc.

¹⁰ Ka ënɔɔnë yɛn yïn Bɛ̈nydït biäk tueŋ de tëm cï keek gäm ɛn.’ “Ëtɛ̈ɛ̈n, jɔ diöny tääu piny ë Bɛ̈nydït lɔ̈ɔ̈m ku jɔ lam ëtɛ̈ɛ̈n.

¹¹ Ye piɔ̈u miɛt wekë ka cï Bɛ̈nydït Nhialicdun gäm yïn wekë baaidu, ku yak Lebai ku kɔc lei rɛ̈ɛ̈r ë we yiic, tɔ mät në week ë dhuëëŋic.

¹² “Në ruöön ye run diäk ëbɛ̈n gamkï töŋ thiëër ë käŋ, töŋ ë thiëër në rɛɛpkuniic. Yak keek gäm Lebai, ku kɔc lei, ku mïth abɛɛr, ku diëër abɛɛr, ago raan ëbɛ̈n në kɔc yiic kedhie nɔm dɛ këcam ë wuötkuniic. Të cä wek ee kënë looi,

¹³ lɛ̈kkï Bɛ̈nydït an, ‘Acïn tök në ka ɣeriic, töŋ thiëër ë käŋ cï döŋ baaidï, acä keek gäm Lebai, ku kɔc lei, ku mïth abɛɛr, ku diëër abɛɛr, cït man cï Yïn a yɔ̈ɔ̈k an luɔi. Yïn kën rɛɛc thok ku yɛn kën nɔm määr në löŋ tök në lööŋ cï lueel në biäk de töŋ thiëër ë käŋ.

¹⁴ Yɛn cïn kë cä cam në keyiic wään dhiau ɛn, ku acïn kë cä bɛ̈ɛ̈i bei ɣöndï wään raac yɛn guöp në biäk de ciɛɛŋ, ku acïn kë cä gam në keyiic ke ee miɔ̈c de thuɔɔu. Yïn cä riëëu guöp, Yïn Bɛ̈nydït, yɛn cï këriëëc ëbɛ̈n looi, kë cï lueel në biäk de töŋ thiëër ë käŋ.

¹⁵ Ye piny woi paannhial tëduön ɣeric, ku thieei kɔckuön ke Yithriɛl, ku thieei piny cï gäm wook aya, piny ee wat ë ca ku miök ë kiëc, cït man wään cï Yïn kuëëŋ we kuarkuɔ.’

Kɔc ke Bɛ̈nydït

¹⁶ “Köölë Bɛ̈nydït Nhialicdun acï we yöök bäk lööŋkë riëëu kedhie, ka riëëukï keek kedhie në piɔ̈n adöt, në piɔ̈ɔ̈thkun ëbɛ̈n.

¹⁷ Köölë acäk lueel nɔn Ye Bɛ̈nydït Nhialicdun, acäk gam nɔn bäk wek En riëëu, ku bäk lööŋke döt kedhie, ku bäk kakɛn cï lueel ëbɛ̈n looi.

¹⁸ Köölë Bɛ̈nydït acï week gam ke we ye kɔc ke nɔmde, cït man cï Yen ye thön week, ku acï week yöök bäk lööŋke ku jamde riëëu ëbɛ̈n.

¹⁹ Abï week tɔ dït awär juöör cï cak ëbɛ̈n, ku wek bï lɛc ku riëëu yiɛ̈n rinke. Wek bï aa kɔc ɣeriic ke Bɛ̈nydït Nhialicdun cït man cï Yen e lueel.