Nyöŋ 25 - JAM DE NHIALIC 2011

¹ Na wën ke lueel Mothe an, “Na cï kɔc kaarou ke Yithriɛl lɔ gööny yic, bï jamden lɔ guiir, ku raan tök acï yök ke cïn kë cï wööc, ku raan däŋë ade guöp awäc.

² Na cï raan de guöp awäc mäc dui, abïï bɛ̈ny ee löŋ guiir yen tɔ tɔ̈c ke cï ye yic bɔ̈ɔ̈p piny, ku jɔ tɔ dui. Kuën de wɛt duiyë ke yen, abïk kït në pëk de awäny cï looi.

³ Aduëërë dui ë wɛt kathiërŋuan, ku cïï ŋuak, të le ë yen dui ë wɛt wär ee kakë, abï yen tɔ yäär ë kɔc nïïm.

⁴ “Du awalɔ ee tääu ë thɔn thok thɔn ee rap kɔ̈ɔ̈m.

Kë bä Luöi Wänmuuth cï Thou

⁵ “Na rɛ̈ɛ̈r kɔc kaarou raan kekë mänhë në pëër tökic, ku thou raan tök ke cïn wën cï nyääŋ piny, ke tiiŋ abaarde acïï bïï lɔ̈ɔ̈k thiaak ë raan cie raan de baaiden, mony de mänhë cï thou abï lɔ ke yen, abïï thiaak ë mänhë monyde.

⁶ Wën tueŋ bïk dhiëëth abï tɔ ye mɛnh ë raan cï thouwë, ago kuat de baaide ŋoot ke tɔ̈u paan de Yithriɛl.

⁷ Ku na cïï mänhë raan cï thou jaai në baŋ bï yen en thiaak, tik abï lɔ në röördït ke wut nïïm ku lueel an, ‘Mänhë ee monydï acïï kɔɔr bïï luɔide looi, acï jaai në luɔi bï yen mänhë cak nɔm në kɔc ke Yithriɛl yiic.’

⁸ Ëtɛ̈ɛ̈n, röördït ke wut, abïk en jɔ cɔɔl, ku jamkï në yen. Na le lɔ ŋoot ke jai në luɔi bï en ye thiaak,

⁹ ke tiiŋ ë mänhë abï jɔ lɔ të nu yen, ke röördït ke wut ke ke nu thïn, ku abï waar töŋ de mänhë ee monyde bɛ̈ɛ̈i bei, ku ŋuut nyin, lueel, an, ‘Kënë yen ee rɔt luöi raan cï jaai an cïï mänhë cak nɔm.’

¹⁰ Baaide abï ŋic ë kɔc ke Yithriɛl ke ye, ‘Baai de mony cïï ë waarde bɛ̈ɛ̈i bei.’

Lööŋ Kɔ̈k

¹¹ “Na piɔ̈t röör kaarou, ku bɔ̈ tiiŋ de raan tök bïï monyde bɛ̈n kony, në döm dɔm en mony däŋë nhiaan,

¹² duökï piɔ̈ɔ̈th kok në yen, ë teemë ciin bei.

^13-14 “Duökï ee mɛth të thɛ̈m wek në kakë thëm.

¹⁵ Yak them në kake thëm yic ku kake luɔi adöt ë ceŋ, aguɔkï pïïr në run juëc piny gëmë Bɛ̈nydït Nhialicdun week.

¹⁶ Bɛ̈nydït Nhialicdun aman kɔc ee mɛth.

Yöök në Baŋ bïï Kɔc ke Amalek Nɔ̈k

¹⁷ “Takkï wenïïm në kë cï kɔc ke Amalek luöi week wään bä wek bei ë Rip.

¹⁸ Acïkï ee riɔ̈ɔ̈c ë Nhialic, agokï week mak në wekɔ̈ɔ̈th ciëën, të wään cä wek bäb ku cäk dak, ku nɛ̈kkï kɔc wään cï döŋ ciëën kedhie.

¹⁹ Ka ënɔɔnë, të cïï Bɛ̈nydït Nhialicdun week gäm piny, ku cï week kony në kɔc ke aterdun ëbɛ̈n, kɔc rɛ̈ɛ̈r ë welɔ̈m, näkkï kɔc ke Amalek kedhie, ago ciën raan bï keek bɛ nyɔk ë täk. Duökï nïïm mär!